Kacwarʋ yàá gɩgarɩ ləzwəndʋn
7
1 À bìú, lìí à sʋ̀ràn tə,n ga ja yìə̀n tə, à nə pɩn nii tə yuu wa, n bɩcan wa.
2 Twá yìə̀n tə nə, à nə pɩn nii tə yuu wa, yá n wá na mɩɩ.
Ja à kàrà tə n waa con zəni, ndə n yicalɩbiu nə.
3 Vwa tə n jɩfwɩ nə,
n ga pʋ́pʋ́nɩ́ tə n bɩcan wa.
4 Jələ wʋbʋŋa, ndə n nakʋa nə,
n ga jələ pubʋŋa, ndə n dwíí tíú nə.
5 Yá tə wá cɩ̀ n nə də lìù don kan,
də kavee tə, ʋ sʋ̀ràn nə yɩ gɩgara.
6 Dɩɩn don nə, à yà zɩga à dìə̀ təkurə nii nə,
à twá ka nii wogɩganʋ, à ywàŋá kàrá wa.
7 À nɩ ləzwəndʋn ba nə yɩ ləyirən,
à ga mɩ̀àn ba wa balandʋrʋ don, ʋ nə yɩ ləbibənu.
8 Ʋ galɩ cwəŋə tə, ʋ va ʋ twá gʋgɔɔ don wa, kacwarʋ nə wulə lá.
Yá ʋ dàń lòní ʋ vələ kacwarʋ tə dìə̀ con.
9 Kʋ yɩn yɩɩ zʋrɩ máŋá wa, didənbibirə nə,
máŋá tə, tɩa nə wulə ka yìì.
10 Yá kan tə dàń nan ʋ jəri wá.
Ʋ yà zʋa kacwaganan,
ʋ ga jə gɩgara ʋ bɩcan wa.
11 Kan tə yà jə tɩbana, ʋ ga ba cɩvɩra dəri.
Ʋ də̀ń yà ba tɩa keni, ʋ dìə̀ wa.
12 Máŋá don wa, ʋ yàá wulə cwəŋə yuu, máŋá don wa, ʋ wulə yəə wa.
Ʋ yàá twá gʋgwaran tə mama nii nə, ʋ ma pàlɩ̀ lɩ̀à, sə ʋ ja.
13 Kan tə pùrì balandʋrʋ tə, ʋ kʋkwalɩ wá,
ʋ wà cavɩra dəri, ʋ ga swɩ̀n ʋ con, ʋ wʋ́:
14 «À yà poli nii, sə à fwa nimarʋ jwəŋə, à ma kə Yɩɩ lɛ̀ɛ̀,
yá zə̀n kʋ tə, à fwa tə, à pa tə nii sú.
15 Kʋ mʋ̀ nə pɩn, à nan à jəri mʋ́.
À yà pɩ̀à sə à na mʋ́, yá à twarɩ mʋ́, à na.
16 À larɩ gansarɩ à gadoo yuu,
gansarɩ pʋ̀pʋ̀nàn, ba nə sʋa də Ezwipətə tɩ̀án ganbʋa.
17 À sʋ̀rɩ́ wusinə, ba nə fwa də təən mala,
də alʋwɛsə dabii, də sinamomə daborən, à yipaa bwálɩ́ tə nə.
18 Bà nə pə̀ń, nə fwa nə fɩra, kʋ va kʋ yí jɩjʋ.
Nə tʋŋa nə fɩra sonu wa.
19 Cɩ́gá, à barɩ tə̀lə́ dìə̀,
ʋ vəli cwəŋə ka nə ŋʋ́ná.
20 Ʋ tì səbiu də lɔɔ, ʋ ja ʋ yɩra.
Ʋ bá pìí ʋ bà, də kʋ nə tà canpoli wa.»
21 Kan tə ja ʋ swɩan sʋ̀ràn tə, ʋ gɩgarɩ ləbibənu tə, ʋ ja.
Ʋ swɩ̀n wá ʋ ja də ʋ sʋ̀ywáŋá tə.
22 Yá ləbibənu tə dàń púə́ kan tə kwa,
ndə naʋ nə, ba nə ja vələ nangʋrɩ bwálɩ́ nə,
nə à yə̀ə́ ndə nyɩnyaŋʋ nə, ba nə vwə, sə ba mà,
23 kʋ va kʋ yí máŋá tə, cɩɩn nə wá pórí ʋ bɩcasii.
Ʋ yɩ ndə zuŋə nə piri lala, ka vələ zunjanʋ wa,
ʋ ga yəri də kʋ wá lɩ ʋ mɩɩ.
24 Sɩ́ʋ́n nə, à bɩ̀á-ba, á cʋga à sʋgʋ.
Á zurə á yɩra, á cʋgʋ à nii sʋ̀ràn tə zəni.
25 Dàn ká pa n bɩcan viviri mʋ́, kʋ kə kan təntə yiri con.
Dàn ká twá ʋ tʋtʋnɛɛ tə nə, n jɛ́n.
26 Cɩ́gá, ʋ cʋ̀gʋ̀ lɩ̀à kapʋpʋ,
yá lɩ̀à tə mama ʋ nə gʋa, yà yɩ ladɩra.
27 Ʋ dìə̀ yɩ ciru* cwəŋə,
ka vəli tɩan naparʋ wa.