Wʋbʋŋa bwə̀rə́
8
1 Wʋbʋŋa bòrì ʋ keni,pubʋŋa də ga zɩ̀n ʋ kori yɩɩ nə,
á ba nə̀ń naaa?
2 Kʋ yɩ pɛɛn tə yupara wa, tə nə wulə cwəŋə nii nə,
cwəgala tə wa nə, wʋbʋŋa zɩga.
3 Ʋ zɩga tɩʋ tə mimien nə, kʋ mimizwɩ tə wa,
bwálá tə nə, ba nə twá ba zwɩ tɩʋ tə wa, ʋ bòrì, ʋ wʋ́:
4 «Á mʋ̀ ləzoni-ba, á mʋ̀ nə nə, à bòrì à keni.
Á mʋ̀ con nə, à swɩ̀n, à mʋ̀ ləzoni bɩ̀á-ba.
5 Ləyirən-ba, á pɩ̀à swɩan á pa á tɩ̀àn nə.
Ləbibənən-ba, á pɩ̀à pubʋŋa á pa á tɩ̀àn nə.
6 Á cʋga zəni, cɩ́gá, à jə yìə̀n tə nə jə funə, sə à swɩ̀n á con.
Yá yìə̀n tə nə twá cɩ́gá nə, nə naŋa à nii wa.
7 Cɩ́gá, sʋ̀ràn tə nə naŋa à nii wa, yɩ cɩ́gá cɩcɩ.
À culi ka swɩ̀n wʋlʋŋʋ sʋ̀ràn.
8 À nii sʋ̀ràn tə mama yɩ cɩ́gá,
tə wa ba kʋ̀nkʋ̀n, nə à yə̀ə́ gɩgɩra jə.
9 Tə mama yɩ nəpon nəpon, tə pa lìù tə nə, ʋ nə jə pubʋŋa.
Tə yɩ cɩ́gá cwəŋə, tə pa ba tə nə, ba nə jə yənu.
10 Á joŋə à kàrà tə, á ga yá səbiu nə.
Á pɩa yənu, á doni sɩ́án tə nə ba durən jə.
11 Cɩ́gá, wʋbʋŋa funə dwə bwanzɩla.
Won tə̀lə́ kʋ nə jə funə, ndə wʋbʋŋa nə.
12 À mʋ̀ wʋbʋŋa də pubʋŋa nə wulə duən nə,
yá à yə̀ə́ ka tʋn də pubʋŋa.
13 Ka dəri Ba-Yígúrə́-Jə-Tiu fən yɩ ka culi yolwan fwaŋʋ.
À culu nə yɩ fwiə, də yɩrʋ,
də tʋtʋnkʋkwɩnan, də nii tə nə ba cɩ́gá swɩ̀n.
14 Kwìə̀ də pubʋnzəŋu yɩ à mʋ̀ nə tɩ.
À mʋ̀ nə yɩ pubʋŋa, à ga jə dɩ̀àn.
15 Kʋ twá də à mʋ̀ sáŋʋ́, pɛ̀gá ma də́ pàrɩ̀,
yá yun tɩ̀án bʋ̀rɩ̀ bʋra, kʋ twá cɩ́gá nə.
16 Kʋ twá də à mʋ̀ sáŋʋ́, yáá tɩ̀án, də tɩʋ tɩ̀án,
də lɩ̀à tə mama nə bʋ̀rɩ̀ bʋra, ma də́ pàrɩ̀ tɩa yuu wa.
17 À mʋ̀ swə lɩ̀à tə, ba nə swə nə,
yá ba tə nə pɩ̀à nə, yàá na nə.
18 Jɩjə də dun yɩ tə wulə à mʋ̀ con.
Jɩjə ka nə wulə máŋá mama wuuu,
ka ga tì cɩ́gá cwəŋə.
19 À ləni zəni dwə sɩ́án, sɩ́án tə nə ba durən jə,
yá à jə nywarɩ, à doni wárʋ́ tə nə ba durən jə.
20 À vəli cɩ́gá cwəŋə wa,
coŋi tə nə yɩ mənəmənə titəŋi wa,
21 sə à pa zìlə́ wiən lɩ̀à tə nə, ba nə swə nə,
à ga pa ba dìì sú də jɩjə wiən.
22 Ba-Yígúrə́-Jə-Tiu fwa nə, ʋ tʋ̀tʋ̀nán tə də̀ń laŋʋ wa,
də ʋ tə wà won don mama fwa.
23 Ʋ pɩn à wulə, kʋ máŋá ba yigə,
kʋ də̀ń laŋʋ wa, də ʋ tə wà lʋʋ fwa.
24 À twi lʋʋ máŋá tə wa, də bʋʋ nəfarʋ* tə, tə yà tə̀lə́,
yá nabuliyɩa də yà tə̀lə́, tə nə súə́ də nɩ́á.
25 Ba-Yígúrə́-Jə-Tiu fwa nə, ʋ kə lʋʋ wa,
də ʋ tə wà pɛɛn fwa, də ʋ tə wà dədwələn də fwa.
26 Kʋ máŋá tə wa, də ʋ tə wà tɩa tə, də kasɔɔ tə fwa,
də ʋ tə wà tɩa pùrú təntən kasɩlʋ bìú tətə fwa.
27 Máŋá tə, ʋ nə fwa lanworu tə,
máŋá tə, ʋ nə bɩ̀rɩ̀ sɩswɩan bʋʋ nəfarʋ tə yuu con,
də à mʋ̀ yà dí yáá à wulə.
28 Máŋá tə, Ba-Yígúrə́-Jə-Tiu nə ken bakwan tə lanworu tə wa,
ʋ ga pa bʋʋ nəfarʋ tə nabuliyɩa tə pwin tə nan də dɩ̀àn,
29 máŋá tə, ʋ nə tún mʋʋ tə sɩswɩan,
sə kʋ nɩ́á dàn ká pàlɩ̀ tə lɛ,
máŋá tə, ʋ nə tún tɩa tə də̀ń,
30 à yɩn tʋ̀tʋ̀nán tə yənu tíú, ʋ səpuni nə,
à ga fwa ʋ fɩra, dɩɩn mama.
À yà fwa pupwən ʋ yáá con, máŋá mama.
31 À fwa pupwən tɩa tə yuu wa, ʋ nə fwa,
à ga fwa à fɩra ləzoni tə titəŋi wa.
Pupwən lìù nə yɩ lìù tə nə cʋga wʋbʋŋa sʋ̀ràn
32 Yá sɩ́ʋ́n nə, à bɩ̀á-ba, á cʋga à sʋgʋ.
Pupwən lɩ̀à nə yɩ lɩ̀à tə, ba nə twá kʋ tə nə, à nə bɩrɩ ba!
33 Á cʋga kwìə̀, sə á jì wʋbʋnyɩna.
Á dànà ká gwìə̀n tə.
34 Pupwən lìù nə yɩ lìù tə, ʋ nə cʋga à sʋgʋ,
ʋ nə wulə à mimii yáá dɩɩn mama,
ʋ ga cɩ̀ à dìə̀ mimii nə!
35 Cɩ́gá, lìù tə ʋ nə nɩ nə, ʋ nɩ mɩɩ,
ʋ ga na yuywaŋʋ Ba-Yígúrə́-Jə-Tiu yáá con.
36 Yá lìù tə ʋ nə kwɩ̀n à nə, ʋ fwa ʋ tɩ̀àn.
Lɩ̀à tə mama ba nə culi nə, swə tɩan.