Wʋbʋŋa bòrì
9
1 Wʋbʋŋa lwə̀ ʋ dìə̀,ʋ sà ʋ ywəŋə barpɛ.
2 Ʋ gʋa ʋ vàná, ʋ tanɩ ʋ divɛn,
ʋ ga tún ʋ wodiu tabɩlʋ.
3 Ʋ tʋn ʋ tʋtʋnbwɩɩ tɩʋ tə dədwələn tə yuu wa,
sə ba bòrì ba swɩ̀n lɩ̀à tə con, ba wʋ́:
4 «Lìù tə mama ʋ nə yɩ ləyiru, sə ʋ bà, ʋ twá yəbə!»
Ʋ pɩn ba swɩ̀n lɩ̀à tə con, ba nə ba pubʋŋa jə, ʋ wʋ́:
5 «Á bɩ̀àn á də́ à wodiu tə,
á ga nyʋn divɛn tə, à nə tanɩ.
6 Á dʋga ləyiri, yá á wá na mɩɩ.
Á kənə á tɩ̀àn pubʋŋa cwəŋə wa!»
Wʋbʋnyiən də fwìə́ lìù
7 Lìù nə caga bɩyɩrɩ də́rú nii nə, kʋ tíú wá na fʋfʋlʋ,
yá lìù nə caga wʋlʋnyiən nii nə, kʋ tíú wá na tʋran.
8 Dàn ká caga bɩyɩrɩ də́rú nii nə, n pa ʋ dʋn mʋ́.
Caga wʋbʋnyiən nii nə, yá ʋ wá sóní mʋ́.
9 Pa wʋbʋnyiən nə, yá ʋ wá kwɛn ʋ jì wʋbʋnyiən.
Bɩrɩ yənu cɩ́gá tíú nə, yá kʋ wá súrí ʋ yənu.
10 Ka dəri Ba-Yígúrə́-Jə-Tiu fən yɩ wʋbʋŋa də̀ń laŋʋ.
Yá lìù tə ʋ nə yə̀ə́ Yɩɩ təntə, ʋ nə yɩ parɩ*, kʋ tíú jə pubʋŋa.
11 Cɩ́gá, à mʋ̀ wʋbʋŋa wá pa n dɩan ya dánɩ́ lʋʋ wa,
n bɩna ga súrí zənzən.
12 N nə yɩ wʋbʋnyiən, kʋ yɩ n tətə sáŋʋ́.
N nə kʋ́ʋ̀ yɩ bɩyɩrɩ də́rú, kʋ kwa yìə̀n tə wá nyʋn n cɩcɩ yuu wa.
Ləyiri bòrì
13 Ləyiri yɩ ndə kan nə, ʋ nə jə tɩbana,
ʋ yɩ ləjwərə, ʋ yəri yoo də̀ń.
14 Ʋ yàá jəni ʋ dìə̀ mimii nə,
gólí yuu, tɩʋ tə dədwələn yuu wa,
15 ʋ boŋə ʋ kəni lɩ̀à tə nə,
ba nə tì ba cwəŋə, ba kɛ̀ń, ʋ wʋ́:
16 «Lìù tə mama ʋ nə yɩ ləyiru, sə ʋ bà, ʋ twá yəbə!»
Yá ʋ swɩ̀n lɩ̀à tə con, ba nə ba pubʋŋa jə, ʋ wʋ́:
17 «Nɩ́á tə ba nə ŋʋan, nywɩʋn ywán,
wodiu tə, ba nə səgə ba də́, ga jə gwàlà.»
18 Yá Lɩ̀à təntə yəri də, kʋ yɩ tɩga bwálɩ́.
Ba yəri də, kan tə yɩ ʋ boŋə ba, sə ba va ciru*.