ZWANSƖSARƖ YIRƏ YIRƏ
Ka ja tɩ̀àn zəni yuu wa zwansɩsarɩ
10
1 Salʋmʋn zwansɩsarɩ.Bìú tə nə yɩ wʋbʋnyiən poli ʋ nyɩna pùə́,
yá bìú tə nə yɩ ləyiru yɩ ʋ nuu wʋwalʋ.
2 Jɩjə wiən tə ba nə vɩrɩ, ba sáŋʋ́ jə,
yá cɩ́gá cwəŋə mʋ̀ joŋə lìù tɩan jɩɩn wa.
3 Ba-Yígúrə́-Jə-Tiu ba cɩ́gá tíú yá, ʋ pɩn niən janɩ wá,
yá ʋ yàá vwəŋə wʋlʋnyiən mʋ̀, won tə ʋ nə pɩ̀à.
4 Jɩɩn tə nə tʋŋa də yasurə, kəni zʋrɩ,
yá jɩɩn tə nə tʋŋa də wʋdɩʋ, pɩn jɩjə.
5 Lìù tə nə pɩ̀à wodiu ʋ túŋə́ fʋʋ máŋá wa, yɩ wʋbʋnyiən,
yá lìù tə nə dwɛ̀ woceri máŋá wa, yɩ cavɩkənu.
6 Yɩɩ fwa zəni cɩ́gá tíú yɩra,
yá wʋlʋnyɩna mʋ̀ yàá səgə jara, ba nii sʋ̀ràn wa.
7 Ba nə lìí cɩ́gá tíú yoo, kʋ yàá fwa zəni lɩ̀à yɩra,
yá wʋlʋnyiən mʋ̀ yɩrɩ yàá jɛ́n mɩ́ámɩ́án.
8 Wʋbʋnyiən yàá sɛ̀, sə ba bɩrɩ wá,
yá lìù tə nə swɩ̀n ləyiri sʋ̀ràn, yɩ ʋ vələ jɩ́ʋ́n wa.
9 Lìù tə nə yɩ təgətəgə, ba ʋ naa mà,
yá lìù tə nə tʋŋa yogugwələn wá də́ cavɩra.
10 Lìù tə nə ŋwɩ̀n lɩ̀à də yɩ́á, kəni lɩ̀à càn wa,
yá lìù tə nə swɩ̀n ləyiri sʋ̀ràn, yɩ ʋ vələ jɩ́ʋ́n waa.
11 Cɩ́gá tíú nii sʋ̀ràn yɩ ndə nabuliyii nə, kʋ nə pɩn mɩɩ,
yá wʋlʋnyɩna mʋ̀ yàá səgə jara, ba nii sʋ̀ràn wa.
12 Dʋŋɩ yàá zɩ̀n jara,
yá sonu mʋ̀ pwí lwanɩ yiri mama yuu nə.
13 Wʋbʋŋa wulə pubʋnyiən nii wa,
yá dàʋ̀ yɩ kʋ wulə ləbibənu dəkoru yɩrɩ.
14 Wʋbʋnyɩna jə yənu, ba ma cɩ̀ ba tɩ̀àn nə,
yá ləbibənu mʋ̀ nii wá cʋ̀gʋ̀ wá.
15 Jɩjə tíú jɩjə cɩ̀ ʋ nə, ndə tɩʋ nə, ba nə lwə̀, ba kɩkarɩ də biritaŋʋ,
yá yinəgə nə gwɩ lalaŋa mʋ̀.
16 Cɩ́gá tíú tʋtʋŋɩ ŋwɩ́rán pɩn mɩɩ,
yá wʋlʋnyiən mʋ̀ gɩgɩrɩ wiən yɩ ʋ ma tʋŋa cʋna.
17 Lìù tə nə joŋə kwìə̀, tì mɩɩ cwəŋə,
yá lìù tə nə vɩ, sə ba caga ʋ nii nə, yàá jɛ́n.
18 Lìù tə nə səgə ʋ dʋŋɩ yɩ níə́ bələ tíú,
yá lìù tə nə twá lá ʋ də́ tɩjaŋa, yəri ʋ yáá.
19 Sʋgʋ zənzən pɩn lìù tʋŋa lwanɩ,
yá lìù tə nə wàá ʋ nii yɩ pubʋnyiən.
20 Cɩ́gá tíú nii sʋgʋ yɩ ndə wárʋ́ nə, kʋ nə ba durən jə,
yá wʋlʋnyɩna mʋ̀ pubʋŋa ba funə jə.
21 Cɩ́gá tíú nii sʋgʋ jə sáŋʋ́ kʋ pa lɩ̀à kapʋpʋ nə,
yá ləbibənən mʋ̀ tɩ, ba nə yəri ba yáá yɩrɩ.
22 Ba-Yígúrə́-Jə-Tiu nə yàá fwa zəni lìù yɩra, ʋ pa ʋ jì jɩjə tíú.
Ləzwənə tətə kajaŋa wàrɩ̀ won mama lá, tə súríb.
23 Culən nəfaran ka cʋ̀gʋ̀
yɩ ndə bwana nə, kʋ pa ləyiru nə,
ndə ka tʋn wʋbʋŋa yìə̀n nə yɩ ndə
bwana nə, kʋ pa pubʋnyiən nə nətʋ.
24 Yoo tə wʋlʋnyiən nə dəri, kʋ mʋ̀ nə yàá yí wá,
yá kʋ tə cɩ́gá tɩ̀án nə pɩ̀à, Yɩɩ yàá pa kʋ ba.
25 Yojanʋ nə nyɩ́n kʋ zàn ndə kùlì nə, kʋ yàá cʋ̀gʋ̀ wʋlʋnyiən,
yá cɩ́gá tíú mʋ̀ dəkuu yàá zʋ tɩa zəni.
26 Nətʋ nanyʋna nə yɩ tə pa yelə nə,
də nətʋ ŋwɩn nə yɩ tə pa yɩ́á nə,
mə nətʋ nə yayɩnyiən də yɩ,
ʋ pa ʋ lɩ̀à tə nə, ba nə tʋŋa wá.
27 Ka dəri Ba-Yígúrə́-Jə Tiu fən súrí ləzwənə dɩan lʋʋ wa,
yá wʋlʋnyiən mʋ̀ bɩna ba gàlɩ̀ tə cé.
28 Won tə cɩ́gá tɩ̀án nə danɩ pɩn ba pupwən,
yá wʋlʋnyɩna mʋ̀ yàá kwɩ̀n ba yala nə.
29 Ba-Yígúrə́-Jə-Tiu cwəŋə tə yɩ dɩ̀àn dəkuu bwálɩ́,
kʋ pa lìù tə nə, ʋ nə yɩ təgətəgə,
yá ka cʋ̀gà yolwafwana mʋ̀.
30 Yoo bá vuvugu cɩ́gá tíú mʋ̀, abada,
yá wʋlʋnyɩna mʋ̀ bá ja dəkuu bwálɩ́.
31 Wʋbʋŋa wulə cɩ́gá tíú nii sʋgʋ wa, yá ba wá goŋə kʋ̀nkʋ̀nʋ mʋ̀ nəndəli.
32 Pubwanʋ sʋ̀ràn nə naŋa cɩ́gá tíú nii wa,
yá wʋlʋnyɩna mʋ̀ yɩ sʋlwana nə naŋa ba nii wa.