11
1 Ba-Yígúrə́-Jə-Tiu culi ŋwɩ̀rɩ̀ səkəri,yá ʋ swə səkəri bɩ̀á tə mʋ̀, tə dun nə mɛ.
2 Fwìə́ ja yigwənə kʋ twi,
yá wʋbʋŋa wulə də lìù tə, ʋ nə cwí ʋ tɩ̀àn tɩa.
3 Ka ya təgətəgə nə kəni cɩ́gá tɩ̀án cwəŋə nə,
yá pwìí bələ tɩ̀án yogugwələn tə nə cʋ̀gà ba.
4 Jɩjə wàrɩ̀ lìù ka joŋə Yɩɩ lɩŋa dɩɩn nə,
yá cɩ́gá cwəŋə mʋ̀ joŋə lìù tɩan jɩɩn wa.
5 Lìù nə yɩ təgətəgə, ʋ cɩ́gá tə yàá pa ʋ cwəŋə ya mənəmənə,
yá wʋlʋnyiən mʋ̀ wʋlʋŋʋ tə yàá dɩ wá.
6 Lɩ̀à tə nə yɩ cɩ́gá tɩ̀án Yɩɩ yáá con, ba cɩ́gá tə yàá jon ba,
yá pwìí bələ tɩ̀án mʋ̀ wʋliru tə yàá ja ba, ndə nyalɩ nə.
7 Wʋlʋnyiən nə tɩga, ʋ yala mama yàá nyʋn lá,
yá ʋ jɩjə tə, ʋ yà nə jələ ka yuu wa, yàá jɛ́n.
8 Ba yàá jon cɩ́gá tíú pucʋnɩ jɩɩn wa,
yá tə dàń yàá pìí tə tʋ wʋlʋnyiən yuu wa.
9 Ləzwənlwan yàá ja ʋ nii sʋgʋ, ʋ ma cʋ̀gʋ̀ ʋ jəndon,
yá cɩ́gá tɩ̀án mʋ̀ yàá ja yənu, ba ma jon ba tɩ̀àn.
10 Cɩ́gá tɩ̀án yìə̀n nə kwɛn, tɩʋ tə mama yàá jwɛ,
yá wʋlʋnyɩna nə tɩga, kʋ yàá mà pupwən cə̀rí.
11 Cɩ́gá tɩ̀án tʋtʋnzəŋə pɩn tɩʋ vəli yáá,
yá wʋlʋnyɩna mʋ̀ nii sʋ̀ràn cʋ̀gà kʋ.
12 Lìù tə nə yəri ʋ yáá nə gònì ʋ jəndon,
yá lìù tə nə jə pubʋŋa yàá pú ʋ nii.
13 Lìù tə nə twá lá ʋ də́ tɩjaŋa, yàá ja dìə̀ yìə̀n, ʋ nan kàrá wa,
yá lìù tə nə yɩ pùə́ nədʋ tíú yàá səgə tə.
14 Lalʋʋ nə ba yáá tíú jə, kʋ yàá tʋ,
yá sáŋʋ́ wulə kwenə kapʋpʋ titəŋi wa.
15 Lìù nə zɩgɩ vee jɩŋɩ jɩrɩmʋ, ʋ ken ʋ tɩ̀àn yoo wa,
yá lìù tə nə vɩ sə ʋ tʋn kʋ, jə sìə́.
16 Ba bwɩ kan tə nə, ʋ nə jə pubwanʋ,
yá bara tə nə tʋŋa də dɩ̀àn yàá na jɩjə.
17 Ləzwənzəŋu yàá tʋn zəni, ʋ tún ʋ tɩ̀àn yɩrɩ,
yá wʋcanyiən mʋ̀ kəni càn ʋ tətə nə.
18 Wʋlʋnyiən tʋtʋŋɩ ŋwɩ́rán yɩ ndə vʋʋ nə,
yá lìù tə nə tʋŋa də cɩ́gá, ŋwɩ́rán jə dun.
19 Cɩ́gá, lìù tə nə kúrí ʋ tì, sə ʋ twá cɩ́gá nə, wá na mɩɩ,
yá lìù tə nə dɩŋɩ lwanɩ kwa, yɩ ʋ vələ tɩan wa.
20 Ba-Yígúrə́-Jə-Tiu culi lɩ̀à tə nə jə yogugwələn ba bɩcanɩ wa,
yá ʋ swə lɩ̀à tə mʋ̀, ba nə yɩ təgətəgə.
21 Kʋ ba tʋ́tʋ̀ná jə, wʋlʋnyiən bá jɛ́n càn yáá nə,
yá ba wá jon cɩ́gá tɩ̀án mʋ̀ də ba dwíí, ba dʋgʋ.
22 Kabwaŋʋ nə yɩ ləyigə,
ʋ yɩ ndə sɩ́án kwanɩ nə, ba nə ken too mɩɩ nə.
23 Kʋ tə cɩ́gá tɩ̀án nə pɩ̀à, yɩ zəni cɩcɩ,
yá kʋ tə wʋlʋnyɩna mʋ̀ nə wàá kʋ yala ba janɩ, yɩ lɩŋa.
24 Lìù nə pɩn zìlə́ wiən lɩ̀à nə, ʋ jɩjə yàá kwɛn ka súrí,
yá canyiən mʋ̀ yɩ ʋ kwɛn ʋ kəni zʋrɩ ʋ tɩ̀àn nə.
25 Jɩjə yàá bʋ́rɩ́ lìù tə nə tʋŋa zəni lɩ̀à yɩra.
Lìù tə nə kwɛn lɩ̀à yìə̀n, ʋ də yìə̀n yàá kwɛn.
26 Ba zɩrɩ ba kəni bayolu tə nə, ʋ nə cɩ̀gà ʋ mɩna nə ʋ tún,
yá zəni wulə lìù tə yuu wa, ʋ nə yoli ʋ mɩna.
27 Lìù tə nə fwa zəni yàá na pubwanʋ lɩ̀à yáá con,
yá lìù tə nə swə ka tʋn lwanɩ, lwanɩ yàá yí wá.
28 Lìù tə nə jələ ʋ jɩjə yuu wa, wá tʋ,
yá cɩ́gá tɩ̀án mʋ̀ wá na ba tɩ̀àn, ndə tɩ̀ʋ́ nə twə̀ vʋran.
29 Lìù tə ʋ nə gugurə ʋ dìə̀, vʋʋ nə wá ya ʋ tori,
yá ləbibənu wá ya wʋbʋnyiən yoŋu.
30 Cɩ́gá tíú tʋtʋnɛɛ yɩ ndə tɩ̀ʋ́ nə, kʋ lənə nə pɩn mɩɩ,
yá wʋbʋnyiən də vaŋa lɩ̀à.
31 Cɩ́gá tíú taa nə jə ŋwɩ́rán tɩa yuu wa,
sə wʋlʋnyiən də cʋna lìù nə nì!