12
1 Lìù tə nə sɛ̀ ʋ pɩn ba bɩrɩ wá, swə yənu,yá lìù tə nə culi, sə ba caga ʋ nii nə, yɩ ləyiru.
2 Ləzwənzəŋu yàá na yuywaŋʋ Ba-Yígúrə́-Jə-Tiu yáá con,
yá Ba-Yígúrə́-Jə-Tiu yàá pa bʋra ja pubʋnkʋkwɩnan tíú.
3 Lìù wàrɩ̀ wʋlʋŋʋ ʋ tʋŋa, ʋ ma janɩ dɩ̀àn,
yá cɩ́gá tɩ̀án mʋ̀ jə dɩ̀àn, ndə tɩ̀ʋ́ ŋʋnan nə zʋa tɩa nətʋ.
4 Kan tə ʋ yʋa nə ziən, yɩ ndə dun yupuu nə, ʋ pa ʋ barɩ nə,
yá wà tə nə yɩ cavɩkənu, yɩ ndə yayɩgʋ nə, ʋ barɩ kurən wa.
5 Cɩ́gá tɩ̀án pubʋŋa yɩ ka tʋn yoo tə nə yɩ mənəmənə,
yá wʋlʋnyɩna mʋ̀ yɩ gɩgɩra coŋi yoo nə ba bʋŋa.
6 Wʋlʋnyɩna sʋ̀ràn yɩ ndə vɩnvan nə, kʋ nə gwɩ,
yá cɩ́gá tɩ̀án mʋ̀ nii sʋ̀ràn yàá lɩ ba yoo wa.
7 Wʋlʋnyɩna ba twɩ, ba ga pìí ba zaŋa,
yá cɩ́gá tɩ̀án mʋ̀ dìə̀ jə dɩ̀àn, máŋá mama.
8 Ba yàá bʋ lìù nə, ʋ pubʋnzəŋu yɩrɩ,
yá ba yàá fʋfʋlɩ lìù tə mʋ̀, ʋ nə jə pubʋnkʋkwɩnan, ʋ bɩcan wa.
9 Ba nə mun lìù, ʋ tʋtʋnʋ nə yɩ nədʋ yɩrɩ,
kʋ kʋ́kwà ʋ nə zɩ̀n ʋ tɩ̀àn, ʋ ga ba wodiu jə ʋ də́.
10 Cɩ́gá tíú yàá ywàŋá ʋ vàná yuu,
yá wʋlʋnyiən mʋ̀ waa lɩŋa.
11 Lìù nə vàrɩ̀ ʋ kárá, ʋ yàá na wodiu zənzən,
yá lìù tə nə pwí yoywanan kwa, ba pubʋŋa jə.
12 Lakʋkwɩnan jɩjə wʋgwɩʋ yàá jə wʋlʋnyɩna,
yá cɩ́gá tɩ̀án tʋtʋŋɩ ŋwɩ́rán nə jə funə.
13 Wʋlʋnyiən sʋkʋkwɩnan yàá pìí tə ja ʋ tətə,
yá cɩ́gá tíú mʋ̀ yàá jɛ́n yojanʋ yáá nə.
14 Lìù mama nii sʋgʋ nə yàá kwɛn ʋ tətə,
ndə lìù mama nə yàá na ʋ tʋtʋŋɩ ŋwɩ́rán nətʋ.
15 Ləbibənu mʋ̀ yàá bʋŋa də ʋ tʋtʋnɛɛ ziən,
yá lìù tə mʋ̀ nə joŋə kwìə̀ yɩ wʋbʋnyiən.
16 Ləbibənu lɩŋa nə zàn, ba yàá lwarɩ kʋ, kʋ dəkuu tə yuu wa,
yá lìù tə nə yə̀ə́ swɩan yàá səgə ʋ lɩŋa.
17 Lìù tə nə swɩ̀n cɩ́gá yàá pa cɩ́gá də́ dɩ̀àn,
yá kʋ̀nkʋ̀n dansɩa lìù mʋ̀ yàá pa gɩgɩra də́ dɩ̀àn.
18 Lìù tə nə swɩ̀n yá ʋ ba bʋŋa, ʋ sʋ̀ràn yàá caŋa lɩ̀à, ndə kwatara sɩ̀ʋ́ nə,
yá wʋbʋnyɩna mʋ̀ sʋ̀ràn pɩn yazurə.
19 Sʋgʋ tə nə yɩ cɩ́gá jə funə, máŋá mama,
yá kʋ̀nkʋ̀n mʋ̀ dánʋ́ yɩ ndə yii nə púə́ kʋ súrí.
20 Gɩgɩra yìə̀n nə súə́ lɩ̀à tə nə bʋŋa lwanɩ bɩcanɩ,
yá ba tə nə kəni sìə́ lɩ̀à pwə́rə́ wa, yàá na pupwən kʋ wa.
21 Yojanʋ nədʋ tətə bá yí cɩ́gá tíú,
yá yolwana kapʋpʋ wá yí wʋlʋnyɩna mʋ̀.
22 Ba-Yígúrə́-Jə-Tiu culi lɩ̀à tə nə kʋ̀nɩ̀ kʋ̀nkʋ̀n,
yá ʋ swə lɩ̀à tə nə twá cɩ́gá nə, ndə kʋ nə mɛ nətʋ.
23 Lìù tə nə yə̀ə́ swɩan yàá səgə ʋ yənu,
yá ləbibənən mʋ̀ yàá bɩrɩ ba ləbibəni.
24 Dɩ̀àn wulə lɩ̀à tə nə tʋŋa zənzən jɩɩn wa,
yá lìù tə mʋ̀, ʋ nə tʋŋa də yasurə wá jì yoŋu.
25 Twara nə wulə lìù bɩcan wa, kʋ yàá kə wá pucʋnɩ wa,
yá sʋ̀ywáŋʋ́ mʋ̀ yàá poli ʋ pùə́.
26 Cɩ́gá tíú yàá bɩrɩ cwəŋə ʋ twadon nə,
yá wʋlʋnyɩna mʋ̀ cwəŋə yàá dʋgʋ ba.
27 Twanbɛɛ tə nə twanɩ də yasurə ba nàŋʋ́ nɩ ʋ sàŋà,
yá tʋtʋŋɩ jə funə zənzən, kʋ pa yawalanyiən mʋ̀ nə.
28 Mɩɩ wulə cɩ́gá cwəŋə wa,
yá cwəŋə təntə ba tɩan bwálɩ́ nə vəli.