13
1 Bìú tə nə yɩ wʋbʋnyiən cʋga ʋ nyɩna kwìə̀,yá bɩyɩrɩ də́rú mʋ̀ yəri ba caga ʋ nii nə.
2 Lìù mama nii sʋgʋ nə yàá pa ʋ də́ kʋ tə nə ywán,
yá pwìí bələ tɩ̀án yɩ wʋlʋŋʋ fɩra nə jə ba.
3 Lìù tə nə janɩ ʋ nii, yɩ ʋ mɩɩ tə yuu nə ʋ ywàŋá,
yá lìù tə nə swɩ̀n vɛɛ mʋ̀ yàá cʋ̀gʋ̀ ʋ tɩ̀àn.
4 Yayɩnyiən fɩra yìə̀n nii ba swí,
yá wiən yàá bʋ́rɩ́ lìù tə mʋ̀, ʋ nə tʋŋa zənzən.
5 Cɩ́gá tíú culi kʋ̀nkʋ̀n,
yá wʋlʋnyiən mʋ̀ yàá twɩn lɩ̀à, ʋ kəni ba cavɩra.
6 Cɩ́gá cwəŋə cɩ̀ lìù tə nə, ʋ nə yɩ təgətəgə,
yá wʋlʋŋʋ mʋ̀ yàá cʋ̀gʋ̀ yolwafwanʋ.
7 Lɩ̀à duən yàá fwa ndə ba yɩ jɩjə tɩ̀án, ba ga ba won mama jə.
Ba duən də yàá fwa ndə ba yɩ zʋra, ba ga yɩ jɩjə nəfarʋ tɩ̀án.
8 Jɩjə yɩ ka tíú mɩɩ kwənə,
yá lìù mama ba zʋrʋ mʋ̀ con taŋa.
9 Cɩ́gá tɩ̀án yɩ ndə poni nə, kʋ nə pɩn pupwən,
yá wʋlʋnyiən mʋ̀ yɩ ndə cànʋ́ nə, kʋ nə də̀ŋì.
10 Fwìə́ nə yàá ja tʋ́tʋ̀ná ka bà,
yá lɩ̀à tə nə joŋə kwìə̀ mʋ̀ jə wʋbʋŋa.
11 Lìù nə nɩ jɩjə lala, ka yàá zwɛ̀ lala.
Yá lìù tə, ʋ nə túŋə́ jɩjə mancɩn mancɩn, ka yàá pùlì.
12 Yala nə dán zənzən, tə yàá kə pucʋnɩ,
yá lìù fɩra yoo nə jìgə̀, kʋ yɩ ndə tɩ̀ʋ́ nə, kʋ lənə nə pɩn mɩɩ.
13 Lìù tə nə ba kwìə̀ joŋə wá swɩ̀n də, ʋ yà nə yə̀ə́!
Yá lìù tə nə sɛ̀ nii wá na kʋ ŋwɩ́rán.
14 Wʋbʋnyiən kàrà yɩ ndə nabuliyii nə, kʋ nə pɩn mɩɩ.
Ka pɩn lɩ̀à cɩ̀ ba tɩ̀àn nə, də kʋ tə nə wá kə ba tɩan jɩɩn wa.
15 Pubʋnzəŋu tíú yoo ba cʋ̀gà,
yá pwìí bələ tɩ̀án mʋ̀ yoo ba kwɛn də mama.
16 Swɩan tíú mama yàá dí yáá ʋ bʋ́n, ʋ dàń ga zɩgɩ lá, ʋ tʋn.
Yá ləbibənu mʋ̀ yàá bɩrɩ ʋ ləbibəni, bwálɩ́ mama wa.
17 Tʋntʋnʋ tə nə yɩ wʋlʋnyiən ba bɩcan zuri,
yá sʋfa tə nə yɩ pùə́ nədʋ tíú zuri yɩra.
18 Zʋrɩ də fʋfʋlʋ nə wá yí lìù tə nə ba kwìə̀ joŋə,
yá lìù tə nə sɛ̀, sə ba caga ʋ nii nə, wá na dun.
19 Lìù fɩra yoo nii nə súə́, kʋ yàá pa wá pupwən,
yá ləbibənən mʋ̀ culu nə yɩ, sə ba lɩ ba tɩ̀àn yolwan wa.
20 Lìù nə vəli də wʋbʋnyɩna, ʋ də yàá jì wʋbʋnyiən,
yá càn wá yí lìù tə nə vəli də ləbibənən .
21 Yobɩbɩlʋ púə́ yolwafwana kwa,
yá ywánɩ́ nə yɩ cɩ́gá tɩ̀án mʋ̀ ŋwɩ́rán.
22 Ləzwənzəŋu yàá cɩ̀ ʋ jɩjə, ʋ tún ʋ nɩ̀án nə,
yá yolwafwanʋ mʋ̀ wiən yɩ cɩ́gá tíú nə wá də́.
23 Zʋra kárɩ́ wiən ləni zənzən,
yá wʋlʋnyɩna yàá cʋ̀gʋ̀ tə.
24 Lìù tə nə ba kafɩʋ zɩ̀n ʋ bìú yuu wa, ba wá swə.
Lìù tə nə swə ʋ bìú, yàá mà wá, ʋ kə cwəŋə wa.
25 Cɩ́gá tíú yàá də́ ʋ sú ʋ fɩra,
yá wʋlʋnyɩna mʋ̀ pùə́ yàá kwi niən.