14
1 Kan tə nə yɩ wʋbʋnyiən yàá lwè ʋ dìə̀,yá wà tə nə yɩ ləbibənu mʋ̀ yàá cʋ̀gʋ̀ ʋ dìə̀, ʋ tɩ̀àn nə.
2 Lìù tə nə twá cɩ́gá nə, dəri Ba-Yígúrə́-Jə-Tiu fən,
yá lìù tə nə tʋŋa yogugwələn yɩ ʋ fʋfʋlɩ wá.
3 Dàʋ̀ wulə ləbibənu nii sʋgʋ wa, kʋ mà wá kʋ lɩ fwìə́ wa,
yá wʋbʋnyɩna mʋ̀ nii sʋgʋ cɩ̀ ba nə.
4 Navalan nə tə̀lə́, pulu ba mɩna jə.
Naʋ dɩ̀àn nə pɩn nywarɩ kapʋpʋ.
5 Dansɩa lìù tə nə twá cɩ́gá nə, ndə kʋ nə mɛ nətʋ, ba kʋ̀nkʋ̀n kʋ̀nɩ̀.
Yá lìù tə nə wà dansɩa yɩn mʋ̀ yàá kʋ̀nɩ̀ kʋ̀nkʋ̀n.
6 Bɩyɩrɩ də́rú də wàá wʋbʋŋa ʋ pɩ̀à ʋ nɩ naaa? Abada!
Yá yənu yɩ mwálɩ́ won, kʋ pa wʋbʋnyiən mʋ̀ nə.
7 Pa n də ləbibənu ya ŋʋ́nɩ́ də duən,
n nə wàrɩ̀ yənu sʋgʋ n nɩ ʋ con yɩrɩ.
8 Swɩan tíú wʋbʋŋa pɩn ʋ cɩ̀ ʋ tɩ̀àn nə,
yá ləbibənən ləyiri yìə̀n tə nə dʋga ba.
9 Ləbibənən yáá tə̀lə́ də lwɩa,
yá cɩ́gá tɩ̀án mʋ̀ jə yuywaŋʋ, Yɩɩ yáá con.
10 Bɩcan nə yə̀ə́ pucʋnɩ tə nə wulə kʋ wa,
yá lìù mama wàrɩ̀ ʋ don pupwən wa, ʋ twá ʋ yanɩ.
11 Ba wá cʋ̀gʋ̀ wʋlʋnyɩna dìə̀.
Yá cɩ́gá tɩ̀án tə mʋ̀ gansili wá wàlɩ̀ kʋ súrí.
12 Lìù yàá bʋŋa də ʋ tʋtʋnɛɛ ziən,
yá kʋ yígúrə́ wa, kʋ yɩ tɩan.
13 Lìù wàá ʋ mʋŋa, ʋ ga də́ càn ʋ waa con,
yá pupwən də wàá pucʋnɩ ka jì.
14 Ləzwənkʋkwɩʋ wá na ʋ tʋtʋnɛɛ ŋwɩ́rán,
yá ləzwənzəŋu wá nì ywánɩ́ ʋ doni.
15 Pubʋnkukuə tíú yàá jon sʋ̀ràn tə mama, ba nə swɩ̀n ʋ con,
yá swɩan tíú mʋ̀ yàá dí yáá ʋ bʋ́n tə yuu wa zəni.
16 Wʋbʋnyiən dəri yolwan fən, kʋ pa ʋ cɩ̀ kʋ yáá nə,
yá ləbibənu mʋ̀ yàá fan ʋ tʋ yoo wa, də babarɩ.
17 Lìù tə, ʋ lɩŋa nə ba dánɩ́ tə zaŋa, yàá tʋŋa ləyiri yìə̀n,
yá lìù tə nə jə pubʋnkʋkwɩnan, yàá pa ba dʋn wá.
18 Pubʋnkukuə tɩ̀án tori yɩ bibəni,
yá yənu yɩ ndə dun yupuu nə, kʋ pa lɩ̀à tə nə cɩ̀ ba tɩ̀àn nə.
19 Ləzwənkʋkwɩnan wá cú ba tɩ̀àn tɩa, ləzwənzəŋə yáá con,
yá wʋlʋnyɩna də wá jə̀ń cɩ́gá tɩ̀án mimien nə.
20 Zʋrʋ jənduən də tətə ba wá swə,
yá jɩjə tíú mʋ̀ dabara yɩ kapʋpʋ.
21 Lìù tə ʋ nə fʋfʋlɩ ʋ jəndon, tʋn cʋna Yɩɩ yáá con,
yá pupwən lìù nə yɩ lìù tə, ʋ nə dəri lalaŋa yinəgə.
22 Lɩ̀à tə ba nə bʋŋa lwanɩ yoo yàá jɛ́n,
yá lɩ̀à tə nə bʋŋa zəni yoo yàá na wʋywaŋʋ* də cɩ́gá.
23 Tʋtʋŋɩ mama wa jə nywarɩ,
yá sʋ̀ràn cɩcɩ mʋ̀ kəni lìù zʋrɩ wa.
24 Wʋbʋnyɩna dun yupuu yɩ ba jɩjə,
yá ləbibənən mʋ̀ ləyiri yìə̀n tə yɩ ləyiri máŋá mama.
25 Dansɩa lìù tə nə swɩ̀n cɩ́gá joŋə lɩ̀à mɩɩ, ʋ kəni lʋʋ wa,
yá kʋ̀nkʋ̀nʋ mʋ̀ pɩn lɩ̀à dwɛ́.
26 Lìù nə dəri Ba-Yígúrə́-Jə-Tiu fən, yoo mama ba wá wʋwalɩ,
kʋ tíú bɩ̀á də ga wá kwálɩ́ ba yuu, Ba-Yígúrə́-Jə-Tiu con.
27 Ka dəri Ba-Yígúrə́-Jə-Tiu fən yɩ ndə nabuliyii nə, kʋ nə pɩn mɩɩ.
Kʋ pɩn lɩ̀à cɩ̀ ba tɩ̀àn nə, də kʋ tə nə wá kə ba tɩan jɩɩn wa.
28 Tɩʋ ləzwənbɩa nə dáá, kʋ yɩ pɩ̀ʋ́ dun,
yá ba nə muŋə, kʋ yáá tíú yuu tígə́ jijəru.
29 Lìù tə, ʋ lɩŋa nə ba lala zaŋa, yɩ pubʋŋa nəfarʋ tíú,
yá wà tə, ʋ lɩŋa nə ba dánɩ́ tə zaŋa, yàá bɩrɩ ʋ ləyiri.
30 Bɩcan sìə́ pɩn yazurə yatana nə,
yá wʋgwɩʋ mʋ̀ yɩ ndə kurən yayɩgʋ nə.
31 Lìù nə fɩfɩn labwanʋ, kʋ yɩ Yɩɩ tə, ʋ nə fwa wá nə, ʋ fʋfʋlɩ.
Yá lìù tə nə dəri zʋrʋ yinəgə, pɩn dun Yɩɩ nə.
32 Wʋlʋnyiən yolwana tə nə yàá cʋ̀gʋ̀ wá,
yá cɩ́gá tíú mʋ̀ jə yala, tɩan də tətə yáá con.
33 Wʋbʋŋa wulə lìù tə nə jə pubʋŋa bɩcan wa,
yá ləbibənən də tətə titəŋi wa, ba yàá lwarɩ ka.
34 Cɩ́gá cwəŋə zɩ̀n lʋʋ nii yuu yɩɩ nə,
yá cʋna mʋ̀ yɩ kʋ ləzwənbɩa cavɩra.
35 Tʋtʋnʋ tə nə jə pubʋnzəŋu, yàá na yuywaŋʋ pɩ̀ʋ́ yáá con,
yá ʋ lɩŋa yàá zàn lìù tə mʋ̀ yuu wa, ʋ nə kəni cavɩra ʋ nə.