15
1 Lìù nə le də sonu, kʋ yàá pa lɩŋa tʋ,yá nicɔɔ mʋ̀ zɩ̀n tə.
2 Wʋbʋnyɩna sʋ̀ràn pɩn yənu fɩra janɩ lɩ̀à,
yá ləyiri sʋ̀ràn nə naŋa ləbibənən mʋ̀ nii wa.
3 Ba-Yígúrə́-Jə-Tiu yɩ́á wulə bwálɩ́ mama nə,
ʋ ywàŋá wʋlʋnyɩna, də ləzwənzəŋə.
4 Sʋgʋ tə nə daŋa jɩɩn yɩ ndə tɩ̀ʋ́ nə, kʋ lənə nə pɩn mɩɩ,
yá sʋlwan mʋ̀ cʋ̀gà pùə́.
5 Ləbibənu yáá tə̀lə́ də ʋ nyɩna kwìə̀,
yá lìù tə nə sɛ̀, sə ba caga ʋ nii nə, yə̀ə́ swɩan.
6 Jɩjə nəfarʋ wulə cɩ́gá tíú dìə̀ wa,
yá wʋlʋnyiən mʋ̀ gɩgɩrɩ wiən tə kəni càn ʋ nə.
7 Wʋbʋnyɩna sʋ̀ràn pɩn yənu,
yá ləbibənən mʋ̀ ba waa jə.
8 Ba-Yígúrə́-Jə-Tiu culi wʋlʋnyɩna joŋi,
yá ʋ yàá jon cɩ́gá tɩ̀án mʋ̀ yɩjʋnɩ.
9 Ba-Yígúrə́-Jə-Tiu culi wʋlʋnyɩna tʋtʋnɛɛ,
yá ʋ swə lìù tə nə tì cɩ́gá cwəŋə.
10 Càn nəfarʋ wá yí lìù tə nə dʋgʋ cɩ́gá cwəŋə,
yá lìù tə nə culi, sə ba caga ʋ nii nə, wá tɩ.
11 Ba-Yígúrə́-Jə-Tiu dàń taa nə yə̀ə́ kʋ tə nə wulə ciru*, də tɩga bwálɩ́ nə,
mə kʋ tə nə wulə ləzoni bɩcanɩ wa!
12 Bɩyɩrɩ də́rú ba swə, sə ba caga ʋ nii nə,
ʋ ba wʋbʋnyɩna con vəli.
13 Pupwən poli yáá,
pucʋnɩ ga pɩn yaŋwɩa.
14 Pubʋŋa tíú bɩcan yàá pɩ̀à yənu,
yá ləbibənu mʋ̀ yɩ ləyiri sʋ̀ràn nə súə́ ʋ nii.
15 Yinənyiən dɩan tə mama lwara,
yá pupwən lìù mʋ̀ con, dɩɩn mama yɩ cànà.
16 Lìù nə jə mancɩn, ʋ ga dəri Ba-Yígúrə́-Jə-Tiu fən,
kʋ kʋ́kwà ʋ nə jə zənzən, yá ʋ wulə twara wa.
17 Ba nə pɩn dwavʋran dəŋə lìù nə, də sonu,
kʋ kʋ́kwà ba nə pɩn wá naʋ nàŋʋ́ kʋ nə jə nʋga, də dʋŋɩ.
18 Lɩŋa tíú yàá pa jara kwɛn tə súrí,
yá lìù tə, ʋ lɩŋa nə ba zaŋa lala, pɩn tə zwɛ̀.
19 Yayɩnyiən cwəŋə yɩ ndə casʋran dabɔɔ nə,
yá cɩ́gá tíú mʋ̀ cwəŋə yàá kwɛn.
20 Bìú tə nə yɩ wʋbʋnyiən poli ʋ nyɩna pùə́,
yá ləbibənu mʋ̀ gònì ʋ nuu.
21 Ləyiri yɩ ləbibənu fɩra yoo,
yá pubʋŋa tíú mʋ̀ vəli mənəmənə.
22 Lìù yìə̀n yàá cʋ̀gʋ̀, ʋ nə wà kwìə̀ pɩ̀à yɩrɩ,
yá kwenə kapʋpʋ pɩn yìə̀n kwɛn.
23 Lìù nə le zəni, kʋ yàá jə pupwən,
yá ba nə swɩ̀n sʋgʋ, kʋ swɩʋn máŋá wa, kʋ yàá ziən.
24 Pubʋnzəŋu tíú cwəŋə yɩ ka ja wá ka dɩ̀ mɩɩ wa, yɩɩ nə,
yá kʋ nətʋ wá pa, ʋ jɛ́n ciru vəlu yáá nə, tɩa də̀ń.
25 Ba-Yígúrə́-Jə-Tiu cʋ̀gà fwìə́ tíú dìə̀,
yá ʋ ywàŋá kadənu bwálɩ́ yuu nə.
26 Ba-Yígúrə́-Jə-Tiu culi pubʋnkʋkwɩnan,
yá sʋzəŋə mʋ̀ wa ba yolwan jə.
27 Lìù tə nə swə gɩgɩrɩ wiən yàá gugurə ʋ dìə̀,
yá lìù tə nə culi vwiŋə wá na mɩɩ.
28 Cɩ́gá tíú yàá dí yáá ʋ bʋ́n ʋ bɩcan wa, ʋ ga zɩgɩ lá ʋ le,
yá wʋlʋnyɩna mʋ̀ nii yàá bɩbarɩ kʋ swɩ̀n sʋkʋkwɩnan.
29 Ba-Yígúrə́-Jə-Tiu ŋʋ́ná də wʋlʋnyɩna,
yá ʋ cʋga cɩ́gá tɩ̀án mʋ̀ yɩjʋnɩ.
30 Pupwən yiywaŋa poli bɩcan,
yá sʋywáŋʋ́ daŋa jɩɩn.
31 Lìù tə nə cʋga sʋ̀ràn tə nə pɩn mɩɩ,
wá jə̀ń wʋbʋnyɩna titəŋi wa.
32 Lìù tə nə vɩ bɩra ba ʋ tɩ̀àn swə,
yá lìù tə nə sɛ̀, sə ba caga ʋ nii nə, yàá na pubʋŋa.
33 Ka dəri Ba-Yígúrə́-Jə-Tiu fən yɩ wʋbʋŋa kàrà,
yá lìù nə mun ʋ tɩ̀àn, ʋ yàá na dun.