Ba-Yígúrə́-Jə-Tiu nə tʋŋa nətʋ, ləzwənə mɩɩ wa
16
1 Ləzwənə yàá bʋ́n yìə̀n ʋ bɩcan wa,yá Ba-Yígúrə́-Jə-Tiu nə yàá pa tə jì.
2 Ləzwənə yàá bʋŋa də ʋ tʋtʋnɛɛ mama ziən,
yá Ba-Yígúrə́-Jə-Tiu nə yə̀ə́ kʋ tə nə wulə bɩcan wa.
3 Yá n yìə̀n Ba-Yígúrə́-Jə-Tiu jɩɩn wa,
yá n pubʋŋa yìə̀n nii wá sú.
4 Ba-Yígúrə́-Jə-Tiu yə̀ə́ won tə yɩrɩ ʋ nə fwa won mama.
Ʋ fwa wʋlʋnyiən də tətə, sə càn yí wá, yobɩbɩlʋ dɩɩn nə.
5 Ba-Yígúrə́-Jə-Tiu culi fwìə́ lìù mama,
yá ʋ wá kə ba càn wa.
6 Kʋ yàá twá wʋywaŋʋ* də cɩ́gá nə, yolwan ma kwɛn,
yá lìù nə dəri Ba-Yígúrə́-Jə-Tiu fən, ʋ yàá cɩ̀ ʋ tɩ̀àn nə də lwanɩ.
7 Ba-Yígúrə́-Jə-Tiu nə swə lìù tʋtʋnɛɛ,
ʋ yàá pa kʋ tíú də ʋ dʋŋa tətə pìí ba kə duən yuu.
8 Won nə yɩ mancɩn, kʋ ga twá də cɩ́gá cwəŋə,
kʋ kʋ́kwà gɩgɩrɩ wiən kapʋpʋ.
9 Ləzwənə yàá bʋ́n cwəŋə tə yoo, ʋ nə wá tì,
yá Ba-Yígúrə́-Jə-Tiu nə yàá pa ʋ nɛɛ ja dɩ̀àn.
Pɛ̀gá yuu wa zwansɩsarɩ
10 Yənu sʋ̀ràn wulə pɩ̀ʋ́ nii wa.
Ʋ nə bʋ̀rɩ̀ bʋra, ʋ nii ba dwɛ́.
11 Səkərə tə, də səkəri zwɩɩn tə nə twá cɩ́gá nə, yɩ Ba-Yígúrə́-Jə-Tiu nə tɩ.
Yá səkəri bɩ̀á tə mama yɩ ʋ mʋ̀ nə fwa.
12 Pɛ̀gá culi wʋlʋŋʋ fwaŋʋ.
Cɩ́gá cwəŋə nə pɩn pàrɩ̀ janɩ dɩ̀àn.
13 Nii tə nə swɩ̀n cɩ́gá sʋ̀ràn yàá na yuywaŋʋ, pɛ̀gá yáá con,
yá ba swə lìù tə, ʋ sʋ̀ràn nə yɩ mənəmənə.
14 Pɩ̀ʋ́ lɩŋa yɩ tɩan tʋntʋnʋ,
yá wʋbʋnyiən nə wàá ʋ pɩn tə twɩ.
15 Pɩ̀ʋ́ yáá nə poli, kʋ pɩn mɩɩ,
yá lìù nə nɩ yuywaŋʋ ʋ yáá con, kʋ yɩ ndə lʋan dwà nə.
Ləzoni nə mɛ, sə ba ya duən nə nətʋ
16 Lìù nə jə wʋbʋŋa, kʋ kʋ́kwà ʋ nə jə sɩ́án!
Lìù nə jə pubʋŋa, kʋ kʋ́kwà ʋ nə jə səbiu!
17 Lɩ̀à tə nə yɩ cɩ́gá tɩ̀án Yɩɩ yáá con, cɩ̀ ba tɩ̀àn nə də lwanɩ cwəŋə.
Lìù tə nə cɩ̀ ʋ tɩ̀àn nə, yɩ ʋ mɩɩ tə yuu ʋ ywàŋá.
18 Fwìə́ ja cʋna kʋ twi,
yá yɩrʋ də ja tʋrɩ kʋ twi.
19 Lìù nə mun ʋ tɩ̀àn, ʋ wulə də yinənyɩna,
kʋ kʋ́kwà ʋ də fwìə́ lɩ̀à nə tarɩ jɩjə wiən tə, ba nə vɩrɩ.
20 Lìù tə nə dwɩ zəni yoo yuu wa, yàá nì ywánɩ́,
yá pupwən lìù nə yɩ lìù tə, ʋ nə jələ Ba-Yígúrə́-Jə-Tiu yuu wa.
21 Wʋbʋŋa nə wulə lìù bɩcan wa, ba boŋə wá pubʋŋa tíú,
yá lìù nii nə yə̀ə́ sʋgʋ, kʋ yàá pa lɩ̀à sɛ̀ ʋ pubʋŋa.
22 Pubʋnzəŋu pɩn mɩdarɩ lɩ̀à tə nə, ba nə jə ka,
yá ləbibənən mʋ̀ ləyiri yìə̀n tə nə kəni ba càn wa.
23 Wʋbʋnyiən yàá dí yáá ʋ bʋ́n, ʋ dàń ga zɩgɩ lá ʋ swɩ̀n,
yá kʋ nətʋ yàá pa lɩ̀à sɛ̀ ʋ pubʋŋa.
24 Sʋywáŋá yɩ ndə tʋnyɩnɩ nə.
Tə ywán nii wa, tə ga pɩn yazurə.
25 Lìù yàá bʋŋa də ʋ tʋtʋnɛɛ ziən,
yá kʋ yígúrə́ wa, kʋ yɩ tɩan.
26 Tʋtʋnʋ pùə́ nə pɩn ʋ tʋŋa.
Cɩ́gá, niən nə kalɩ wá, tə pɩn ʋ tʋŋa.
27 Bakʋkwanyiən yàá tanɩ yolwan,
yá ʋ nii sʋgʋ yɩ ndə mənvwə nə.
28 Ləzwənkʋkwɩʋn yàá zɩ̀n jara,
yá tɩjanyiən cʋ̀gà dabarɩ.
29 Wʋlʋnyiən yàá gɩgarɩ ʋ twadon,
ʋ pa ʋ tì cwəŋə ka nə ba ziən.
30 Lìù tə nə pwí ʋ yɩ́á, yàá bʋŋa yolwan fwaŋʋ,
yá wà tə nə vwe ʋ nii tànʋ̀, dí yáá ʋ tʋn yolwan, ʋ zwɛ̀.
31 Yuu nə pɩ̀rɩ̀, kʋ yɩ dun yupuu nəzəŋu,
yá kʋ yɩ cɩ́gá cwəŋə yuu wa nə, ba yàá na kʋ.
32 Lìù tə, ʋ lɩŋa nə ba zaŋa lala, kʋ́kwà babɩa.
Yá lìù tə nə wàá ʋ tɩ̀àn, kʋ́kwà wà tə nə wàá tɩʋ, ʋ tɛ ʋ də́.
33 Ba yàá dɩlɩ pwárʋ́ bɩ̀á, sə ba ma lwarɩ Yɩɩ fɩra,
yá Ba-Yígúrə́-Jə-Tiu nə yàá bɩrɩ yoo tə nə wulə.