17
1 Lìù nə búbúlí sənmun ʋ də́ də bɩcan sìə́,kʋ kʋ́kwà ʋ nə dí cànà wodiu dìə̀ wa, jara nə wulə lá.
2 Tʋtʋnʋ tə nə jə pubʋnzəŋu yàá jon bìú tə nə kəni cavɩra ʋ nyɩna nə, bwálɩ́.
Yá tʋtʋnʋ təntə wá na tori ba dìə̀ tə wa.
3 Ba yàá nyɩan sɩ́án də wárʋ́ líí mən wa, ba ma lwarɩ tə zəni máŋá.
Yá Ba-Yígúrə́-Jə-Tiu nə wàá ləzwənə bɩcan mʋ̀ zəni, ʋ lwarɩ.
4 Yolwafwanʋ yàá swə sə ʋ cʋgʋ kʋ̀nkʋ̀n yìə̀n,
yá kʋ̀nkʋ̀nʋ də yàá swə sə ʋ cʋgʋ kʋ̀nkʋ̀n sʋ̀ràn.
5 Lìù nə pwɛ́ zʋrʋ, kʋ yɩ Yɩɩ tə, ʋ nə fwa wá nə, ʋ fʋfʋlɩ.
Yobɩbɩlʋ nə yɩ lìù pupwən yoo, ʋ də bá jɛ́n càn yáá nə.
6 Nɩ̀án yɩ nɩbara-ba dun yipuu,
yá nyɩna-ba yɩ ndə ba bɩ̀á wonanan nə.
7 Pubʋŋa sʋgʋ wà mɛ də ləbibənu nii,
ndə kʋ̀nkʋ̀n nə ba ziən də yáá tíú nii nətʋ.
8 Vwiŋə tɩ̀án jələ tə, ndə vwərə won nə.
Ba bʋŋa də, bwálɩ́ tə mama, ba nə ja tə ba va, ba yìə̀n wá kwɛn.
9 Lìù nə jə sonu, ʋ yàá pwí yolwan yuu nə,
yá lìù tə mʋ̀, ʋ nə pìí ʋ lìí yolwan, cʋ̀gà dabarɩ.
10 Ba nə caga pubʋŋa tíú nii nə, naa nədʋ,
kʋ yàá san wá kʋ doni,
ba nə mà ləbibənu də dàʋ̀, nɛɛ bíí.
11 Ləzwənkʋkwɩʋn yàá swə ka vɩ nii,
yá wʋlʋnyiən nə ba wá yigu ba kə ʋ nə.
12 Lìù nə jəri kənyenkuru, kʋ bɩ̀á nə jɛ́n,
kʋ kʋ́kwà ʋ nə jəri ləbibənu, də ʋ ləyiri yìə̀n tə.
13 Lwanɩ bá nan lìù tə dìə̀ wa,
ʋ nə ja lwanɩ, ʋ ma ŋwɩ́n zəni.
14 Jara ka sinti yɩ ndə kàŋʋ́ nə kàrɩ́.
Kʋ mʋ̀ yɩrɩ, ja n tɩ̀àn, də tə tə wà nyɩ́n tə zàn.
15 Ba-Yígúrə́-Jə-Tiu culi lìù tə nə bʋ̀rɩ̀ ʋ pɩn wʋlʋnyiən nə,
də lìù tə nə kəni cɩ́gá tíú càn wa.
16 Səbiu nywarɩ nə yɩ bɛ̀, ləbibənu jɩɩn wa?
Ʋ wàá kʋ ʋ ma yə̀ wʋbʋŋa naaa?
Abada, ʋ yɩ ləbibənu!
17 Dabɛɛ sonu wulə wuuu,
yá càn máŋá wa nə, nubiu mʋ̀ jə sáŋʋ́.
18 Lìù tə nə ba pubʋŋa jə yàá zɩgɩ jɩŋa jɩrɩmʋ.
Ʋ yàá jon ʋ jəndon yuu yìə̀n, ʋ zɩn.
19 Lìù tə nə swə jara, swə cʋna,
yá fwìə́ tíú yàá cʋ̀gʋ̀ ʋ tɩ̀àn.
20 Pubʋnlwan tíú ba ywánɩ́ nì,
yá yobɩbɩlʋ yàá yí lìù tə nə kʋ̀nɩ̀ kʋ̀nkʋ̀n.
21 Lìù tə nə lɩrɩ ləbibənu wá ya pucʋnɩ wa,
yá nyɩnyaŋʋ nyɩna wàrɩ̀ ʋ jwɛ.
22 Pupwən yɩ tɩ̀ʋ́ nəzəŋu, kʋ nə ywarɩ lìù,
yá pucʋnɩ mʋ̀ kwɩ̀ lìù.
23 Wʋlʋnyiən yàá jon vwiŋə, ba nə səgə ba pɩn wá,
sə ʋ ma gugurə cɩ́gá cwəŋə.
24 Wʋbʋŋa wulə pubʋŋa tíú yɩ́á yuu,
yá ləbibənu mʋ̀ yàá ywàń ʋ lɛ wʋbʋŋa yuu.
25 Bìú tə nə yɩ ləbibənu yɩ ʋ nyɩna pucʋnɩ,
ʋ ga yɩ ʋ nuu yinəgə.
26 Kʋ wà mɛ, sə ba dɩ bwaan cɩ́gá tíú yuu wa,
kʋ ga wà mɛ, sə ba mà dun tɩ̀án, ba nə twá cɩ́gá nə yɩrɩ.
27 Lìù tə nə jə yənu ba vɛɛ swɩ̀n,
yá lìù tə nə yɩ bʋ̀àbʋ̀à yɩ pubʋŋa tíú.
28 Ləyiru də tətə nə púə́ ʋ nii, ʋ yɩ ndə wʋbʋnyiən nə.
Lìù tə nə ba swɩ̀n, yɩ ndə pubʋnyiən nə.