18
1 Lìù tə nə pwɛ̀ də lɩ̀à, yɩ ʋ cɩcɩ fɩra yìə̀n nə ʋ pɩ̀à,yá ba nə pɩn wá kwìə̀, ʋ lɩŋa yàá zaŋa.
2 Yoo də̀ń niu tà ləbibənu fɩra yoo.
Ʋ fɩra yoo yɩ, sə ʋ bɩrɩ ʋ ləyiri yìə̀n.
3 Wʋlʋŋʋ nə ja fʋfʋlʋ kʋ twi,
yá tʋran də kəni cavɩra lìù nə.
4 Ləzwənə nii sʋ̀ràn də̀ń lu ndə mʋʋ nɩ́á nə,
tə súə́ də wʋbʋŋa, ndə nacoru nə súə́ kʋ pàlɩ̀.
5 Kʋ wà mɛ, sə ba bʋ̀rɩ̀ ba pa wʋlʋnyiən nə,
ba ga yá cɩ́gá tíú.
6 Ləbibənu nii sʋ̀ràn zɩ̀n jara,
kʋ pɩn ba mà wá.
7 Ləbibənu nii sʋgʋ yàá cʋ̀gʋ̀ wá.
Ʋ nii sʋ̀ràn yàá pìí tə ja ʋ tətə.
8 Tɩjanyiən nii sʋ̀ràn yɩ ndə wodiywaŋʋ nə,
kʋ nə zwɩ kʋ yí yatana mama wa.
9 Lìù tə nə tʋŋa də yasurə,
də lìù tə nə cʋ̀gà, yɩ nubɩa.
10 Ba-Yígúrə́-Jə-Tiu yɩrɩ tə yɩ ndə dɩ̀àn dəkuu bwálɩ́ nə,
cɩ́gá tíú nə kwálɩ́ ʋ yuu ʋ con, yoo ba wá yí.
11 Jɩjə tíú jɩjə yɩ ndə tɩʋ nə, ba nə lwə̀, ba kɩkarɩ də biritaŋʋ.
Ʋ pubʋŋa wa, ʋ jɩjə tə cɩ̀ ʋ nə, ndə biritaŋʋ nə.
12 Fwìə́ nə súə́ ləzwənə bɩcan, ʋ cʋna nə ga.
Yá lìù nə mun ʋ tɩ̀àn, ʋ yàá na dun.
13 Lìù nə le yoo, də ʋ wà dí yáá ʋ cʋgʋ kʋ,
kʋ bɩrɩ də ʋ yɩ ləyiru, yá kʋ yɩ cavɩra, ʋ kəni ʋ tɩ̀àn nə.
14 Ləzwənə wʋdɩʋ nə wàá yayɩgʋ.
Yá ʋ jɩ̀àn nə gwarɩ, wàà nə wàá tə ʋ pìí ʋ dàŋà?
15 Pubʋŋa tíú yàá na yənu, ʋ pa ʋ tɩ̀àn nə,
yá wʋbʋnyiən də yàá pɩ̀à, sə ʋ nì yənu sʋ̀ràn.
16 Zìlə́ wiən yàá kwɛn tə tíú cwəŋə,
kʋ pa ʋ wàá ləzwənfaran yɩra ʋ yí.
17 Təntən lìù nə tún ʋ nii, kʋ yàá yɩ ndə ʋ jə cɩ́gá.
Yá ʋ jarɩdon tə dàń nə yàá bà, ʋ bɩrɩ də ʋ ba cɩ́gá jə.
18 Pwárʋ́ yàá pa jara zwɛ̀,
kʋ ga lɩ yoo yáá ladɩra pwə́rə́ wa.
19 Ba nə cʋ̀gʋ̀ nubiu pùə́ nə, ʋ càn dwə tɩʋ, ba nə lwə̀ ba kɩkarɩ də biritaŋʋ.
Yá nubɩa jara dà, ndə pɩ̀ʋ́ sàń mimii borusɔɔ nə.
20 Ləzwənə nii sʋgʋ nə pɩn ʋ pùə́ swí,
ʋ nii sʋ̀ràn nə kʋ̀nɩ̀ wá.
21 Nəndəli wàá mɩɩ, nə à yə̀ə́ tɩan kʋ pɩn.
Lìù tə nə swə sʋgʋ, mɛ sə ʋ sɛ̀ kʋ kwa yìə̀n tə də.
22 Lìù nə nɩ kazəŋu ʋ swe, ʋ nì ywánɩ́.
Kʋ yɩ yuywaŋʋ, ʋ nɩ Ba-Yígúrə́-Jə-Tiu yáá con.
23 Zʋrʋ yàá swɩ̀n də ʋ lòrì,
yá jɩjə tíú mʋ̀ yàá le də nicɔɔ.
24 Dabara kapʋpʋ kəni lìù càn wa,
yá cɩ́gá cɩ́gá dabɛɛ jə sáŋʋ́, ʋ doni nubiu.