19
1 Lìù nə yɩ zʋrʋ, ʋ ga yɩ təgətəgə,ʋ kʋ́kwà kʋ̀nkʋ̀nʋ tə, ʋ nə yɩ ləbibənu.
2 Lìù nə jə yawala, ʋ ga ba yənu jə, kʋ ba ziən.
Yá bɩbarʋ zənzən yàá pa lìù dwá.
3 Ləzwənə ləyiri yìə̀n tə yàá cʋ̀gʋ̀ wá,
yá ʋ lɩŋa dàń yàá pìí tə zaŋa Ba-Yígúrə́-Jə-Tiu mʋ̀ʋ́ yuu wa.
4 Jɩjə tíú dabara yɩ ba súrí wuuu,
yá zʋrʋ mʋ̀ də ʋ dabɛɛ nədʋa də tətə yàá pwɛ̀ duən nə.
5 Kʋ̀nkʋ̀n dansɩa lìù bá jɛ́n càn yáá nə,
yá lìù tə də nə kʋ̀nɩ̀ kʋ̀nkʋ̀n, bá jɛ́n.
6 Lɩ̀à kapʋpʋ yàá pɩ̀à, sə ba na yuywaŋʋ yáá tíú yáá con,
yá lìù mama yɩ lìù tə nə də́ zìlə́ lɩ̀à yɩra dabɛɛ.
7 Zʋrʋ nubɩa mama culi wá,
yá kʋ tə nə dwə, ʋ dabara də tətə yàá vɩ wá.
Ʋ nə pɩ̀à ba, sə ba ve, ʋ ba ba nɩ.
8 Lìù tə nə bʋŋa zəni yɩ ʋ tɩ̀àn nə, ʋ ma kwɛn,
yá lìù tə nə jə pubʋŋa yàá nì ywánɩ́.
9 Kʋ̀nkʋ̀n dansɩa lìù bá jɛ́n càn yáá nə,
yá lìù tə də nə kʋ̀nɩ̀ kʋ̀nkʋ̀n, wá tɩ.
10 Kʋ wà mɛ, sə ləbibənu ya ywánɩ́ bwálɩ́ nə,
ndə kʋ nə wà mɛ, sə yoŋu də́ pàrɩ̀ pàbɩ̀á yuu wa nətʋ.
11 Pubʋnzəŋu tíú lɩŋa ba lala zaŋa,
yá ʋ dun yoo nə yɩ yolwana tə, lɩ̀à nə tʋŋa ʋ yɩra, ʋ ga yá ʋ pɩn tə kɛ̀ń.
12 Pɩ̀ʋ́ lɩŋa jə fən, ndə gəbala bagʋ nə,
yá ʋ pubwanʋ yɩ ndə nyʋ̀nʋ̀ nə, gaʋ yuu wa.
13 Bìú tə nə yɩ ləyiru yɩ ʋ nyɩna wʋwalʋ,
yá kan jara yɩ dəyuu fɩrʋ, kʋ curi, kʋ ba zɩga.
14 Nyɩna-ba yàá yá dìə̀ də jɩjə wiən, ba pa ba bɩ̀á nə,
yá kan tə nə jə pubʋnzəŋu mʋ̀ yɩ Ba-Yígúrə́-Jə-Tiu nə pɩn.
15 Yayɩa kəni lìù dwiən wa,
yá niən yàá ja lìù tə nə tʋŋa də yasurə.
16 Lìù tə nə sɛ̀ nii yɩ ʋ mɩɩ tə yuu ʋ ywàŋá,
yá lìù tə nə ba ʋ tɩ̀àn nə cɩ̀ wá tɩ.
17 Lìù tə nə dəri lalaŋʋ yinəgə yɩ jɩŋɩ ʋ keni, Ba-Yígúrə́-Jə-Tiu yuu wa.
Yá Ba-Yígúrə́-Jə-Tiu wá kə won kʋ bʋʋ wa.
18 Pá n bìú, n kə cwəŋə wa, də yala tə wulə,
n nə dàn ká mà wá, n pa tɩan nə.
19 Lìù tə, ʋ lɩŋa nə zaŋa zənzən, ba dánɩ́ ʋ yoli bwaan.
Cɩ́gá, ba nə yá wá, kʋ yɩ ba daŋa ʋ jɩɩn, sə ʋ pìí ʋ bwɛ́.
20 Cʋgʋ kwìə̀, n ga sɛ̀ bɩra,
yá kʋ yígúrə́ wa, n wá jì wʋbʋnyiən.
21 Pubʋŋa yìə̀n dáá ləzwənə bɩcan wa,
yá Ba-Yígúrə́-Jə-Tiu fɩra tə nə tʋŋa.
22 Wʋywaŋʋ* nə yɩ ləzwənə zəni.
Yá lìù nə yɩ zʋrʋ, kʋ kʋ́kwà ʋ nə yɩ kʋ̀nkʋ̀nʋ.
23 Ka dəri Ba-Yígúrə́-Jə-Tiu fən pɩn mɩɩ lìù nə.
Kʋ pɩn ʋ dwɛ̀ ʋ swí, yá tɩtɩn yobɩbɩlʋ ba wá yí.
24 Yayɩnyiən yàá kə ʋ jɩɩn zʋŋa wa,
yá ʋ ba kʋ ja pìí ʋ vəli ʋ nii con.
25 Mà bɩyɩrɩ də́rú, yá labʋbʋnʋ wá cɩ̀ ʋ tɩ̀àn nə.
Caga pubʋŋa tíú nii nə, yá ʋ wá yəni yoo də̀ń.
26 Bìú tə nə fɩfɩn ʋ nyɩna, ʋ ga dɩŋɩ ʋ nuu ʋ lɩ,
yɩ cavɩkənu də yɩrɩ cʋnʋ.
27 À bìú, n nə ba kwìə̀ cʋga,
n wá ya ŋʋ́nɩ́ də yənu sʋ̀ràn.
28 Dansɩa lìù tə nə yɩ ləjwərə, yáá tə̀lə́ də cɩ́gá yoo.
Yá Wʋlʋnyɩna swə lwanɩ fwaŋʋ.
29 Bʋra kwa càn yɩ tə wulə bɩyɩrɩ də́rə́ yɩrɩ,
yá màrán yɩ tə wulə ləbibənən dəkoru yɩrɩ.