20
1 Divɛn pɩn lɩ̀à jì bɩyɩrɩ də́rə́,yá sana tə nə dà pɩn ba fwa zizigu.
Lìù tə mama, ʋ nə nywɩn tə, ʋ bʋbʋnɩ, bá jì wʋbʋnyiən.
2 Pɩ̀ʋ́ lɩŋa jə fən, ndə gəru bagʋ nə,
yá lìù tə, ʋ nə pɩn tə zàn zənzən,
kʋ yɩ ʋ tətə mɩɩ nə ʋ kəni tɩan bʋʋ wa.
3 Lìù nə cɩ̀ ʋ tɩ̀àn nə də jara, kʋ jə dun,
yá ləbibənu mʋ̀ yàá pugu ʋ zʋ jara vɛɛ.
4 Waran yàá pa yayɩnyiən ba ʋ kárá vàrɩ̀,
yá kʋ nətʋ dàń yàá pa, ʋ wàrɩ̀ won mama, ʋ nɩ woceri wa.
5 Ləzwənə bɩcan pubʋŋa yìə̀n yɩ ndə naluŋə nə,
yá lìù tə nə jə pubʋŋa nə wàá tə ʋ lwarɩ.
6 Lɩ̀à zənzən yàá swɩ̀n də ba mʋ̀ yɩ wʋywanyɩna,
yá wàà nə wàá pùə́ nədʋ tíú ʋ nɩ?
7 Cɩ́gá tíú yàá twá kʋ tə nə yɩ təgətəgə nə,
kʋ pa ʋ bɩ̀á ya pupwən lɩ̀à, ʋ kwa nə.
8 Pɩ̀ʋ́ nə jə̀ə́ ʋ padaʋ yuu, sə ʋ bʋ̀rɩ̀ bʋra,
ʋ yàá zəən ʋ na yolwan mama.
9 Wà nə wàá ʋ swɩ̀n, ʋ wʋ́:
«À mʋ̀ bɩcan yɩ parɩ,
à yuu ba cʋna jə?»
10 Ba-Yígúrə́-Jə-Tiu culi səkəri bɩ̀á yirə bələ,
də wiən maŋʋ yirə bələ.
11 Ləzwəndʋn tʋtʋnɛɛ nə yàá bɩrɩ,
də ʋ nə wá ya təgətəgə, ʋ ga ya ləzwənzəŋu.
12 Zɩan tə nə nə̀ń, də yɩ́á tə nə na lá,
yɩ Ba-Yígúrə́-Jə-Tiu nə fwa tə mama.
13 Dàn ká sóní dwiən, kʋ nə tà nətʋ, n wá jì zʋrʋ.
Súrí n yɩ́á, yá n wá də́ wodiu n sú.
14 Bayolu yàá swɩ̀n, ʋ wʋ́: «Kʋ ba ziən! Kʋ ba ziən!»
Yá ʋ nə nan kwa con, ʋ yàá bʋ ʋ tɩ̀àn nə, kʋ tə yɩrɩ ʋ nə yə̀.
15 Sɩ́án wulə, zànán də ma wulə zənzən,
yá yənu sʋ̀ràn nə jə funə tə doni.
16 Jon lìù tə gànʋ̀, ʋ nə zɩgɩ vee jɩŋɩ jɩrɩmʋ.
Jon kʋ tíú wiən, n tún talɩma, ʋ nə ken waa vee tə nə yɩrɩ.
17 Kʋ sinti wa, gɩgɩra won diŋə ywán, kʋ pa ləzwənə nə.
Yá kʋ ja vələ yáá, kʋ yàá jì ndə kasɩlʋ nə, kʋ sú ʋ nii.
18 Kwìə̀ nəzəŋə nə yàá pa pubʋŋa yìə̀n jì.
N nə vələ kʋ̀ʋ̀, sə n dí yáá n bʋ́n zəni.
19 Lìù tə nə twá lá ʋ də́ tɩjaŋa, yàá ja dìə̀ yìə̀n, ʋ nan kàrá wa.
Cɩ̀ n tɩ̀àn nə də lìù tə, ʋ nii nə swɩ̀n zənzən.
20 Lìù nə mun ʋ nyɩna də ʋ nuu,
ʋ mɩɩ wá zwɛ̀, ndə cànʋ́ nə də̀ŋì yikunu wa.
21 Lìù nə sinti, ʋ pɩ̀à jɩjə ʋ na lala,
kʋ ja vələ yáá, ka bá ja dun, ka pa wá.
22 Dàn ká swɩ̀n də, n wá ja lwanɩ n ma ŋwɩ́n lwanɩ tə, ba nə tʋn n yɩra.
Jələ Ba-Yígúrə́-Jə-Tiu yuu wa, yá ʋ wá jon mʋ́.
23 Ba-Yígúrə́-Jə-Tiu culi səkəri bɩ̀á yirə bələ,
yá ŋwɩ̀rɩ̀ səkəri də ba ziən.
24 Ba-Yígúrə́-Jə-Tiu nə kəni ləzwənə cwəŋə wa.
Ləzwənə wá fwa nətə ʋ ma lwarɩ bwálɩ́ tə, ʋ nə vələ?
25 Kʋ jə fən, sə lìù kàn nii də bwana, ʋ wʋ́: «Won kʋ tə yɩ Yɩɩ nyiən!»
Ʋ dàń ga zɩgɩ lá, ʋ bʋŋa ʋ nipoli tə yuu wa.
26 Pɩ̀ʋ́ tə nə jə wʋbʋŋa yàá laga wʋlʋnyɩna duən yáá nə,
ʋ ga nɩŋa ba, ʋ tɩtaga də səsen kòrù.
27 Ləzwənə siŋu yɩ ndə cànʋ́ nə,
Ba-Yígúrə́-Jə-Tiu nə pɩn wá,
sə kʋ poni pɩ̀rɩ̀ ʋ waa mama.
28 Wʋywaŋʋ* də cɩ́gá nə cɩ̀ pɩ̀ʋ́ nə.
Wʋywaŋʋ nə pɩn, ʋ pàrɩ̀ jə dɩ̀àn.
29 Dɩ̀àn yɩ ləzwəndʋn nanʋnwon,
yá yukʋpwənə yɩ bazʋnan dun.
30 Ba nə tún nʋran lìù yɩra, kʋ mʋ̀ nə wàá ʋ wʋlʋŋʋ kʋ zwɛ̀,
ndə mà nə wàá lìù bɩcan ka kwɛn nətʋ.