21
1 Pɩ̀ʋ́ bɩcan yɩ ndə nacwəŋə nə, Ba-Yígúrə́-Jə-Tiu jɩɩn wa.Ʋ yàá guni kʋ, ʋ kə bwálɩ́ tə mama, ʋ nə pɩ̀à.
2 Ləzwənə mʋ̀ yàá bʋŋa də ʋ tʋtʋnɛɛ mama ziən,
yá Ba-Yígúrə́-Jə-Tiu nə yə̀ə́ kʋ tə nə wulə bɩcan wa.
3 Lìù nə twá cɩ́gá nə, ʋ ga vəli mənəmənə,
kʋ ywán də Ba-Yígúrə́-Jə-Tiu kʋ doni jwəŋə fwaŋʋ.
4 Yigwənə, də bɩcan tə nə súə́ də fwiə,
nə yàá bɩrɩ wʋlʋnyɩna cʋna tə.
5 Wiən yàá bʋ́rɩ́ lìù tə nə twá pubʋŋa yìə̀n nə, ʋ ma tʋŋa,
yá lìù tə mʋ̀ nə tʋŋa də bɩbarʋ, wá kwɩ̀n won nə.
6 Lɩ̀à tə nə twá də kʋ̀nkʋ̀n ba ma jì jɩjə tɩ̀án, ken ba tɩ̀àn tɩan jɩɩn wa.
Ba jɩjə wiən tə yɩ ndə fanɩʋ nə, tə bá dán tə ma jɛ́n.
7 Wʋlʋnyɩna wʋlʋŋʋ tə yàá cʋ̀gʋ̀ ba,
ba nə vɩ, sə ba twá cɩ́gá nə yɩrɩ.
8 Lagʋrʋ yàá tʋn yogugwələn,
yá lìù tə nə wà yoo cʋ̀gʋ̀ tʋtʋnɛɛ yɩ mənəmənə.
9 Lìù nə wulə dìə̀ dəyuu nii nə,
kʋ kʋ́kwà ʋ də kan tə nə yɩ jarɩdɩrʋ nə wulə dìə̀ nədʋ wa.
10 Wʋlʋnyiən jə̀rə́ swə yolwan fwaŋʋ,
ʋ ba ʋ dabɛɛ də tətə yinəgə dəri.
11 Ba nə ken càn bɩyɩrɩ də́rú nə, kʋ yàá pa labʋbʋnʋ jì wʋbʋnyiən.
Yá ba nə kàrɩ̀ wʋbʋnyiən, ʋ yàá ja yənu.
12 Yɩɩ tə nə yɩ cɩ́gá tíú yàá mɩ̀nɩ̀ yìə̀n tə nə tʋŋa wʋlʋnyiən dìə̀ wa,
yá ʋ yàá yigu ba, ʋ kə càn wa.
13 Lìù tə, ʋ nə swɩn ʋ zɩan lalaŋʋ kwirə yɩrɩ,
dɩɩn don nə, ʋ də tətə wá kwi, yá lìù mama bá tan ʋ con.
14 Zìlə́ won tə ba nə twá tɩa ba pa, cwí lɩŋa,
yá kʋ tə, ba nə səgə gànʋ̀ də̀ń ba ma pa,
pɩn lɩŋa tə nə zàn zənzən twɩ.
15 Ka tʋn yìə̀n tə nə yɩ mənəmənə jə pupwən kʋ pa cɩ́gá tíú nə,
yá tə pɩn yolwafwana mʋ̀ vɩvaga.
16 Lìù tə nə lɩ ʋ tɩ̀àn pubʋnzəŋu cwəŋə wa,
wá va ʋ sìí tɩga púlí wa.
17 Lìù tə nə swə pùə́ fɩra yìə̀n fwaŋʋ yàá jì zʋrʋ.
Yá lìù tə nə swə divɛn də wodiywáŋá, bá jì jɩjə tíú, abada.
18 Wʋlʋnyiən wá də́ càn, cɩ́gá tíú yuu nə,
yá pwìí bələ tíú də ga wá də́ càn
lɩ̀à tə nə yɩ cɩ́gá tɩ̀án Yɩɩ yáá con, yuu nə.
19 Lìù nə wulə kasɔɔ lanworu wa,
kʋ kʋ́kwà ʋ nə wulə də kan tə nə yɩ jarɩdɩrʋ,
ʋ ga zɩ̀n lɩŋa.
20 Jɩjə wiən tə nə jə funə, də nʋga wulə wʋbʋnyiən dìə̀ wa,
yá ləbibənu mʋ̀ yàá cʋ̀gʋ̀ tə.
21 Lìù tə nə pɩ̀à cɩ́gá cwəŋə də wʋywaŋʋ*,
yàá na mɩɩ, də cɩ́gá cwəŋə, də dun.
22 Wʋbʋnyiən nədʋ wàá kwatara babɩran tɩʋ, ʋ tɛ ʋ də́,
ʋ ga gwɛrɩ kʋ dɩ̀àn dəkuu bwálɩ́, ba yà nə jələ kʋ yuu wa.
23 Lìù tə ʋ nə cɩ̀ ʋ nii sʋ̀ràn nə,
kʋ yɩ ʋ tɩ̀àn nə ʋ cɩ̀, càn dàn ká yí wá.
24 Lìù tə nə jə yigwənə də yɩrʋ yɩ bɩyɩrɩ də́rú.
Ʋ yàá fwa fwìə́ zənzən, yoo mama wa.
25 Yayɩnyiən fɩra yìə̀n yàá pa ʋ tɩ,
ʋ nə ba pɩ̀à, sə ʋ jɩ̀àn tʋn won mama yɩrɩ.
26 Máŋá mama, ʋ yii yàá zʋ lɩ̀à wiən,
yá cɩ́gá tíú mʋ̀ yàá pɩn zìlə́ wiən, ʋ ba kukwəŋə.
27 Wʋlʋnyɩna joŋi yɩ wobalwarʋ.
Yá kʋ tə nə dwə, ba yàá fwa joŋi tə, də pubʋnkʋkwɩnan.
28 Dansɩa lìù tə nə yɩ kʋ̀nkʋ̀nʋ wá tɩ.
Yá lìù tə mʋ̀, ʋ nə cʋga sʋgʋ zəni, wá na cwəŋə, sə ʋ swɩ̀n máŋá mama.
29 Wʋlʋnyiən yàá ŋwɩ̀ń ʋ yáá,
yá lìù tə nə yɩ cɩ́gá tíú yə̀ə́ ʋ tɩ̀àn janʋ.
30 Wʋbʋŋa, də yənu, də kwìə̀
mama yɩ tʋtʋ Ba-Yígúrə́-Jə-Tiu yáá con.
31 Səsən yɩ ba yàá tanɩ ba ma dànɩ̀ kʋ̀ʋ̀ dɩɩn,
yá Ba-Yígúrə́-Jə-Tiu nə pɩn ba də́ dɩ̀àn.