22
1 Yɩrɩ zəŋu kʋ́kwà jɩjə nəfarʋ,yá wʋywaŋʋ kʋ́kwà wárʋ́ də sɩ́án.
2 Jɩjə tíú də zʋrʋ mɛ yɩ won nədʋ.
Ba-Yígúrə́-Jə-Tiu nə fwa ba mɛ bələ.
3 Swɩan tíú nə nɩ yolwan də kʋ bɩ̀àn,
ʋ yàá səgə kʋ yáá nə,
yá lɩ̀à tə nə yəri yoo də̀ń mʋ̀ yàá va ba jəri kʋ,
yá kʋ yàá kə ba càn wa.
4 Ka mun tɩ̀àn, də ka dəri Ba-Yígúrə́-Jə-Tiu fən,
yɩ jɩjə, də dun, də mɩdarɩ.
5 Casʋran də nyala wulə lìù tə cwəŋə wa, ʋ nə tʋŋa yogugwələn,
yá lìù tə nə pɩ̀à ʋ mɩɩ yàá cɩ̀ ʋ tɩ̀àn nə də tə.
6 Bɩrɩ cwəŋə tə bisɩmaa nə mɛ sə ʋ tì, də ʋ tə mun,
yá máŋá tə, ʋ nə twi ʋ jì nəkwɩa, ʋ bá dʋgʋ ka.
7 Jɩjə tíú də́ pàrɩ̀ zʋra yuu wa,
yá jɩjɩŋʋ yɩ jɩŋɩ tíú yoŋu.
8 Lìù nə dùə̀ yolwan, ʋ yàá ca càn,
yá dɩ̀àn tə, ʋ nə ma tʋŋa wʋlʋŋʋ tə wá zwɛ̀.
9 Yɩɩ wá fwa zəni lìù tə yɩra, ʋ nə də́ zìlə́ lɩ̀à yuu wa.
Cɩ́gá, ʋ yàá pɩn wodiu lalaŋa nə.
10 Dɩŋa bɩyɩrɩ də́rú, yá jara wá zwɛ̀.
Kʋ wá pa tʋ́tʋ̀ná də tʋran nyʋn lá.
11 Lìù nə yɩ bɩcapon tíú,
ʋ sʋ̀ràn yàá jə sáŋʋ́, ʋ ga yɩ pɩ̀ʋ́ dabɛɛ.
12 Ba-Yígúrə́-Jə-Tiu ywàŋá yənu tíú yuu nə,
yá ʋ yàá gugurə kʋ̀nkʋ̀na mʋ̀ sʋ̀ràn.
13 Yayɩnyiən yàá swɩ̀n, ʋ wʋ́: «Gəru wulə kàrá wa!
Kʋ wá gʋ nə kanporu tə titəŋi wa!»
14 Lìù don kan nii sʋ̀ràn yɩ ndə gwàlʋ́ nə, kʋ də̀ń nə lu,
yá lìù tə, Ba-Yígúrə́-Jə-Tiu lɩŋa nə zaŋa ʋ yuu, nə yàá tʋ kʋ wa.
15 Ləyiri wulə bisɩmaa bɩcan wa,
yá kafɩʋ nə wàá tə kʋ lɩ.
16 Fɩfɩan pɩn zʋrʋ jì jɩjə tíú,
yá wiən ka pa jɩjə tíú nə, kəni zʋrɩa.
WƲBƲNYƖNA SƲRAN
Kwìə̀ yirə yirə
17 Súrí n zɩan, n cʋgʋ wʋbʋnyɩna sʋ̀ràn,
n ga ja à yənu yìə̀n tə, n bɩcan wa.
18 Kʋ wá ya pupwən kʋ pa mʋ́, də n nə jə tə, n bɩcan wa,
tə ga wulə n nii wa, máŋá mama.
19 Zə̀n kʋ tə, à wá pa yənu kàrà n də nə,
sə kʋ pa n kə n waa Ba-Yígúrə́-Jə-Tiu nə.
20 À pʋ́pʋ́nɩ́ zwansɩsarɩ nəzəŋə à pa mʋ́,
tə wa nə jə kwìə̀ də pubʋŋa sʋ̀ràn,
21 sə à ma bɩrɩ mʋ́ sʋ̀ràn tə nə yɩ cɩ́gá, tə ga yɩ mənəmənə.
Kʋ nətʋ wá pa lìù nə tʋn mʋ́,
n wá pìí n bà, n swɩ̀n cɩ́gá kʋ tíú con.
22 Dàn ká vɩrɩ labwanʋ, ʋ nə yɩ labwanʋ yɩrɩ,
yá dàn ká tʋn dɩ̀àn yinənyiən yɩra, bʋra bwálɩ́ nə.
23 Cɩ́gá, Ba-Yígúrə́-Jə-Tiu wá ta ʋ jon ba,
yá ʋ wá pa lɩ̀à tə nə vɩrɩ ba, kwɩ̀n ba mɩɩ nə.
24 Dàn ká də́ lɩŋa tíú dabarɩ,
yá dàn ká twá jarɩdɩrʋ nə.
25 Kʋ nə tà nətʋ, n wá mɩ̀n ʋ tʋtʋnɛɛ tə,
yá kʋ wá jì yojanʋ, n mɩɩ tə wa.
26 Dàn ká ya lɩ̀à tə wa, ba nə joŋə lɩ̀à duən yuu yìə̀n ba zɩŋa,
ba tə nə zɩga lɩ̀à duən jɩŋa jɩrɩmʋ.
27 Cɩ́gá, n nə ba won jə, sə n ma ŋwɩ́n jɩŋɩ tə,
ba wá tì n gədo tə də tətə, n nə pə̀ní kʋ yuu.
28 Dàn ká lwàń sɩswɩan nədwan tə,
n nɩbara-ba nə tún kárɩ́ pwə́rə́ wa.
29 Lìù nə jə ʋ tʋtʋŋɩ yənu zəni,
ʋ wá wànɩ́ ʋ tʋn ʋ pa pɛ̀gá də tətə nə,
ʋ bá ya lɩ̀à tə yáá con, lìù nə yəri ba nii nə.