23
1 N də dun tíú nə wulə á də́ wodiu,sə n ja n tɩ̀àn zəni, də ʋ mʋ̀ lìù tə, ʋ nə jə̀ə́ n yáá con.
2 Ja n mɩmɩan,
də n nə yɩ lìù tə, n nə də́ zənzən.
3 Dàn ká pa ʋ wodiywáŋá tə fɩra zʋ mʋ́,
sə tə kə mʋ́ cavɩra.
4 Dàn ká gwàrɩ̀ n tɩ̀àn, sə n jì jɩjə tíú,
dàn ká bʋ́n ka yoo də tətə.
5 N yii tàà nə dìgə̀ jɩjə,
də ka nyʋan n yɩ́á yuu!
Cɩ́gá, ka yàá twà vànà,
ka piri lanworu wa, ndə kayɩlʋ nə.
6 Dàn ká də́ gʋnyiən wodiu,
yá dàn ká pa ʋ wodiywáŋá tə fɩra ja mʋ́.
7 Cɩ́gá, ʋ waa con ba ziən.
Ʋ yàá swɩ̀n, ʋ wʋ́: «Də́, n ga nyʋn!»
Yá kʋ wà ʋ waa yí.
8 Kʋ kwa nə, n wá tʋnɩ kʋ tə, n nə dí tə,
yá n nə bʋ̀à ʋ nə tə, wá yà tʋtʋ.
9 Dàn ká swɩ̀n də ləbibənu,
ʋ nə wá gwìə̀n n pubʋnzəŋu sʋ̀ràn tə yɩrɩ.
10 Dàn ká lwàń sɩswɩan nədwan,
yá dàn ká vàrà n zʋ bitara kárá wa.
11 Cɩ́gá, lìù tə nə cɩ̀ ba nə, tə jə dɩ̀àn,
yá ʋ wá ta ʋ zɩgɩ n nə, ba yɩrɩ.
12 Súrí n bɩcan, n ma jon kàrà,
n ga súrí n zɩan, n cʋgʋ yənu sʋ̀ràn.
13 Dàn ká vɩ, sə n pá bisɩmaa, n kə cwəŋə wa.
N nə mà wá də kafɩʋ, ʋ bá tɩ.
14 N nə mà wá də kafɩʋ,
n wá jon ʋ mɩɩ tɩan jɩɩn wa.
Kwìə̀ tə, nyɩna nə pɩn ʋ bìú nə
15 À bìú, n nə yɩ wʋbʋnyiən,
à də wá ya pupwən wa.
16 À pùə́ wá poli zənzən,
də n nii nə swɩ̀n cɩ́gá.
17 Dàn ká pa yolwafwana yimən ja mʋ́,
n dàń nə dəri Ba-Yígúrə́-Jə-Tiu fən, máŋá mama.
18 Cɩ́gá, kʋ wá ja jwɩan, kʋ pa mʋ́,
yá n yala də bá kwɛ̀.
19 N mʋ̀ à bìú, cʋgʋ à kwìə̀, yá n wá ya wʋbʋnyiən,
n ga wá tì cwəŋə tə, ka nə yɩ mənəmənə.
20 Dàn ká ya lɩ̀à tə wa, ba nə nywɩn sana, ba bʋbʋnɩ,
ba ga də́ nàŋá, ba ja lɛ tɩa nə.
21 Cɩ́gá, lìù tə nə nywɩn sana, ʋ bʋbʋnɩ,
də ʋ tə nə də́ zənzən, ʋ ja lɛ tɩa nə, kəni zʋrɩ ba tɩ̀àn nə.
Yá dwiən zənzən pɩn lɩ̀à zwɩ gangwɩran.
22 Cʋgʋ n nyɩna kwìə̀, ʋ mʋ̀ nə lɩrɩ mʋ́,
yá dàn ká mun n nuu, də ʋ nə swə, ʋ jì kazʋnʋ.
23 Kə dɩ̀àn n pɩ̀à cɩ́gá n pa n tɩ̀àn nə,
yá dàn ká kwɩ̀n wʋbʋŋa, də yənu, də pubʋŋa nə.
24 Cɩ́gá tíú nyɩna jə pupwən nəfarʋ,
yá lìù tə nə lɩrɩ wʋbʋnyiən pùə́ wá poli, ʋ yɩrɩ.
25 Pa n nyɩna də n nuu jwɛ, n yɩrɩ!
Pa kan tə nə lɩrɩ mʋ́ pùə́ poli, n yuu wa!
Kacwarʋ tʋtʋnɛɛ nə yɩ nətʋ
26 À bìú, jələ à yuu wa,
n ga twá à nabwɩɩ wa, də pupwən.
27 Cɩ́gá, kacwarʋ yɩ ndə gwàlʋ́ nə, kʋ də̀ń nə lu,
yá lìù don kan də yɩ ndə vɩlɩ pɩpɩan nə.
28 Ba yàá cɩ̀ lɩ̀à, ndə ŋwɩna nə và vɩnvan,
ba ga pɩn bara kapʋpʋ tʋŋa bacwaan.
Sanyʋrʋ tʋtʋnɛɛ nə yɩ nətʋ
29 Wàà nə yàá swɩ̀n də, yobɩbɩlʋ yí wá?
Wàà nə yàá swɩ̀n də, ʋ yà nə yə̀ə́?
Wàà nə yàá dɩ jara?
Wàà nə yàá caga, kʋ ba zwɛ̀?
Wàà nə ba yàá mà, ʋ yɩra lá tʋtʋ?
Wàà yɩ́á nə yɩ nəsɩŋa?
30 Kʋ yɩ lìù tə nə nywɩn sana máŋá mama,
də ʋ nywɩn sabagulə.
31 Dàn ká ywàń divɛn tə nə yɩ nəsɩan,
kʋ ga pupwin wùrú zʋŋa wa, n pa kʋ fɩra zʋ mʋ́.
Kʋ nywɩʋn ywán kələru wa,
32 yá kʋ yígúrə́ wa, kʋ yàá dɩŋa ndə dən nə,
kʋ ga za ndə dəkwa nə.
33 N wá na wiən gurəgurə, n yɩ́á wa,
n ga wá swɩ̀n yìə̀n tə nə ba də̀ń jə.
34 N wá ya ndə lìù nə tígə́ nɩ́á yuu bori wa, mʋʋ titəŋi wa.
35 N wá swɩ̀n, n wʋ́:
«Ba mà nə, yá kʋ ba yɩ̀!
Ba pə̀rà nə, yá kʋ wà nə won mama fwa!
À dàń ya wànɩ́ à pìí à zàn, sə à kʋ́ʋ̀ jon à nyʋn!»