Wʋbʋnyiən də wʋlʋnyiən yoo
24
1 Dàn ká pa wʋlʋnyɩna yimən ja mʋ́.Dàn ká pa n də ba twá duən.
2 Cɩ́gá, ba yɩ cʋcʋran yoo nə ba bʋŋa, ba bɩcan wa,
yá ba nii yɩ yolwana yoo nə kʋ swɩ̀n.
3 Wʋbʋŋa nə ba ma lwè dìə̀,
yá pubʋŋa nə pɩn ka janɩ dɩ̀àn.
4 Yənu nə pɩn dìə̀ dibɩa swí də wozəŋə yiri mama,
tə nə jə funə, tə ga jə fɩra.
5 Wʋbʋnyiən yɩ dɩ̀àn tíú,
yá yənu tíú dɩ̀àn yàá súrí.
6 N nə vələ kʋ̀ʋ̀, sə n dí yáá n bʋ́n zəni.
Cɩ́gá, lɩ̀à kapʋpʋ kwìə̀ pɩn lìù də́ dɩ̀àn.
7 Ləbibənu wàrɩ̀ wʋbʋŋa yìə̀n də̀ń ʋ lwarɩ.
Ʋ wà mɛ, sə ʋ súrí ʋ nii nə, bʋra bwálɩ́ nə.
8 Ba boŋə lìù tə nə bʋŋa, sə ʋ tʋn lwanɩ,
culən nəfaran cʋnʋ karnyɩna.
9 Ləbibənu pubʋŋa yɩ ka tʋn lwanɩ cɩcɩ,
yá bɩyɩrɩ də́rú yɩ lìù tə, lɩ̀à nə culi wá.
10 N nə pɩn n jɩɩn gwàrɩ̀ pucʋnɩ dɩɩn nə,
kʋ bɩrɩ də, n wʋdɩʋ ba dáá.
11 Jon lɩ̀à tə, bʋra nə ken ba tɩan jɩɩn wa.
Kə dɩ̀àn, n pa ba dʋgʋ lɩ̀à tə, ba nə pɩ̀à ba gʋ.
12 N nə swɩ̀n də, n yà yəri yoo nii nə,
lìù tə nə yə̀ə́ kʋ tə nə wulə bɩcanɩ wa, yəri cɩ́gá swɩ́án naaa?
Ʋ mʋ̀ lìù tə nə ywàŋá n yuu, yə̀ə́ yoo mama,
yá ʋ wá ŋwɩ́n lìù mama tʋtʋŋɩ ŋwɩ́rán, ʋ pa wá.
13 À bìú, də́ tʋ̀ràn! Cɩ́gá, tə ziən,
tʋnyɩnɩ ga wá ya ywánɩ́ n nii wa.
14 Yəni də wʋbʋŋa də yɩ nətʋ, kʋ pa n jə̀rə́ tə nə.
N nə jə wʋbʋŋa, n jə jwɩan,
yá n yala tə bá kwɛ̀.
15 Dàn ká tì wʋlʋŋʋ coŋi, n ma jon cɩ́gá tíú dìə̀, n tɩnɩ,
yá dàn ká cʋ̀gʋ̀ ʋ yipaa bwálɩ́ tə.
16 Cɩ́gá, cɩ́gá tíú wàá ʋ twɩ nɛɛ kapʋpʋ, yá ʋ tə wá pìí ʋ zàn,
yá wʋlʋnyɩna mʋ̀ nə tʋa yojanʋ wa, kʋ yàá də́ ba.
17 N dʋŋʋ nə tʋa, dàn ká jwɛ,
yá ʋ nə mà ʋ naa nə, dàn ká fwa pupwən.
18 Kʋ nə tà nətʋ, Ba-Yígúrə́-Jə-Tiu wá na də kʋ yɩ yolwan,
yá ʋ lɩŋa kʋ́ʋ̀ bá zàn n dʋŋʋ tə yuu wa.
19 Dàn ká pa n lɩŋa zàn lɩ̀à tə nə tʋŋa lwanɩ yuu wa,
dàn ká pa wʋlʋnyɩna yimən ja mʋ́.
20 Cɩ́gá, ləzwənlwan ba jwɩan jə,
yá wʋlʋnyɩna mɩɩ yàá zwɛ̀, ndə cànʋ́ nə də̀ŋì.
21 À bìú, dəri Ba-Yígúrə́-Jə-Tiu də pɩ̀ʋ́ fən.
Dàn ká kə n tɩ̀àn lɩ̀à tə wa, ba nə pɩ̀à ba lwàń won mama.
22 Cɩ́gá, lɩ̀à təntə wá cʋ̀gʋ̀ naa nədʋ,
yá wàà nə yə̀ə́ càn tə, Ba-Yígúrə́-Jə-Tiu, nə à yə̀ə́ pɩ̀ʋ́ nə wá kə ba nə?
WƲBƲNYƖNA SƲRAN DUƏN
23 Nə̀ń kʋ tə wʋbʋnyɩna nə kʋ́ʋ̀ swɩ̀n.
Kʋ ba ziən, sə ba kúrí lɩ̀à,
ba bʋ̀rɩ̀ ba pa ba, bʋra bwálɩ́ nə.
24 Pɩ̀ʋ́ nə swɩ̀n wʋlʋnyiən con, də ʋ jə cɩ́gá,
lalʋʋ tə yàá zɩrɩ ba kə pɩ̀ʋ́ təntə nə,
yá lʋʋ nii tə lɩ̀à lɩŋa yàá zàn ʋ yuu wa.
25 Yá pɛ̀gá tə nə kəni wʋlʋnyiən càn wa, yàá na kʋ yozəŋu.
Yá lɩ̀à yàá lòrì, sə Yɩɩ fwa zəni pɛ̀gá təntə yɩra, ba ga bwɩ ba nə.
26 Lìù tə nə swɩ̀n cɩ́gá lɩ̀à con,
bɩrɩ ʋ dabarɩ sonu.
27 Dí yáá n tanɩ n kàrá con tʋtʋŋɩ, n kə duən nə,
n ga tʋn kʋ tə mama, n nə mɛ, sə n tʋn kárá wa, n zwɛ̀.
Kʋ kwa nə, n dàń wàá n dìə̀ n lwè.
28 Dàn ká swɩ̀n n zɩgɩ n jəndon nə tʋtʋ.
N wá sɛ̀, n pa kʋ̀nkʋ̀n nan n nii wa naaa?
29 Dàn ká swɩ̀n də, kʋ tə ʋ nə tʋn n yɩra nə, n də wá tʋn ʋ yɩra,
yá n wá ŋwɩ́n kʋ tə ʋ nə fwa tə jɩŋɩ ʋ yɩra.
Yayɩnyiən tʋtʋnɛɛ nə yɩ nətʋ
30 Dɩɩn don nə, à twá yayɩnyiən kárá nii nə, à lɛ.
À twá bakʋkwanyiən divɛn tɩ̀án kárá vàn nə, à kɛ̀ń.
31 Yá à nɩ də casʋran, də gakʋkwɩnan yà nan tə pú kárá tə mama nə,
yá kapana bírə́ tə də yà nə kɩkarɩ kárá tə, yà tʋa.
32 À ywàń kárá tə, à ga bʋ́n ka yoo,
yá à nɩ kàrà kʋ wa, à pa à tɩ̀àn nə.
33 Mancɩn, n mʋ̀ wulə n zílí,
mancɩn, n kʋkwalɩ n jɩ̀àn n nyʋnɩ nə, n ja tígə́,
mancɩn, n dwɛ̀!
34 Kʋ mʋ̀ nə wá pa zʋrɩ ja mʋ́, kʋ dɩ̀ n yuu, ndə ŋwɩ̀àn nə,
yá yinəgə ga yí mʋ́, ndə ladɩa nə vɩrɩ mʋ́.