SALƲMƲN ZWANSƖSARƖ DUƏN
25
1 Nəŋə Salʋmʋn zwansɩsarɩ duən, Zwida lʋʋ nii pɩ̀ʋ́ Ezekɩasə lɩ̀à tə nə pʋ́pʋ́nɩ́.2 Yɩɩ dun yɩ ka səgə yìə̀n,
yá pɛ̀gá də dun yɩ ka gwìń yìə̀n də̀ń.
3 Lìù yəri lanworu tə danɩ nə mɛ nətʋ də tɩa,
lìù ma yəri tɩa tə də də̀ń lun nə mɛ nətʋ.
Mə nətʋ nə, lìù wàrɩ̀ pɩ̀ʋ́ də pubʋŋa ʋ lwarɩ.
4 Lɩ wárʋ́ durən,
yá cɩnayarʋ wá ja kʋ, ʋ ma fwa zʋŋa.
5 Lɩ wʋlʋnyɩna pɩ̀ʋ́ yɩra,
yá ʋ wá də́ pàrɩ̀, kʋ twá cɩ́gá cwəŋə nə,
ʋ payuu tə ga wá ja dɩ̀àn.
6 Dàn ká fwa yɩrʋ pɩ̀ʋ́ yáá con,
yá dàn ká kə n tɩ̀àn ləzwənfaran bwálɩ́ nə.
7 Cɩ́gá, ba nə wʋ́: «Bàá jə̀ń yáá!»
Kʋ kʋ́kwà ba nə wʋ́: «Zàn pɩ̀ʋ́ yáá nə, n va kwa!»
8 N yii nə dìgə̀ yoo, dàn ká bɩbarɩ, n va n tún kʋ nii bʋra bwálɩ́ nə.
Lìù don nə bɩrɩ də, kʋ tà nətʋ, bɛ̀ɛ̀ nə n wá fwa, kʋ kwa nə?
9 Swɩ̀ń n jarɩdon con, yoo tə nə ken n də wá duən nə,
n ga yá yosəgu tə, lìù don nə swɩ̀n, ʋ bɩrɩ mʋ́.
10 Kʋ nə tà nətʋ, lìù təntə nə nì kʋ, ʋ wá twɩn mʋ́,
yá n bá wànɩ́ n nii n kwɩ̀án.
11 Ba nə swɩ̀n sʋgʋ kʋ yáá wa,
kʋ yàá jə funə ndə sɩ́án lulwəŋə nə, ba nə nàn də wárʋ́.
12 Wʋbʋnyiən nə caga lìù nii nə, kʋ tíú nə cʋgʋ ʋ sʋ̀ràn tə,
tə wá ya ndə sɩ́án jɩfɩlɩ nə, nə à yə̀ə́ sɩ́án zàŋʋ́ nə, tə pa wá.
13 Tʋntʋnʋ tə nə yɩ pùə́ nədʋ tíú yàá zuri lɩ̀à tə yɩra, ba nə tʋn wá,
ndə dwà nə nɩ̀ŋà, tɩa zuri, tɩlʋŋʋ máŋá wa.
14 Lìù nə kàn nii də ʋ wá də́ zìlə́, yá ʋ ba zìlə́ won tə pɩn,
ʋ yɩ ndə dwà nə tʋ̀nɩ̀, ka fwa vʋʋ, yá ka wà nɩ̀.
15 Lìù nə jə pɩ́nʋ́ zənzən, ʋ wàá ʋ pɩn pɩ̀ʋ́ nì ʋ yoo də̀ń,
yá lìù tə ʋ sʋgʋ nə bwànà yàá kwɛn yìə̀n tə nə cà zənzən.
16 N nə nɩ tʋ̀ràn, sə n də́ kʋ mɛ,
kʋ nə tà nətʋ, n nə dí tə n ja lɛ, n wá tʋnɩ tə.
17 Dàn ká pa n nɛɛ ya lɩŋɩ n jəndon dìə̀ wa,
kʋ nə tà nətʋ, ʋ waa wá nan mʋ́, ʋ ga dʋn mʋ́.
18 Lìù nə kʋ̀nɩ̀ kʋ̀nkʋ̀n, ʋ kə ʋ jəndon nii nə,
ʋ yɩ ndə dàʋ̀, nə à yə̀ə́ kwatara sɩ̀ʋ́,
nə à yə̀ə́ cɩɩn nə, kʋ nii nə yɩ sɩsɩŋa.
19 Lìù nə jələ pwìí bələ tíú yuu wa, yojanʋ dɩɩn nə,
kʋ yɩ ndə ʋ yeli nə gùrì, nə à yə̀ə́ ʋ naa nə kɛ́n.
20 Ba nə nun pupwən nuŋi, ba bɩrɩ lìù nə, pucʋnɩ nə yí wá,
kʋ yɩ ndə ba nə kʋ̀rɩ̀ ʋ gànʋ̀ waran dɩɩn nə,
nə à yə̀ə́ ba nə ken nanyʋna nʋʋ wa.
21 Niən nə jə n dʋŋʋ, sə n pa wá wodiu, ʋ də́.
Nanyʋnɩ nə jə wá, sə n pa wá nɩ́á, ʋ nyʋn.
22 N nə tʋn kʋ nətʋ tə,
kʋ yɩ ndə məncala nə, n lwá ʋ yuu wa.
Yá Ba-Yígúrə́-Jə-Tiu wá pa mʋ́ kʋ ŋwɩ́rán.
23 Tɩjaŋa sʋ̀ràn zɩ̀n lɩ̀à lɩŋa,
ndə jɩzən saparʋ con vʋʋ nə ja dwà kʋ twi nətʋ.
24 Lìù nə wulə dìə̀ dəyuu nii nə,
kʋ kʋ́kwà ʋ də kan tə nə yɩ jarɩdɩrʋ nə wulə dìə̀ nədʋ.
25 Sʋywáŋʋ́ nə nan yiŋʋnɩ kʋ bà,
kʋ yɩ ndə ba nə pɩn nazunə lìù nə, nanyʋnɩ nə jə.
26 Cɩ́gá tíú nə vɩvaga wʋlʋnyiən yáá con,
kʋ yɩ ndə nabuliyii, nə à yə̀ə́ vɩlɩ nɩ́á nə gʋgʋlɩ.
27 Kʋ ba ziən, sə lìù də́ tʋ̀ràn zənzən,
kʋ ma ba ziən, sə lìù pɩ̀à ʋ tətə dun də.
28 Lìù tə nə wàrɩ̀ ʋ lɩŋa,
yɩ ndə tɩʋ nə, dʋŋa nə gwɛrɩ kʋ biritaŋʋ.