Ləbibənu yoo
26
1 Dun wà mɛ də ləbibənu,ndə waran də lʋan nə wà mɛ də duən nətʋ,
dwà də ga ba ziən də woceri máŋá.
2 Zɩra ba lìù də́, də ʋ nə wà yoo cʋ̀gʋ̀.
Kʋ yɩ ndə zuŋə nə piri ka jɛ́n,
nə à yə̀ə́ kalɩnlara nə zàn ka piri.
3 Kafɩʋ yɩ ba ma mà səsən, ŋwənə yɩ ba kəni bɩ̀nà nii nə,
yá dàʋ̀ yɩ kʋ wulə ləbibənən dəkoru yɩrɩ.
4 Dàn ká twá ləbibənu ləyiri yìə̀n nə, n ma le wá,
kʋ nə tà nətʋ, n də tətə wá jì ndə ʋ nə.
5 Le ləbibənu, n pa ʋ lwarɩ də ʋ yɩ ləyiru,
sə ʋ dàn ká bʋ́n də ʋ yɩ wʋbʋnyiən.
6 Lìù nə tʋn ləbibənu, kʋ yɩ ndə ʋ nə goŋi ʋ tətə nɛɛ.
Cɩ́gá, ʋ bɩcan bá zuri.
7 Zwansɩsara ba də̀ń jə, ləbibənən nii wa,
ndə gwànʋ́ nɛɛ nə bà dɩ̀àn jə nətʋ.
8 Lìù nə pɩn dun ləbibənu nə,
kʋ yɩ ndə ʋ nə vwə kapan, ʋ marɩ kapadɩlʋ wa.
9 N nə yə̀ə́ casʋʋ naa sanyʋrʋ jɩɩn wa, ʋ nə súə́, ʋ bʋbʋnɩ,
mə ləbibənu nii zwansɩsara də yɩ nətʋ.
10 N nə yə̀ə́ kwatara yáá tíú tə, ʋ nə caŋɩ lɩ̀à mama,
mə yuu-tiu tə, ʋ nə pɩn tʋtʋŋɩ ləbibənu nə, nə à yə̀ə́ ləzwənyalʋ nə, də yɩ nətʋ.
11 Ləbibənu yàá bwɛ́, ʋ tʋŋa ləyiri yìə̀n,
ndə kukurə nə yàá pìí ka va, ka də́ won tə, ka nə tʋnɩ.
12 N nə nɩ lìù, ʋ nə bʋŋa də ʋ yɩ wʋbʋnyiən,
lwarɩ də ləbibənu kʋ́kwà wá.
Yayɩnyiən tʋtʋnɛɛ nə yɩ nətʋ
13 Yayɩnyiən yàá swɩ̀n, ʋ wʋ́:
«Wojankadiu wulə cwəŋə tə wa,
Gəru wulə coŋi tə yuu wa!»
14 Bòrù yàá viviri kʋ naa yuu,
yayɩnyiən də ga tígə́ ʋ gədoo yuu, ʋ bəbəli.
15 Yayɩnyiən yàá kə ʋ jɩɩn zʋŋa wa,
yá ʋ na də ʋ gwarɩ, ʋ wàrɩ̀ ʋ jɩɩn tə, ʋ ja pìí ʋ twi ʋ nii con.
16 Yayɩnyiən bʋŋa də ʋ yɩ wʋbʋnyiən,
ʋ doni lɩ̀à barpɛ, ba nə yə̀ə́ sʋgʋ yáá.
Jara yoo
17 Lìù tə nə kəni ʋ nii jara wa, tə nə ba wá ywàŋá,
yɩ ndə lìù nə pùrì kukurə zɩan nə.
18-19 Lìù nə gɩgarɩ ʋ dabɛɛ,
ʋ ga swɩ̀n də kʋ yɩ ʋ ma bwanɩ wá,
ʋ yɩ ndə nyɩnyaŋʋ nə, ʋ nə dɩlɩ məndɛɛ,
ʋ ga tɛ cɩan, ʋ ma gwɩ lɩ̀à.
20 Dɛɛ nə zwɛ̀, mən yàá də̀ŋə̀,
yá tɩjanyiən nə tə̀lə́, jara yàá zwɛ̀.
21 Ndə cala nə pɩn mən ba də̀ŋì, dɛɛ də ga pɩn mən kwɛn tə janɩ,
mə nətʋ nə jarɩdɩrʋ pɩn jara kwɛn tə súrí.
22 Tɩjanyiən nii sʋ̀ràn yɩ ndə wodiywáŋʋ́ nə,
kʋ nə zwɩ kʋ yí yatana mama wa.
23 Lìù nii sʋ̀ràn nə ywán, ʋ bɩcan ga lwara,
kʋ yɩ ndə ba nə ja wárʋ́ də kʋ durən,
ba ma mwàlɩ̀ daʋ nagwalʋ.
24 Lìù tə nə culi lɩ̀à yàá swɩ̀n ndə ʋ swə ba,
kʋ ga yɩ gɩgara nə ʋ tanɩ, ʋ bɩcan wa.
25 Ʋ nə swə ʋ swɩ̀n sonu sʋ̀ràn, dàn ká pa tə cɩ́gá.
Cɩ́gá, ʋ bɩcan súə́ də pubʋnkʋkwɩnan kapʋpʋ.
26 Ʋ yə̀ə́ ʋ nə wá səgə ʋ dʋŋɩ tə nətʋ,
yá lɩ̀à tə mama wá bà ba lwarɩ ʋ wʋlʋŋʋ tə.
27 Lìù nə kʋa zanba gwàlʋ́,
ʋ tətə nə yàá pìí ʋ tʋ kʋ wa,
yá kapan nəfarʋ tə lìù nə bəbəli,
sə ʋ ma gʋ lɩ̀à, yàá pìí kʋ tʋ ʋ tətə yuu wa.
28 Kʋnkʋnʋ culi lɩ̀à tə, ʋ nə kʋ̀nɩ̀ ʋ kəni ba nii nə,
yá nii tə nə swɩ̀n gɩgara sʋ̀ràn cʋ̀gà lɩ̀à.