27
1 Dàn ká man barɩ jwɩan yoo yɩrɩ.Cɩ́gá, n yəri yoo tə nə wá tʋn zə̀n dɩɩn tə tətə wa.
2 Yá sə lɩ̀à duən nə bʋ n nə,
n tətə dàn ká bʋ n tɩ̀àn nə.
Yá sə vee nə zɩ̀n mʋ́ yɩɩ nə,
n tətə dàn ká zɩ̀n n tɩ̀àn yɩɩ nə.
3 Kapan nəfarʋ du, kasɩlʋ də ma du,
yá ləyiru lɩŋa dun dwə tə mama.
4 Lɩŋa tʋ̀tʋ̀nán lwara zənzən,
lɩŋa ga yɩ ndə navoo nə,
yá wàà nə wàá wʋgwɩʋ yìə̀n ʋ pɩ́nɩ́?
5 Lìù nə caga ʋ don nii nə, nəpon nəpon,
kʋ kʋ́kwà sonu tə nə səgə.
6 N dabɛɛ nə cʋ̀gʋ̀ n pùə́ nə, n tə wàá ʋ dɩ̀àn n janɩ,
yá n dʋŋʋ mʋ̀ nə pùrì mʋ́, ʋ kə ʋ nyʋnɩ nə, sə n cɩ̀ n tɩ̀àn nə.
7 Lìù tə nə súə́, yáá tə̀lə́ də tʋ̀ràn də tətə,
yá lìù tə mʋ̀ niən nə jə, na də wodicɩcaʋ də tətə ywán.
8 Lìù nə ywaŋa lʋʋ nii wa, kʋ nə ŋʋ́ná də ʋ sàń,
ʋ yɩ ndə zuŋə nə ywaŋa bwálɩ́ nə, kʋ nə ŋʋna də ka pwalʋ.
9 Nʋtʋrə də tɩralɩ poli pùə́,
yá dabɛɛ sonu kʋ́kwà tɩntɩan kwìə̀.
10 Dàn ká vɩ n dabɛɛ, nə à yə̀ə́ n nyɩna dabɛɛ, n dʋgʋ.
Yá dɩɩn tə yoo nə yí mʋ́, dàn ká twarɩ n nubiu nɛɛ.
Cɩ́gá, jəndon kʋ́kwà nubiu tə, ʋ bwálɩ́ nə ŋʋ́ná.
11 À bìú, ya wʋbʋnyiən, n ga poli à pùə́,
yá lìù nə twɩn nə, à wá wànɩ́ à le.
12 Swɩan tíú nə nɩ yolwan də kʋ bɩ̀àn,
ʋ yàá səgə kʋ yáá nə,
yá lɩ̀à tə nə yəri yoo də̀ń mʋ̀ yàá va ba jəri kʋ,
yá kʋ yàá kə ba càn wa.
13 Jon lìù tə gànʋ̀, ʋ nə zɩgɩ vee jɩŋɩ jɩrɩmʋ.
Jon kʋ tíú wiən, n tún talɩma, ʋ nə ken waa vee tə nə yɩrɩ.
14 Lìù nə baa ʋ kə yɩɩ nə, ʋ ma jʋn ʋ jəndon, jɩjʋ fuən fuən,
kʋ yɩ ndə zɩra nə.
15 Kan jara yɩ ndə dəyuu fɩrʋ nə,
kʋ curi, kʋ ba zɩga, dwà dɩɩn nə.
16 Lìù nə pɩ̀à, sə ʋ kwɛ̀ tə, kʋ yɩ ndə ʋ nə pɩ̀à, sə ʋ ja vʋʋ,
nə à yə̀ə́ ʋ nə pɩ̀à, sə ʋ ja nʋnɩa də ʋ jɩɩn.
17 Lìù nə pʋrɩ ʋ don yɩ́á,
ndə lugu nə lɩ lugu nii nətʋ.
18 Lìù tə nə tanɩ kapɩrʋ wá də́ kʋ lənə,
yá lìù tə nə ywàŋá ʋ yuu tíú yuu zəni, wá na dun.
19 Ləzwənə yàá na ʋ pubʋŋa yìə̀n, ʋ don pubʋŋa wa,
ndə lìù nə yàá na ʋ yáá, nɩ́á wa nətʋ.
20 Ləzwənə yɩ́á ba wiən ywàŋʋ́ swí, ndə ciru* də tɩga bwálɩ́ nə ba tɩga swí nətʋ.
21 Ba yàá nyɩan sɩ́án də wárʋ́ líí mən wa, ba ma lwarɩ tə nə ziən nətʋ.
Yá ləzwənə mʋ̀ yɩ kʋ tə, lɩ̀à nə swɩ̀n ʋ yuu wa, nə yàá bɩrɩ ʋ dun.
22 N nə swə, n zwa ləyiru də wobɩa zɔɔ wa, də zwabʋna,
ʋ ləyiri tə tə bá nan tə yá wá.
23 Yəni n piə nədʋ mama nə yɩ nətʋ,
n ga ywàń n vàná mama yuu zəni.
24 Cɩ́gá, jɩjə ba lá mɛn,
dun yupuu də ma tà nɩbara də nɩ̀án won.
25 Gɩan kárɩ́ gaʋ tə, yá máŋá tə, gadʋn nə wulə kʋ pɛ́n,
sə n dàń pɛ̀ pɛɛn yuu gakʋrʋ tə.
26 Kʋna pee, sə n ja tə bɔɔ, n sʋ gànàn, n zʋ,
n ga kʋna bʋtɩlan, n yoli, n ma yə̀ kárá.
27 N bʋ̀nɩ̀ yɩlɩ nɩ́á wá ya dánɩ́ zənzən, n ma kʋna n də n dìə̀ lɩ̀à,
yá tə mʋ̀ nə wá ya n tʋtʋnbwɩɩ də nii wodiu.