28
1 Wʋlʋnyiən yàá dəri, də lìù wà wá dɩŋɩ,yá cɩ́gá tɩ̀án mʋ̀ jə ba tɩ̀àn dɩ̀àn, ndə gəbala nə.
2 Jara nə zàn lʋʋ nii wa, pɛ̀gá yàá dáá kʋ wa,
yá yáá tíú nə jə pubʋŋa də yənu, ʋ lʋʋ nii ba vuvugə.
3 Lìù nə yɩ zʋrʋ, ʋ ga fɩfɩn lalaŋa,
ʋ yɩ ndə dwafarʋ nə cʋ̀gʋ̀ kárɩ́ wiən.
4 Lɩ̀à tə nə vɩ nii yàá bwɩ wʋlʋnyiən nə,
yá ba tə nə zìlí nii yàá ta ba zɩgɩ ʋ nə.
5 Ləzwənkʋkwɩnan yəri ká twá cɩ́gá nə də̀ń,
yá lɩ̀à tə mʋ̀ ba nə pɩ̀à, sə ba zìlí Ba-Yígúrə́-Jə-Tiu, yə̀ə́ yoo mama də̀ń.
6 Lìù nə yɩ zʋrʋ, ʋ ga yɩ təgətəgə,
ʋ kʋ́kwà jɩjə tíú tə nə tʋŋa yogugwələn.
7 Bìú tə nə sɛ̀ nii jə pubʋŋa,
yá bìú tə nə vəli də lakʋkwɩnan, kəni cavɩra ʋ nyɩna nə.
8 Lìù nə pɩn lɩ̀à jɩŋɩ səbiu ʋ con, də kʋ yuu nywarɩ zənzən, ʋ ma tún jɩjə,
ka yɩ ʋ tún ʋ pa lìù tə nə, ʋ nə dəri lalaŋa yinəgə.
9 Lìù nə swɩn ʋ zɩan, ʋ dàn ká nì Yɩɩ nii tə,
ʋ yɩjʋnɩ də tətə yɩ yobalwarʋ Yɩɩ yáá con.
10 Lìù tə nə gɩgarɩ cɩ́gá tɩ̀án, ʋ kəni yokʋkwɩnan wa,
yàá tʋ zanba gwàlʋ́ tə wa, ʋ nə kʋa.
Yá lɩ̀à tə nə yɩ təgətəgə mʋ̀ yàá də́ ywánɩ́.
11 Jɩjə tíú yàá bʋŋa də ʋ yɩ wʋbʋnyiən,
yá lalaŋʋ tə nə jə pubʋŋa, wàá ʋ də̀ń nə ʋ janɩ.
12 Cɩ́gá tɩ̀án nə dí dɩ̀àn, kʋ yàá yɩ pupwən nəfarʋ,
yá wʋlʋnyɩna nə dí pàrɩ̀, lìù mama yɩ ʋ dəri ʋ səgə.
13 Lìù tə nə səgə ʋ yolwana, yoo ba kwɛn,
yá ba yàá fwa pubwanʋ lìù tə yɩra,
ʋ nə swɩ̀n ʋ yolwana ʋ bɩrɩ,
ʋ ga yá tə fwaŋʋ nə.
14 Pupwən lìù nə yɩ lìù tə fən nə jə wá máŋá mama, sə ʋ tʋn yolwan.
Yá yobɩbɩlʋ wá yí lìù tə mʋ̀, ʋ nə yɩ zɩbanənyiən.
15 Wʋlʋnyiən nə də́ pàrɩ̀ labwana yuu wa,
kʋ yàá yɩ ndə gəru nə baa,
nə à yə̀ə́ kənyenkuru nə pùrì wiən.
16 Yáá tíú nə ba pubʋŋa jə, ʋ yàá kə càn lɩ̀à nə zənzən,
yá lìù tə nə culi gɩgɩrɩ wiən mɩɩ wá ya danɩ lʋʋ wa.
17 Á yágá lagʋrʋ, sə ʋ lagʋrɩ tə yoo wʋwalɩ wá,
kʋ pa ʋ dəri ʋ va, ʋ yí ʋ tɩan.
Lìù mama dàn ká cɩ̀ ʋ yáá nə!
18 Lìù tə nə yɩ təgətəgə, wá jon ʋ tɩ̀àn,
yá lìù tə nə tì coŋi gugolən bələ, wá tʋ ka don wa.
19 Lìù tə nə varɩ ʋ kárá, yàá na wodiu,
yá lìù tə nə twá yoywanan nə, yàá də́ yinəgə zənzən.
20 Ba fwa zəni zənzən lìù tə yɩra, ʋ nə yɩ pùə́ nədʋ tíú,
yá lìù tə mʋ̀ nə bɩbarɩ, sə ʋ jì jɩjə tíú, bá jɛ́n càn yáá nə.
21 Kʋ ba ziən, sə ba kúrí lɩ̀à duən wa,
yá lìù don yàá tàà wodiu mancɩn yɩrɩ, ʋ tʋn yolwan.
22 Lìù tə, lɩ̀à wiən yimən nə jə wá, yàá bɩbarɩ ʋ pɩ̀à jɩjə,
yá ʋ kʋ́ʋ̀ ba bʋŋa də, zʋrɩ wá ja wá.
23 Lìù nə caga ʋ don nii nə, ba yàá pìí ba sóní duən,
ba doni lìù tə, ʋ nə gɩgarɩ ʋ don.
24 Lìù tə nə ŋwɩ̀n ʋ nyɩna də ʋ nuu wiən,
ʋ ga swɩ̀n də, kʋ tà yolwan,
ʋ də cʋcʋnyiən mɛ yɩ won nədʋ.
25 Lìù tə won nə ba ʋ yii swí, dɩ jara,
yá wiən yàá bʋ́rɩ́ lìù tə mʋ̀, ʋ nə jələ Ba-Yígúrə́-Jə-Tiu yuu wa.
26 Lìù tə nə jələ ʋ tətə pubʋŋa yuu wa, yɩ ləyiru,
yá lìù tə nə tʋŋa də wʋbʋŋa yàá jɛ́n yolwan yáá nə.
27 Won bá mùrì lìù tə nə pɩn wiən zʋra nə,
yá zɩra kapʋpʋ wulə lìù tə mʋ̀ yuu wa, ʋ nə pwí ʋ yɩ́á ba yuu wa.
28 Wʋlʋnyɩna nə dí pàrɩ̀, lìù mama yɩ ʋ dəri ʋ səgə,
yá ba nə tɩ, cɩ́gá tɩ̀án yàá pùlì.