29
1 Lìù tə, ʋ nə ba sɛ̀, sə ba caga ʋ nii nə,ʋ wá cʋ̀gʋ̀ ʋ tɩ̀àn naa nədʋ, kʋ ba tɩ̀ʋ́ jə.
2 Cɩ́gá tɩ̀án nə dáá, lalʋʋ tə yàá fwa pupwən,
yá wʋlʋnyiən nə dí pàrɩ̀, lalʋʋ tə yɩ ba kwi, də ba sisigə.
3 Lìù tə nə swə wʋbʋŋa, poli ʋ nyɩna pùə́,
yá lìù tə nə vəli kacwaran con, cʋ̀gà ʋ nyɩna jɩjə.
4 Pɩ̀ʋ́ nə tì cɩ́gá cwəŋə, ʋ ma də́ pàrɩ̀, ʋ lʋʋ nii ba vuvugə,
yá ʋ nə lɛ́ lanpoo zənzən, ʋ yàá cʋ̀gʋ̀ ʋ lʋʋ nii tə.
5 Lìù nə gɩgarɩ ʋ jəndon,
kʋ yɩ ŋoni nə ʋ kəni kʋ tíú nɛɛ də̀ń.
6 Nyalɩ wulə wʋlʋnyiən wʋlʋŋʋ tʋ̀tʋ̀nán wa,
yá cɩ́gá tíú mʋ̀ yàá də́ dɩ̀àn, ʋ ga jwɛ.
7 Cɩ́gá tíú yə̀ə́ lalaŋa yoo,
yá wʋlʋnyiən mʋ̀ ba kʋ pubʋŋa təntə jə.
8 Tɩjanyɩna yàá mà mən ba lwá tɩʋ nə,
yá wʋbʋnyɩna mʋ̀ yàá pa lɩŋa tʋ.
9 Wʋbʋnyiən də ləbibənu nə vəli bʋra,
wʋbʋnyiən tə lɩŋa nə zàn, nə à yə̀ə́ ʋ nə mʋŋa, ʋ tə wàrɩ̀ sìə́ ʋ nɩ.
10 Lagʋra culi lìù tə nə yɩ təgətəgə,
yá cɩ́gá tɩ̀án mʋ̀ swə wá.
11 Ləbibənu yàá bɩrɩ ʋ waa yìə̀n mama,
yá wʋbʋnyiən mʋ̀ yàá ja ʋ nyiən, ʋ waa con.
12 Pɩ̀ʋ́ nə cʋga kʋ̀nkʋ̀n sʋ̀ràn,
ʋ kwa lɩ̀à mama yàá jì wʋlʋnyɩna.
13 Zʋrʋ də lìù tə nə vɩrɩ lɩ̀à mɛ jə won nədʋ,
Ba-Yígúrə́-Jə-Tiu nə pori ba mɛ yɩ́á.
14 Pɩ̀ʋ́ nə bʋ̀rɩ̀ lalaŋa bʋra kʋ twá cɩ́gá nə,
ʋ pàrɩ̀ wá ja dɩ̀àn, máŋá mama wuuu.
15 Kafɩʋ də bɩra pɩn wʋbʋŋa,
yá bisɩmaa tə nə dí ʋ yuu, kəni cavɩra ʋ nuu nə.
16 Wʋlʋnyɩna nə dáá, yolwana də yàá pùlì zənzən,
yá cɩ́gá tɩ̀án wá na wʋlʋnyɩna tʋrɩ.
17 Pá n bìú, n kə cwəŋə wa,
yá ʋ wá pa mʋ́ bɩcan sìə́,
ʋ ga pa n ja pupwən nəfarʋ.
18 Jwɩan yoo pubʋŋa nə tə̀lə́, lalʋʋ yàá gugurə.
Pupwən lìù nə yɩ lìù tə, ʋ nə zìlí Yɩɩ nii* tə.
19 Kʋ tà sʋgʋ cɩcɩ nə, ba ma kəni yoŋu cwəŋə wa.
Ʋ nə swə ʋ nə̀ń kʋ də̀ń də, ʋ tə bá zìlí nii.
20 N nə nɩ lìù, ʋ nə ba bʋŋa, ʋ ma swɩ̀n sʋgʋ,
lwarɩ də ləbibənu kʋ́kwà wá.
21 Ba nə pʋa yoŋu ʋ zandʋan nə,
ʋ yàá bà ʋ jələ ʋ tɩ̀àn, ndə dìə̀ tə bìú nə.
22 Lɩŋa tíú yàá pa jara kwɛn tə súrí,
yá lìù tə ʋ lɩŋa nə dáá yàá tʋn yolwana kapʋpʋ.
23 Fwìə́ pɩn lìù də́ cavɩra,
yá lìù tə nə muŋə ʋ tɩ̀àn, yàá na dun.
24 Lìù tə nə twá ʋ də́ ŋwɩ̀àn wiən, ba ʋ tɩ̀àn swə.
Ʋ yàá nì də ba zɩrɩ ba keni,
yá ʋ ba yoo mama swɩ̀n.
25 Lìù nə dəri ləzoni fən,
kʋ yɩ ndə nyalɩ nə, ʋ nɛɛ də̀ń,
yá yolwan bá yí lìù tə mʋ̀,
ʋ nə yá ʋ tɩ̀àn Ba-Yígúrə́-Jə-Tiu jɩɩn wa.
26 Lɩ̀à kapʋpʋ yàá pɩ̀à, sə ba na yuywaŋʋ pɩ̀ʋ́ yáá con,
yá Ba-Yígúrə́-Jə-Tiu nə bʋ̀rɩ̀ ba lìù mama bʋra.
27 Cɩ́gá tɩ̀án culi lìù tə nə tʋŋa yolwana,
yá wʋlʋnyiən də culi lìù tə nə tì cɩ́gá cwəŋə.