AGURƏ SƲRAN
30
1 Yake bìú Agurə sʋ̀ràn.Nə̀ń zwansɩsarɩ tə bɛɛ təntə nə swɩ̀n Yɩtɩyɛlə con.
Ʋ swɩ̀n tə Yɩtɩyɛlə də Ukalə con.
2 Cɩ́gá, à yɩ ləyiru à doni lìù don mama,
yá à ba ləzwənə pubʋŋa jə.
3 À wà wʋbʋŋa kàrà kwè,
kʋ pa à ba bɩcapon tɩ̀án yənu jə.
4 Wàà nə dɩga yɩɩ nə, ʋ ga pìí ʋ cú?
Wàà nə jɩn vʋʋ, ʋ kə ʋ jɩgulə wa?
Wàà nə pipini nɩ́á də ʋ gànʋ̀?
Wàà nə tún tɩa tə nii sɩswɩan tə mama?
Kʋ tíú yɩrɩ nə yɩ bɛ̀? Yá ʋ bìú yɩrɩ nə yɩ bɛ̀ɛ̀?
N nə yə̀ə́, sə n swɩ̀n, n bɩrɩ nə!
5 Yɩɩ sʋ̀ràn tə mama yɩ cɩ́gá cɩcɩ.
Ʋ yɩ ndə nàtànà nə, ʋ cɩ̀ lɩ̀à tə nə, ba nə kwálɩ́ ba yuu, ʋ con.
6 Dàn ká súrí won mama ʋ sʋ̀ràn tə nə.
Kʋ nə tà nətʋ, ʋ wá caga n nii nə, yá n wá jì kʋ̀nkʋ̀nʋ.
7 À tíú Yɩɩ, à lòrì wiən bələ, n con.
Pa nə wiən təntə, də à tə wà tɩ.
8 À lòrì, sə n cɩ̀ nə də yogugwələn, də kʋ̀nkʋ̀n sʋ̀ràn.
Dàn ká pa zʋrɩ ja nə, dàn ká pa nə jɩjə də zənzən.
Pa nə à nii wodiu cɩcɩ, kʋ nə wá mɛ à diŋə.
9 Cɩ́gá, wiən nə bʋ́rɩ́ nə, à wàá à swɩ̀n, à wʋ́:
«Ba-Yígúrə́-Jə-Tiu nə yɩ wàà? À mʋ̀ yəri wá!»
Zʋrɩ də nə kʋ́ʋ̀ jə nə zənzən, à wàá à ŋwɩ̀n,
yá kʋ wá pa, à cʋ̀gʋ̀ n mʋ̀, à Yɩɩ tə yɩrɩ nə.
10 Dàn ká də́ tɩjaŋa tʋtʋnʋ də̀ń nə, ʋ yuu tíú con.
Kʋ nə tà nətʋ, tʋtʋnʋ tə wá zɩrɩ ʋ kə n nə, yá kʋ wá ya n yuu yoo.
11 Lɩ̀à wulə, ba nə zɩrɩ ba kəni ba nyɩna nə,
ba ga ba yozəŋu swɩ̀n ba pɩn ba ninə nə.
12 Ba duən də wulə, ba nə bʋŋa də ba yɩ parɩ,
yá ba wà ba tɩ̀àn kwɛn ba lɩ durən yìə̀n wa.
13 Ba duən də ma wulə, ba nə jə yigwənə,
ba ga bʋŋa də ba dwə lɩ̀à tə mama.
14 Ba duən də tə wulə, ba yelə nə yɩ ndə kwatara sɩ̀án nə,
ba nipɛɛ kurən ga yɩ ndə sɩ̀án nə.
Ba yàá cʋ̀gà yinənyɩna, ba pɩn ba jɛ́n tɩa yuu wa,
ba ga pɩn zʋra də jɛ́n ləzoni dwíí wa.
ZWANSƖSARƖ TƏ NƏ GALƖ WIƏN
15 Kasɩlamankʋʋ jə bwɩ̀ɩ́ bələ, ba yɩrɩ nə yɩ «Pa nə!» də «Pa nə!»
Wiən batwa nə wulə, tə nə ba swí mama.
Tə yí banɩa də tətə, tə nə ba swɩ̀n də tə súə́ mama.
16 Tə mʋ̀ nə yɩ ciru*, də kadɩŋʋ,
də tɩa, ka nə ba nɩ́á swí,
də mən, tə nə ba swɩ̀n də, «kʋ mɛ nətʋ!» mama.
17 Lìù tə, ʋ nyɩna nə ba ʋ yii swí,
ʋ ga ba ʋ nuu nii zìlí,
nacoru nii batɩɛnkanan nə wá lá ʋ yɩ́á,
dələn ga də́ wá.
18 Yìə̀n batwa nə wulə, tə nə dwə nə.
Tə yí banɩa də tətə, à nə ba tə də̀ń nə̀ń.
19 Tə mʋ̀ nə yɩ zənpuu foo lanworu wa,
də dən foo, pɩ̀ʋ̀ yuu wa,
də nɩ́á yuu bori foo, mʋʋ titəŋi wa,
də bɛɛ foo, kan con.
20 Nə̀ń kacwarʋ tʋtʋnɛɛ nə yɩ nətʋ:
Ʋ yàá cwàrɩ̀, ʋ zàn ʋ kwɛn ʋ tɩ̀án,
ʋ ga swɩ̀n, ʋ wʋ́: «À wà yolwan tʋn!»
21 Wiən batwa nə wulə, tə nə wàá tə pɩn tɩa tə vuvugə.
Tə yí banɩa də tətə, tɩa tə nə wàrɩ̀ ka pɩ́nɩ́.
22 Tə mʋ̀ nə yɩ yoŋu tə, ʋ nə pìí ʋ jì pɩ̀ʋ́,
də nyɩnyaŋʋ tə, ʋ nə də́ ʋ swí ʋ fɩra,
23 də kakʋkwɩʋn tə, ʋ nə nɩ barɩ, ʋ swe,
də tʋtʋnbʋa tə, ʋ nə jon ʋ kadiənuu bwálɩ́.
24 Wonəŋə yirə banɩa nə wulə,
tə nə yɩ tɩa yuu wonəŋə tə mama wa nəmɛɛ,
yá tə mʋ̀ ga nə jə wʋbʋŋa zənzən.
25 Tə mʋ̀ nə yɩ mɩ̀mɩ̀nɩ̀.
Tə ba dɩ̀àn jə, yá tə yàá tanɩ tə wodiu tə tún fʋʋ nii nə.
26 Tə duən nə yɩ nyana.
Tə də ba dɩ̀àn jə, yá tə yàá kə tə yipaa bwálɩ́ pɩ̀ràn kwə̀lə́ wa.
27 Tə duən də nə yɩ jə̀rə̀n.
Tə ba pɩ̀ʋ́ jə, yá tə yàá tɩɩn duən nə, tə vəli, ndə kwatara púlə́ nə.
28 Kʋ don də nə yɩ navɩnvɩna.
Ka yɩ won, lìù nə wàá ʋ tì ʋ jɩɩn wa,
yá ka wulə pɛ̀gá də tətə dìì wa.
29 Wonəŋə batwa nə wulə, tə nə yə̀ə́ vəli.
Tə yí banɩa də tətə, tə vəli nə jə fɩra.
30 Kʋ yɩ gəru.
Kʋ mʋ̀ nə yɩ ganaŋa tə dɩ̀àn tíú.
Kʋ ba won mama yàá nə dəri.
31 Kʋ don nə yɩ səsən.
Ka yɩ vànɩ́ tə, kʋ tàŋá nə jə dɩ̀àn, nə à yə̀ə́ bʋtɩlʋ.
Kʋ dàń súrí pɩ̀ʋ́ nə, ʋ nə wulə ʋ kwatara yáá.
32 N nə yɩn ləyiru, kʋ pa n fwa fwiə,
n ga bʋ́n yolwan fwaŋʋ,
n dàń mɛ, sə n cɩ̀ n nii sʋ̀ràn nə.
33 Cɩ́gá, ba nə mà nayɩla, nayɩlɩnʋga yàá nan tə wa,
ba nə mà mɩɩ nə, kʋ yàá cɩn jana,
yá ba nə zɩ̀n lìù lɩŋa, kʋ yàá nan jara nə.