LEMUWƐLƏ SƲRAN
Kwìə̀ tə pɩ̀ʋ́ nuu nə pɩn wá
31
1 Pɩ̀ʋ́ Lemuwɛlə sʋ̀ràn. Tə yɩ zwansɩsarɩ, ʋ nuu nə ma kwè wá.2 Bɛ̀ɛ̀ nə à wá swɩ̀n n con, à bìú?
Bɛ̀ɛ̀ nə à wá swɩ̀n n con, à kwíə́ də̀ń bìú?
Bɛ̀ɛ̀ nə à wá swɩ̀n n con, à nipoli bìú?
3 Dàn ká cʋ̀gʋ̀ n dɩ̀àn kana yɩra.
Dàn ká yá n pa ba mʋ̀ kana tə,
ba nə gɩgarɩ pɛ̀gá ba dʋga, kə mʋ́ cwəŋə nə.
4 Lemuwɛlə, kʋ ba ziən,
kʋ ba ziən, sə pɛ̀gá nyʋn divɛn,
kʋ ga ba ziən, sə pàbɩ̀á nyʋn sana tə nə dà.
5 Cɩ́gá, ba nə nyʋan sana,
ba wá swɛ̀ɛ́ nii tə, ba nə mɛ sə ba twá kʋ nə,
yá ba kʋ́ʋ̀ bá bʋ̀rɩ̀ yinənyɩna bʋra, kʋ twá cɩ́gá nə.
6 Á pɩan sana tə nə dà, lìù tə mʋ̀ʋ́ nə, ʋ nə wulə tɩan jɩɩn wa,
á ga pa divɛn lìù tə nə, ʋ nə wulə pucʋnɩ wa.
7 Kʋ tíú nə nyʋan tə, ʋ wá swɛ̀ɛ́ ʋ yinəgə tə,
yá ʋ ga kʋ́ʋ̀ bá pìí ʋ lìí ʋ càn tə yoo.
8 N mʋ̀ dàń súrí n nii,
n swɩ̀n n jon lìù tə nə wàrɩ̀ ʋ swɩ̀n, ʋ joŋə ʋ tɩ̀àn.
n ga kə n nii lɩ̀à tə kwa, ba nə vɩga ba dʋgʋ.
9 Súrí n nii, n bʋ̀rɩ̀ bʋra, kʋ twá cɩ́gá nə,
n ga kə n nii yinənyiən də zʋrʋ kwa, də ba nə jə cɩ́gá.
Kazəŋu tʋtʋnɛɛ nə yɩ nətʋ
10 Wàà nə wàá kazəŋu ʋ nɩ?
Kazəŋu funə dwə bwanzɩla zənzən.
11 Ʋ barɩ jələ ʋ yuu wa, də ʋ waa mama,
kan təntə ga jə nywarɩ, ʋ pa wá.
12 Ʋ yàá tʋŋa zəni ʋ barɩ yɩra,
ʋ ba yolwan tʋŋa, ʋ lʋʋ wúlú mama wa.
13 Kan təntə yàá pɩ̀à vàná bɔɔ, də ganbʋa gaŋoni,
ʋ ma tʋŋa jɩɩn tʋ̀tʋ̀nán də yawala.
14 Ʋ yɩ ndə yolu nɩ́á yuu bori nə,
ʋ wodiu yɩ ʋ pɩn kʋ naŋa yiŋʋnɩ, kʋ twi.
15 Ʋ yàá zàn də tɩa tə wà pʋrɩ,
ʋ fwa wodiu, ʋ pa ʋ dìə̀ lɩ̀à nə,
ʋ ga tara tʋ̀tʋ̀nán, ʋ pa ʋ tʋtʋnbwɩɩ nə.
16 Ʋ bʋ́n kárá yoo, ʋ ga yə̀ ka,
ʋ ja səbiu tə, ʋ nə tʋn ʋ na,
ʋ ma cwɛn divɛn tɩ̀án ka wa.
17 Ʋ yàá vwa ʋ damara, ka ja ʋ tàŋá,
ʋ ma tʋŋa də dɩ̀àn.
18 Ʋ na də, ʋ yìə̀n jə yáá,
yá ʋ cànʋ́ ba də̀ŋì tɩtɩn nə.
19 Ʋ jɩ̀àn yàá vəri vàná bɔɔ gaŋoni,
ʋ jɩfwɩ ga swɩ gànàn.
20 Ʋ tʋŋa zìlə́ yinənyɩna yɩra,
ʋ ga pɩn wiən zʋra nə.
21 Waran ka ja ʋ dìə̀ lɩ̀à fən ba wá jə.
Cɩ́gá, ʋ dìə̀ lɩ̀à mama zʋa gandala.
22 Ʋ swɩ gansarɩ,
ʋ ga zwɩ ganbʋa gànàn, tə kwənə nə dáá.
23 Ba zìlí ʋ barɩ tɩʋ tɩ̀án tə wa,
ba nə jəni tɩʋ tə mimii nə, ba bʋ̀rɩ̀ bʋra.
24 Ʋ swɩ ganzwɩran, ʋ yoli,
ʋ ga yoli vorən, baywələ tə yuu wa, ba nə kɛ̀ń.
25 Ʋ jə dɩ̀àn də dun,
yá ʋ yàá mʋn, də ʋ nə bʋ́n jwɩan yoo.
26 Ʋ swɩ̀n ʋ sʋgʋ də wʋbʋŋa,
ʋ ga yə̀ə́ ka bɩrɩ yoo lìù nə, də wʋywaŋʋ*.
27 Ʋ ywàŋá won tə mama yuu, kʋ nə tʋŋa ʋ dìə̀ wa,
ʋ ga ba yayɩa fwa ʋ nii wodiu yoo wa.
28 Ʋ bɩ̀á yàá zɩ̀n ʋ yuu yɩɩ nə,
ʋ barɩ də ga bwɩ ʋ nə, ʋ wʋ́:
29 «Kana dáá ba tʋtʋnɛɛ nə ziən,
yá n də kʋ́ʋ̀ dwə ba mama!»
30 Bwaŋa yɩ gɩgara, yáá zəni də ga yɩ tʋtʋ.
Yá kan tə mʋ̀, ʋ nə dəri Ba-Yígúrə́-Jə-Tiu fən, mɛ sə ba bʋ ʋ nə.
31 Á pɩan wá ʋ tʋtʋŋɩ tə ŋwɩ́rán,
sə tɩʋ tə mama ga bʋ ʋ nə, ʋ tʋtʋnzəŋə tə yɩrɩ.