Zɔbə sɛ̀ də ʋ ba yənu jə
42
1 Zɔbə dàń le Ba-Yígúrə́-Jə-Tiu, ʋ wʋ́:2 «À dàń yə̀ə́ də n jə yoo mama dɩ̀àn,
yá pubʋŋa táná tə̀lə́,
n nə wàrɩ̀ n pɩn ka nii swí.
3 Wàà nə ja ləyiri sʋ̀ràn
ʋ ma gugurə à wʋbʋŋa?
Cɩ́gá, à swɩ̀n yìə̀n à nə yəri.
Tə yɩ yogwaran tə pa nə,
à ba tə də̀ń nə̀ń.
4 N swɩ̀n à con, n wʋ́:
“Cʋgʋ à con sə à swɩ̀n!
À wá bwe mʋ́ bwiə, sə n le nə.”
5 À zɩɩn yà nì də ba swɩ̀n n yoo,
yá sɩ́ʋ́n nə, à yii dàń dìgə̀ mʋ́.
6 Kʋ mʋ̀ nə pɩn
à pùə́ cʋ̀gʋ̀ à tɩ̀àn yuu wa zənzən,
yá à mun à tɩ̀àn,
à ga jə̀ə́ pùrú də tʋntʋnan wa.»
TALƖKWA SƲRAN
(42.7-17)
Yɩɩ pìí ʋ kwɛn Zɔbə
7 Ba-Yígúrə́-Jə-Tiu nə swɩ̀n sʋ̀ràn təntə Zɔbə con kwa nə, Ba-Yígúrə́-Jə-Tiu swɩ̀n Elifazə con, ʋ nə nan Teman, ʋ wʋ́: «À lɩŋa kwé ndə mən nə, n də n dabara bələ tə yuu wa, á nə wà à yoo swɩ̀n də pùə́ nədʋ, ndə à tʋtʋnʋ Zɔbə nə fwa kʋ nətʋ yɩrɩ. 8 Sɩ́ʋ́n nə, á jana nabɩran barpɛ də pabɩran barpɛ, á ja va à tʋtʋnʋ Zɔbə con, á ma fwa joŋi ba nə sʋ̀rɩ́* á tətə yuu yɩrɩ. À tʋtʋnʋ Zɔbə wá lòrì nə ʋ pa aba, yá à wá taa ʋ yɩrɩ, à kʋ́ʋ̀ ba tʋn kʋ tə nə mɛ də á ləyiri yìə̀n tə á yɩra. Cɩ́gá, á wà à yoo swɩ̀n də pùə́ nədʋ, ndə à tʋtʋnʋ Zɔbə nə fwa kʋ nətʋ.»
9 Elifazə ʋ nə nan Teman, də Bilədadə, ʋ nə nan Swuwa, də Sofarə, ʋ nə nan Naama dàń vəli Zɔbə con. Ba tʋn kʋ tə mama Ba-Yígúrə́-Jə-Tiu yà nə swɩ̀n ba con sə ba tʋn, yá Ba-Yígúrə́-Jə-Tiu dàń jələ Zɔbə yɩlori tə.
10 Zɔbə nə lòrì Yɩɩ ʋ pa ʋ dabara tə nə ʋ zwɛ̀ kwa nə, Ba-Yígúrə́-Jə-Tiu pìí ʋ kwɛn ʋ yoo mama, ʋ pa kʋ ya zəni. Ba-Yígúrə́-Jə-Tiu pìí ʋ pa wá won tə mama ʋ yà nə jə dəkurən bələ. 11 Ʋ nubɩa tə mama, də ʋ nakwana tə mama, də lɩ̀à tə mama ʋ yà nə yə̀ə́ fuən nə, twi ba də́ wodiu də wá, ʋ dìə̀ wa. Ba ken ʋ pupuə, ba ga kòrì wá lɛɛ tə mama yɩrɩ, Ba-Yígúrə́-Jə-Tiu yà nə pɩn tə yí wá. Ba lìù mama pɩn wá səbilugu nədʋ də sɩ́án kwanɩ.
12 Ba-Yígúrə́-Jə-Tiu fwa zəni Zɔbə yɩra ʋ mɩɩ tə talɩkwa lʋʋ yanʋ tə wa, ʋ doni kʋ təntən tə. Ʋ jɩn pee 14 000, də nyʋgʋmɛ 6 000, də nɩan bələ bələ dəkurən 1 000, də bɩnakana 1 000. 13 Ʋ nɩ bibara barpɛ də bwɩ̀ɩ́ batwa. 14 Ʋ dɩga təntən bʋ̀á tə yɩrɩ Zwemima, bələ nii bʋ̀á tə yɩrɩ Kesiya, batwa nii bʋ̀á tə Kerɛnə-Hapukəa. 15 Kana yà tə̀lə́ lʋʋ nii tə mama wa, ba nə yɩ kabwaŋa ndə Zɔbə bwɩ̀ɩ́ tə nə. Ba nyɩna pɩn tori ba də nə, ʋ jɩjə wiən tə wa, ba nabwana tə titəŋi wa.