41
1 Lìù nə dànɩ̀ nyɩ̀àn sə ʋ ja,ʋ yala mama yàá jì tʋtʋ.
Kʋ nə zə́n kʋ nan poni nə,
lìù mama jɩ̀àn yàá gwàrɩ̀.
2 Lìù mama jɩɩn mùrì sə ʋ kə kʋ con.
Wàà dàń nə wàá à mʋ̀ Yɩɩ yáá nə ʋ zɩga?
3 Wàà jɩŋɩ nə wulə à yuu,
sə ʋ pa à ŋwɩ́n kʋ à pa wá?
Lanworu tə də̀ń wiən tə mama yɩ à mʋ̀ nə tɩ!
*
4 À bá pú à nii də à nə wà yoo swɩ̀n
nyɩ̀àn nandaran tə, də kʋ dɩ̀àn tə,
də kʋ yatandaʋ tə zəni yuu wa.
5 Wàà nə wànɩ́ ʋ twá kʋ yáá con, ʋ kʋ̀rɩ̀ kʋ gànʋ̀?
Wàà nə wànɩ́ ʋ zʋ kʋ nipɛɛ bələ tə pwə́rə́ wa?
6 Wàà nə wànɩ́ ʋ van kʋ nii ʋ súrí?
Kʋ yelə tə nə kɩkarɩ kəni bɩcapuri.
7 Kʋ dəkoru daboru tə jə dɩ̀àn ndə nàtànɩ̀ nə,
ba nə sʋa ba kə duən nə.
8 Kʋ nədʋ mama kwalɩ kʋ don nə,
yá vʋʋ ba tə pwə́rə́ wa zwɩ.
9 Tə vwə duən nə,
tə zɩga, tə wàrɩ̀ tə pwɛ̀.
*
10 Kʋ nə tɩŋɩ poni yàá pɩpɩlɩ
kʋ yɩ́á yɩ ndə tɩbɩlakʋnʋ poni nə.
11 Mənvwə də mənpwanɩ
cʋ̀rɩ̀ tə naŋa kʋ nii wa.
12 Ŋwɩn naŋa kʋ mɩbʋran wa,
ndə fanɩʋ nə naŋa nəkənə wa,
nə à yə̀ə́ nagwalʋ wa kʋ nə cʋrɩ.
13 Kʋ mɩɩ vʋʋ sʋ̀rɩ́ cala,
mənvwə naŋa kʋ nii wa.
14 Dɩ̀àn wulə kʋ bɩan wa,
yá fən gəŋə lìù mama kʋ yáá con.
*
15 Kʋ nandaran tə vwə duən nə,
tə cə̀rə̀ nəkʋran, tə ba sʋsʋga.
16 Kʋ bɩcan dà ndə kapan nə,
kʋ dà ndə nʋŋʋ nə.
17 Kʋ nə nyɩ́n kʋ zàn,
fən yàá gən babɩran,
ba bɩcan zàn, ba gùrí tə səgə.
18 Lìù nə za kʋ də kwatara sɩ̀ʋ́,
kʋ yɩ ʋ zwɩ ʋ tɩ̀àn nə,
kwatara sɩ̀ʋ́, nə à yə̀ə́ cwiin,
nə à yə̀ə́ dənvəli, nə à yə̀ə́ cɩan
ba kʋ tʋtʋŋɩ jə.
19 Lugu yɩ ndə mʋa nə kʋ yáá con,
yá cɩnɩan yɩ ndə dàʋ̀ nə kʋ nə pʋa.
20 Twan cɩan wàrɩ̀ kʋ pɩn kʋ dəri,
kapadɩlʋ kapana yɩ ndə gaʋ nə kʋ yáá con.
21 Dangolu yɩ ndə mʋa nə kʋ yáá con,
yá kʋ yàá mʋŋa dənvəli vuvugu.
*
22 Kʋ pùə́ də̀ń jə cɩan sɩsɩŋɩ,
yá kʋ yɩ ndə daboru nə,
ba nə tùrì mɩmɩrʋ wa.
23 Kʋ yàá pɩn mʋʋ pupwin ndə nəkənə nə,
kʋ yàá lwàń mʋʋ,
kʋ pa kʋ jì ndə nəvuə nə,
ba nə sʋ̀rɩ́ wusinə ka wa.
24 Kʋ yàá yá poni fìù kʋ kwa con,
kʋ ga pa kʋ fìù tə mʋʋ tə yuu wa
jì ndə yukʋpwənə nə.
25 Won tə̀lə́ tɩa yuu wa
kʋ nə də́ dɩ̀àn kʋ yuu wa.
À fwa kʋ à pa
kʋ ba won mama fən dəri.
26 Kʋ gwə̀nì won tə mama nə yɩ nəfarʋ,
kʋ mʋ̀ nə yɩ ganaŋa nəfaran tə
mama nə jə dɩ̀àn pɩ̀ʋ́.»