Zɔbə sɛ̀ də ʋ tà won mama
40
1 Ba-Yígúrə́-Jə-Tiu kʋ́ʋ̀ tì sʋgʋ, yá ʋ swɩ̀n Zɔbə con, ʋ wʋ́:2 «N mʋ̀ lìù tə nə swɩ̀n n zɩga Yɩɩ tə nə
ʋ nə wulə tə mɛ yuu wa,
pɩ̀à sə n cəgə wá naaa?
N mʋ̀ lìù tə nə tʋ́tʋ̀nɩ́ də Yɩɩ
jə yoo sə n le naaa?»
3 Zɔbə le Ba-Yígúrə́-Jə-Tiu, ʋ wʋ́:
4 «À tà won mama!
À wá le mʋ́ à wʋ́ bɛ̀ɛ̀?
À jɩɩn jə à nii nə!
5 À dí yáá à swɩ̀n naa nədʋ,
à kʋ́ʋ̀ bá swɩ̀n yoo mama,
à súrí lá nɛɛ bələ nii nə.»
Ba-Yígúrə́-Jə-Tiu caga Zɔbə nii nə
6 Ba-Yígúrə́-Jə-Tiu le Zɔbə dwà vʋʋ titəŋi wa, ʋ wʋ́:
7 «Vwa voru n taŋa nə ndə kwatarʋ babɩʋ nə,
yá à wá bwe mʋ́ bwiə, sə n le nə.
8 Cɩ́gá mama, n yɩ n pɩ̀à
sə n pa à bʋra tə jì tʋtʋ naaa?
N pɩ̀à sə n tɛ́n nə,
n ma jon cɩ́gá naaa?
9 N vàn jə dɩ̀àn ndə Yɩɩ vàn nə naaa?
N jə kori kʋ nə baa ndə Yɩɩ kori nə naaa?
10 Zʋ pàrɩ̀ də dun ndə gànʋ̀ nə,
n ga ja poni də fɩra,
n ma nàn n tɩ̀àn!
11 Curi n lɩŋa tə ləzoni yuu wa,
ywàń fwìə́ tɩ̀án tə mama, n ga mun ba!
12 Ywàń fwìə́ tɩ̀án tə mama, n ga gori ba!
Tɩtaga wʋlʋnyɩna ba dəkuu yuu wa.
13 Gùrì ba mama pùrú wa,
Sun ba nii nə n kə ciru nə.
14 Yá à tətə dàń wá bʋ n nə,
n jɩzən tə nə yɩn n jonu yɩrɩ!»
Mʋʋ wojijiru tə nə yɩ coŋu
15 «Ywàń nɩ́á wa wojijiru tə à nə fwa,
ndə à nə fwa n də nətʋ!
Gaʋ nə kʋ də́ ndə naʋ nə.
16 Kʋ dɩ̀àn yɩ tə wulə kʋ tàŋá wa,
yá kʋ vagoo wulə kʋ pùə́ də̀ń nanbɩa tə wa!
17 Kʋ yàá pa kʋ dəbili cə̀rə̀ ndə sɩsaban dàʋ̀ nə,
kʋ ciən ŋʋnan tə sʋa duən wa zəni.
18 Kʋ kurən yɩ ndə cɩnɩan nə,
kʋ sadɩan kurən yɩ ndə lurən nə.
19 Kʋ mʋ̀ nə yɩ təntən won à mʋ̀ Yɩɩ nə fwa.
À mʋ̀ Yɩɩ tə à nə fwa kʋ cɩcɩ,
nə wàá kʋ à swì də kwatara sɩ̀ʋ́.
20 Pɛɛn nə pɩn kʋ kʋ nii wodiu,
bwálɩ́ tə nə ganaŋa tə mama nə bwanɩ bwana.
21 Bumɩna də̀ń nə nə kʋ pə̀ní,
kʋ səgə mɩncanɩ də bulu wa.
22 Bumɩna tə ywárɩ́ yàá pú kʋ yuu nə,
nacoru nii bʋlatwalan ga kɩkarɩ kʋ.
23 Mʋnaa tə navoo nə swə
ka dà yiri mama, fən ba kʋ jə.
Zʋrədɛn mʋnaa tə nɩ́á nə swə
tə pupwin tə zʋ kʋ nii wa,
won mama tə ba kʋ wʋwalɩ.
24 Kʋ yɩ máŋá tə kʋ yɩ́á nə súrí nə
ba wàá kʋ ba janɩ naaa?
Ba wàá kʋ ba janɩ də nyalɩ,
ba pórí kʋ mɩɩ naaa?
Mʋʋ wojijiru tə nə yɩ nyɩ̀àn
25 N wàá gwɩ́án n ma janɩ nyɩ̀àn naaa?
N wàá gwala n ma janɩ kʋ nəndəli nə naaa?
26 N wàá mɩncanɩ kʋ mɩbʋran wa n tɩrɩ naaa?
N wàá líú n ma pórí kʋ nipaa naaa?
27 Kʋ wá lòrì mʋ́ pwəpwə naaa?
Kʋ wá kòrì mʋ́ naaa?
28 Kʋ wá tún nimarʋ də mʋ́,
sə n ja kʋ n ma fwa n yoŋu
máŋá mama wuuu naaa?
29 N wàá n bwanɩ də kʋ ndə
ba nə bwanɩ də zuŋə nətʋ naaa?
N wàá kʋ n vwe n pɩn n bwɩ̀ɩ́ nə,
ba ma bwanɩ bwana naaa?
*
30 N tʋtʋnduən wàá kʋ ba yoli naaa?
Ba wàá kʋ ba yoli baywələ yirə yirə yuu wa naaa?
31 N wàá cɩan n ma tɛ kʋ tànʋ̀ n pórí,
nə à yə̀ə́ filə líú n ma zwe kʋ yuu n pórí naaa?
32 Kə n jɩɩn kʋ con,
n wá na yoo tə kʋ nə wá ma tʋn mʋ́!
Yá n nə lìí kʋ,
n kʋ́ʋ̀ bá pìí n dídə́n də mama!