*
39
1 N yə̀ə́ máŋá tə fɩbʋnɩ nə lɩrɩ tə bɩ̀á?N yàá mɩ̀àn naŋɩ də tə nə wulə tə lɩrɩ?
2 N yàá jələ cànɩ̀ tə nii
tə nə yàá ja tə pwìí tə,
kʋ pa n yə̀ə́ máŋá tə
tə nə yàá lɩra tə bɩ̀á naaa?
3 Tə yɩ tə yàá pə̀ń tɩa,
tə lɩra tə dwíí tə kə lʋʋ wa,
yá tə jon tə tɩ̀àn càn jɩɩn wa.
4 Tə bɩ̀á yàá dàn, tə ga bori kanporu wa.
Yá máŋá don wa, tə yàá tɩnɩ tə tɩ̀àn,
tə ga kʋ́ʋ̀ ba pìí tə twí tə ninə con.
*
5 Wàà nə yá gaʋ bɩ̀nà ʋ pa ka tɩ ka tɩ̀àn?
Wàà nə kʋ̀rɩ̀ ka ŋoni ʋ dʋgʋ?
6 À pɩn ka digə, sə kʋ ya ka sàń,
à pɩn ka kukoru, sə ka ya lá.
7 Gaʋ bɩ̀nà yáá tə̀lə́ də tɩfarʋ zizigu,
ka ba tíú jə ʋ nə wá baa ka nii nə.
8 Ka jírí pɛɛn yuu wa,
ka ma pɩ̀à ka nii wodiu,
ka twarɩ vʋlɩʋ yiri mama ka də́.
*
9 Ganaʋ wá sɛ̀ kʋ tʋn kʋ pa mʋ́ naaa?
Kʋ wá sɛ̀ kʋ jʋ bwálɩ́ tə nə,
n vàná nə də́ wodiu naaa?
10 N wàá ganaʋ n kəni vàrʋ́ nə,
n pɩn kʋ vàrɩ̀ naaa?
Kʋ wá sɛ̀ kʋ ya n kwa kʋ van dɔ̀ɔ̀,
kʋ ma lwa vanan wa kukulə naaa?
11 N wá sɛ̀ n jələ kʋ yuu wa,
kʋ nə dà zənzən yɩrɩ,
kʋ pa n yá n tʋtʋŋɩ n pa kʋ naaa?
12 N wá sɛ̀ n jələ kʋ yuu wa,
sə kʋ ca n mɩna kʋ tún n tʋa wa,
kʋ ga pɛ̀ tə kʋ kə dìə̀ kʋ pa mʋ́ naaa?
*
13 Taataa yàá wɛ̀ɛ́ kʋ vànà də pupwən,
ndə dwanʋ vadwee də kʋ kʋran nə,
yá taataa wàrɩ̀ kʋ piri.
14 Taataa yàá yá kʋ cala tɩpɩrɩ wa,
kʋ pa pùrú lɩŋɩ tə,
15 yá kʋ swɛ̀ɛ́ də naa wàá tə ka tɩtaga,
də ganaŋʋ wàá tə kʋ nɩŋɩ kʋ lwe.
16 Kʋ waa lɩŋa kʋ bɩ̀á yuu wa
ndə kʋ mʋ̀ bɩ̀á dàń.
Ka də́ càn tʋtʋ yoo ba kʋ yɩ̀.
17 Cɩ́gá, Yɩɩ pɩn kʋ kwɩ̀n wʋbʋŋa nə,
ʋ wà kʋ tori pɩn pubʋŋa yoo wa.
18 Kʋ nə nyɩ́n kʋ zàn sə kʋ dəri,
səsən də səsədɩrʋ yɩ kʋ ma də́ bɩyɩrɩ.
*
19 N mʋ̀ nə pɩn dɩ̀àn səsən nə,
n ga ja bɔɔ n ma piri ka bɩan naaa?
20 N mʋ́ nə pɩn ka faŋa ndə jə̀rù nə naaa?
Ka sɩsɩan jə fɩra, kʋ ga jə bɩcapuri.
21 Ka yàá fɛn nacinə vara wa,
ka ga jwɛ ka dɩ̀àn tə yɩrɩ.
Ka yàá dəri ka jəri kwatarɩ zɩla.
22 Ka yəri won tə nə yɩ fən,
won mama fən ba ka jə,
ka ba twəni ka kəni ka kwa,
kwatara sɩ̀ʋ́ yáá con.
23 Cwan, də cwiin tə nə pɩpɩlɩ,
də dənvəli dwana yàá dwanɩ ka yuu con,
24 ka ga faŋa də ka mimini tɩa mama.
Yá ka nə nì kʋ̀ʋ̀ nabwanʋ kori,
ka yàá kʋ́ʋ̀ wàrɩ̀ ka tɩ̀àn ka janɩ.
25 Ba nə wúrí kʋ̀ʋ̀ nabwana,
ka yàá sɩsɩn: “Hɩnhɩnhɩn!”
Ka yàá wulə yiŋʋnɩ,
ka mɩɩ ga tì kʋ̀ʋ̀ tɛgʋ lwán,
ka zɩan ga nə̀ń kwatara yáá tɩ̀án
bagʋ də ba kʋ̀ʋ̀ cə̀rí.
*
26 N mʋ̀ nə pɩn pubʋŋa twələ nə,
ka ma piri,
ka larɩ ka vànà jɩgwiə saparʋ con?
27 N mʋ̀ nə yàá pa nii zənpuu nə,
kʋ ma zaŋa kʋ piri,
kʋ ga kəni kʋ pwalʋ baan baan naaa?
28 Pɩ̀ràn wa nə kʋ wulə,
yá mə lá nə kʋ jwɩ,
pɩ̀ʋ̀ yupara wa,
ndə kʋ dɩ̀àn dəkuu bwálɩ́ nə.
29 Mə lá nə kʋ yàá zɩgɩ,
kʋ mɩ̀àn won tə kʋ nə pɩ̀à sə kʋ ja.
Kʋ yɩ́á yàá zɩgɩ yiŋʋnɩ tə na kʋ.
30 Kʋ bɩ̀á yɩ jana nə tə nywɩn.
Won nə tɩga bwálɩ́ nə,
kʋ mʋ̀ nə wulə lá.»