BA-YIGURƏ-JƏ-TIU LE ZƆBƏ
(38.1—42.6)
38
1 Ba-Yígúrə́-Jə-Tiu le Zɔbə dwà vʋʋ titəŋi wa, ʋ wʋ́:2 «Wàà nə ja ləyiri sʋ̀ràn
ʋ ma gugurə à wʋbʋŋa?
3 Vwa voru n taŋa nə ndə kwatarʋ babɩʋ nə,
yá à wá bwe mʋ́ bwiə, sə n le nə.»
Yɩɩ nə də́ pàrɩ̀ lʋʋ mama yuu wa
4 Ba-Yígúrə́-Jə-Tiu tə bwe Zɔbə, ʋ wʋ́:
«Yə̀n nə n yà wulə máŋá tə wa à nə fwa tɩa tə?
Swɩ̀n kʋ n bɩrɩ nə, də n nə jə kʋ yənu.
5 N yə̀ə́ lìù tə nə man ka də̀ń?
Nə à yə̀ə́ lìù tə nə dɩlɩ dìlwə̀rə́ ŋwənə ka yuu wa?
6 Bɛ̀ɛ̀ wa nə ka ywəŋə tə dəkurən ciŋi?
Nə à yə̀ə́ wàà nə tún ka nigwancɩɩn wárɩ́,
7 máŋá tə wa jɩjʋ fuən fuən kacɩlacɛɛ
tə nə twá duən tə nuŋə də pupwən,
yá Yɩɩ bɩ̀á tə mama mà pupwən cə̀rí?
8 Wàà nə sún mʋʋ tə nii nə də bwə̀rə̀n,
máŋá tə wa kʋ nə faŋa
sə kʋ nan tɩa tə pùə́ wa?
9 À mʋ̀ nə ja bakwan à ma fwa kʋ ganzɩʋ,
à ga ja yikunu nəzonu bìrə̀n à ma pipini kʋ.
10 À tún sɩswɩan à pa kʋ,
kʋ nə wà mɛ sə kʋ fan kʋ galɩ,
à ga sun kʋ mimien də boruswaran.
11 À nə swɩ̀n kʋ con, à wʋ́:
“Yəbə nə n wá bà n mɛ,
n wà mɛ sə n kɛ̀ń lá.
Yəbə nə n nakulə tə fwìə́ tə wá cən ka zɩgɩ!”
*
12 N nə wulə lʋʋ wa mama,
n tə pɩn nii sə tɩa pʋrɩ naaa?
N tə bɩrɩ tɩbɩlakʋnʋ nə,
bwálɩ́ tə kʋ nə mɛ sə kʋ ya,
13 sə kʋ ja tɩa tə nigwancɩan nə,
kʋ pupugu wʋlʋnyɩna kʋ lɩ naaa?
14 Tɩa tə yàá lwàń ndə dɔɔ nə,
ba nə nyɩ́n jɩtuŋu kʋ yuu wa,
yá ka dàń yàá zɩga,
ndə gànʋ̀ nə ba ma zʋ ka.
15 Yá wʋlʋnyɩna kwɩ̀n ba poni nə,
vàn tə nə zɩ̀n yɩɩ nə,
sə kʋ mà ga nyʋnyʋgʋ.
*
16 N tə vəli n yí mʋʋ nabuliyɩa tə dəkuu naaa?
N tə zʋa n jírí bʋʋ nəfarʋ tə wa kʋ də̀ń nə lu* naaa?
17 Tɩan mimien súrí n yáá con naaa?
N nɩ ciru mimien naaa?
18 N jələ n na tɩa tə nə dáá ka mɛ nətʋ naaa?
Swɩ̀n bɩrɩ nə,
də n nə yə̀ə́ yìə̀n təntə mama.
19 Cwəŋə tə nə vəli poni sàń wulə yə̀n nə?
Yá yə̀n nə nə yikunu wulə
20 sə n va n ja tə, tə sɩswɩan wa,
n ga lwarɩ tə sàń coŋi?
21 N yə̀ə́ kʋ! Kʋ máŋá tə wa,
də ba yà lɩrɩ mʋ́, fuən mama!
Cɩ́gá, n bɩna dáá zənzən!
*
22 N tə vəli n yí bwálɩ́ tə
à nə tún waran ndə gunmuən nə?
N nɩ dwakafɩna tə bwálɩ́
23 à nə tún vàn nə à ma dànɩ̀ jɩgwarʋ,
də jara, də kʋ̀ʋ̀ tɛgʋ dɩɩn naaa?
24 Cwəŋə kwà nə poni yàá tì
kʋ ma pɩ̀rɩ̀ tɩa?
Yə̀n nə yɩɩ yɩpɩan con vʋʋ yàá twá
kʋ ma fuli tɩa yuu?
25 Wàà nə kʋa nàgwàlán fìrə̀n
ʋ pa dwà nə lanworu tə wa,
ʋ ga tún cwəŋə ʋ pa
dwà pɩpɩlʋ də dwà bagʋ nə,
26 ʋ pɩn dwà nɩ̀ tɩa wa lìù nə tə̀lə́ lá,
kasɔɔ lanworu wa, ləzwənə dwáná nə ba lá dwanɩ,
27 sə ʋ ma kʋna tɩa tə
nə cʋ̀gʋ̀ mɩ́ámɩ́án ka jì pucʋnɩ bwálɩ́,
ʋ ga pa gaʋ pɛ́n kʋ nan lá?
28 Dwà jə nyɩna naaa?
Wàà nə pɩn nyʋ̀nʋ̀ vwe tɩa yuu?
29 Wàà pùə́ wa nə nɩ́á tə nə kəri,
tə jì kikələ nan?
Wàà nə lɩrɩ lanworu nyʋ̀nʋ̀ zuzuru ʋ kə lʋʋ wa?
30 Nɩ́á tə yàá kəri, tə jì ndə kapan nə,
yá mʋʋ yuu dàń yàá jì ndə tɩpɩrɩ nə.
*
31 N wàá Zara* tə lanworu wa
n kukuli n kəni duən nə,
nə à yə̀ə́ n kʋ̀rɩ̀ yɩdɩɩn də tɩpwən
mɩmɩnʋ* tə ŋoni n dʋga naaa?
32 N mʋ́ nə pɩn yɩdɩɩn də tɩpwən
mɩmɩnʋ tə naŋa lanworu tə wa tə máŋá wa,
n ga kəni Twanbɛɛ də ʋ Kukurə* tə cwəŋə nə?
33 N yə̀ə́ nii yìə̀n tə nə ja lanworu tə tə zɩga?
N mʋ́ nə pɩn tə tʋŋa tɩa yuu wa naaa?
34 N wàá bakwan tə nii nə n baa,
n pɩn dwà nɩ́á lwɛ́ n yuu wa naaa?
35 N mʋ́ nə pɩn nii dwà pɩpɩlʋ nə, kʋ ma naŋa naaa?
Kʋ yàá swɩ̀n n con, kʋ wʋ́: “Nə̀ń nə”?
36 Wàà nə ken wʋbʋŋa bakwan wa?
Wàà nə pɩn pubʋŋa fun nə?
37 Wàà nə wàá ʋ wʋbʋŋa
ʋ ma gàlɩ̀ bakwan tə,
yá ʋ guni lanworu kwara tə,
sə nɩ́á lwá tɩa,
38 sə pùrú kwalɩ,
tə ga cilə tə kə duən nə,
tə jì tɩran kukulə?»
Yɩɩ yɩ ganaŋa də tətə Yuu-Tiu
39 N mʋ́ nə yàá dɩŋa nàŋʋ́
n ja n pa gəkan nə,
n ga pa gəbii niən zwɛ̀,
40 máŋá tə wa tə nə tígə́ tə yipaa bwálɩ́ wa,
nə à yə̀ə́ máŋá tə wa tə nə wulə tə yisəgə bwálɩ́ nə?
41 Wàà nə tanɩ wodiu
ʋ pɩn batɩankanʋ nə,
máŋá tə wa niən nə bibəni kʋ bɩ̀á,
yá tə bubwi tə kə Yɩɩ nə, sə ʋ san tə?