Ɛsətɛrə
Ɛsətɛrə sagɩ tə yuu wa sʋgʋ
Ɛsətɛrə sagɩ tə yɩ Zwida lʋʋ lɩ̀à bʋ̀á kacɩɩn don, ʋ nə pɩn ʋ mɩɩ, sə ʋ ma jon ʋ dwíí lɩ̀à mɩɩ, ʋ kə lʋʋ wa yoo nə kʋ swɩ̀n. Kʋ mʋ̀ yoo tə tʋn Pɛrəsə pɩ̀ʋ́ Asuerusə pàrɩ̀ tə máŋá wa.
Pɛrəsə payuu tə yà ta Babɩlɔnə payuu tə kʋ də́, yá Zwida lʋʋ lɩ̀à kapʋpʋ wànɩ́ ba pìí ba va ba lʋʋ nii wa, ba duən də ga mɛn Pɛrəsə lʋʋ nii wa.
Pɛrəsə pɩ̀ʋ́ tə dʋgʋ ʋ kan, ʋ ga swe Ɛsətɛrə, ʋ nə yɩ Zwida lʋʋ lɩ̀à bʋ̀á, ʋ ga yɩ kabwaŋʋ cɩ́gá cɩ́gá. Kʋ máŋá təntə wa, Hamanə, ʋ nə yɩ pɩ̀ʋ́ dun tɩ̀án yáá tíú, yà wulə ʋ tʋŋa níə́ bələ yoo, sə ʋ ma cʋ̀gʋ̀ Zwida lʋʋ lɩ̀à tə mama mɩ́ámɩ́án. Ɛsətɛrə nyɩna zʋnʋ bìú Marədoswe lwarɩ níə́ bələ yoo təntə, yá Marədoswe də Ɛsətɛrə dàń san duən nə, ba jon ba dwíí lɩ̀à tə mɩɩ, ba kə lʋʋ wa.
Ɛsətɛrə nyɩna zʋnʋ bìú Marədoswe swɩ̀n Ɛsətɛrə con, sagɩ swapitərə 4, vɛrəse 14 wa, ʋ wʋ́:
“Wàà nə yə̀ə́, də kʋ nə tà yoo nətən yiri yɩrɩ nə, n jìgə̀ pakan?”
Sagɩ tə gwìń Zwida lʋʋ lɩ̀à cànà tə, ba nə boŋə «Purimə» dəkuu, də kʋ tə ka nə bɩrɩ: Ba wà Yɩɩ yɩrɩ za sagɩ tə wa, yá kʋ bɩrɩ nətʋ, Yɩɩ nə twá, ʋ ma pú ʋ lɩ̀à tə yuu nə, ʋ ga jon ba, ba dʋŋa jɩɩn wa.
Sagɩ tə sʋyun
Ɛsətɛrə jìgə̀ pakan (swapitərə 1, kʋ ja va swapitərə 2)
Hamanə pɩ̀à sə ʋ gʋ Zwida lʋʋ lɩ̀à tə (swapitərə 3)
Marədoswe lòrì sáŋʋ́ Ɛsətɛrə con (swapitərə 4)
Pɩ̀ʋ́ Asuerusə ken dun Marədoswe yuu wa (swapitərə 5, kʋ ja va swapitərə 6)
Pɩ̀ʋ́ Asuerusə pɩn ba gʋ Hamanə (swapitərə 7)
Zwida lʋʋ lɩ̀à tə ta ba jon ba tɩ̀àn, ba dʋŋa jɩɩn wa (swapitərə 8, kʋ ja va swapitərə 9)
Zwida lʋʋ lɩ̀à tə dí Purimə cànà tə (swapitərə 9)
Pɩ̀ʋ́ Asuerusə də Marədoswe jìgə̀ dɩ̀àn nəfarʋ tɩ̀án (swapitərə 10).