Nehemi 13

Yìə̀n tə Nehemi nə pìí ʋ kwɛn ʋ tún

1 Kʋ máŋá təntə tətə wa, ba kàrɩ̀ Yɩɩ nii sagɩ tə, ʋ nə pɩn Moyizə pʋ́pʋ́nɩ́, lalʋʋ tə mama yáá con. Yá ba nɩ də, kʋ pʋ́pʋ́nɩ́ sagɩ tə bwálɩ́ don wa, də Amon dwíí tə, də Mʋabə dwíí tə wà mɛ, sə ba twá ba zʋ Yɩɩ púlí tə wa mɩ́ámɩ́án. 2 Cɩ́gá, máŋá tə wa Yɩzərayɛlə lɩ̀à tə nə nan Ezwipətə lʋʋ nii, ba bɩ̀àn Kanaan lʋʋ nii wa, Amon dwíí tə, də Mʋabə dwíí tə wà wodiu, də nɩ́á ja nan, ba ma jəri ba. Yá Mʋabə dwíí tə sugu Balamə, sə ʋ zɩrɩ, ʋ kə Yɩzərayɛlə lɩ̀à tə nə. Yá nə Yɩɩ tə dàń lwàń zɩra tə, ʋ pa ka jì zəni. 3 Máŋá tə, Yɩzərayɛlə lɩ̀à tə nə nì Yɩɩ nii yìə̀n təntə, ba pwɛ̀ vərə tə mama, də Yɩzərayɛlə lɩ̀à tə duən nə.

4 Də kʋ nətʋ tə tə yà wà tʋn, Yɩɩ joŋwanʋ Eliyaswibə nə, ba yà tún, sə ʋ ywàń nə Yɩɩ tə wodirən dìì tə yuu nə. Ʋ yà yɩ Tobɩya dwíí tíú. 5 Yá ʋ dàń yà lɩ dibiu nəfarʋ, ʋ pa Tobɩya nə. Dibiu təntə wa nə, ba yà túŋə́ vàrʋ́ càlɩ̀ jwəŋə tə, də wusinə, də tʋtʋnzɩla, də fugə nii nyiən tə, ba nə lɩ mɩna yuu wa, də divɛn nədʋn yuu wa, də nʋga yuu wa. Tə wiən təntə yà yɩ Yɩɩ joŋwana tə, də Levi dwíí tə, də gwàgá tə, də mimii nəcɩra tə tori.

6 À yà tə̀lə́ Zwerizalɛmə nə, máŋá tə wa, tə yìə̀n tə nə tʋn. Cɩ́gá, à yà pìí à va Babɩlɔnə pɩ̀ʋ́ Arətasɛrəsɛsə con, ʋ pàrɩ̀ tə bɩna fɩtwa də bələ bɩnɩ tə wa. Máŋá tə, à dɩan nə cé, à lòrì cwəŋə pɩ̀ʋ́ tə con, 7 à pìí à bà Zwerizalɛmə. Yá à dàń nɩ yolwan tə, Eliyaswibə nə tʋn. Ʋ cɩ́gá lɩ dibiu dibɩa tə wa, tə nə kɩkarɩ Yɩɩ dìə̀ dəwoo tə, ʋ pa Tobɩya nə. 8 À lɩŋa zàn zənzən, à ga lɩ Tobɩya zɩla tə mama, à dɩlɩ kàrá wa. 9 Kʋ kwa nə, à pɩn nii, sə ba kwɛn dibɩa tə durən, ba lɩ. Yá à dàń pìí à kə Yɩɩ dìə̀ tʋtʋnzɩla tə, də vàrʋ́ càlɩ̀ jwəŋə tə, də wusinə tə dibɩa tə wa.

10 Kʋ tə nə súrí lá, à nì də, ba kʋ́ʋ̀ ba Levi dwíí tori tə pɩn. Yá Levi dwíí tə, də gwàgá tə lìù mama dàń dəri, ba va ba kárɩ́ wa, ba ga yá Yɩɩ tʋtʋŋɩ tə. 11 À dàń caga tʋ̀tʋ̀nán yun tɩ̀án tə nii nə, à wʋ́: «Kʋ yɩ nətə, á ma vɩ̀ Yɩɩ dìə̀ tə, á dʋgʋ nətən?» Yá à dàń ken Levi dwíí tə, də gwàgá tə duən yáá, à pa ba pìí ba tì ba tʋ̀tʋ̀nán, Yɩɩ dìə̀ tə wa. 12 Zwida dwíí tə mama dàń ja ba mɩna fugə nii nyiən, də ba divɛn nədʋn fugə nii nyiən, də ba nʋga fugə nii nyiən, ba bà, ba kə wodirən dìì tə wa. 13 À lɩ Yɩɩ joŋwanʋ Swelemɩya, də Sadɔkə, ʋ nə pʋ́pʋ́nɩ́ yìə̀n, ʋ túŋə́, də Pedaya, ʋ nə yɩ Levi dwíí, sə ba ywàń wodirən dìì təntə yuu nə. À tə lɩ Zakurə bìú Hanan, ʋ nə yɩ Matanɩya nàʋ́, à súrí lá, sə ʋ san ba nə. Cɩ́gá, lìù mama yà yə̀ə́ də, ba mʋ̀ lɩ̀à təntə twá cɩ́gá nə, ndə kʋ nə mɛ nətʋ. À pɩn ba nii, sə ba mʋ̀ nə tara wodirən tə, ba pa ba nubɩa tə nə.

14 Kʋ kwa nə, à jʋn Yɩɩ, à wʋ́: «Ooo, à tíú Yɩɩ, lìí à yoo, yìə̀n tə tə mama yɩrɩ, à nə tʋn. À lòrì mʋ́, dàn ká swɛ̀ɛ́, à nə twá cɩ́gá nə, ndə kʋ nə mɛ nətʋ, à ma tʋn n dìə̀ tə tʋ̀tʋ̀nán tə.»

15 Kʋ máŋá təntə wa, à nɩ lɩ̀à Zwida nagwanaa tə wa, də ba nɩŋɩ divɛn tɩ̀án lənə, sìə́ dɩɩn nə, gwàlán tə wa, ba nə yàá nɩŋɩ tə. Yá ba duən də ken mɩgugunə bɩnɛ yuu, ba ja nan kárɩ́, ba zwɩ dìə̀, ba duən də ken divɛn, də kacan, də kapɩra, də zɩla yiri mama bɩnɛ yuu, ba ja vələ Zwerizalɛmə, sìə́ dɩɩn nə. Yá à dàń caga ba nii nə, ba nə yoli ba wiən tə, dɩɩn təntə nə yɩrɩ. 16 Kʋ tə nə súrí lá, Tirə tɩ̀án tə də, ba yà nə wulə Zwerizalɛmə wa, yàá ja fələ, də yolu wiən duən ba twi, ba yoli Zwida nagwanaa lɩ̀à tə, də Zwerizalɛmə tɩ̀án yuu wa, sìə́ dɩɩn tə nə. 17 À caga Zwida dwíí yáá tɩ̀án tə nii nə, à wʋ́: «Bɛ̀ɛ̀ yolwan nə, á tʋŋa nətən? Bɛ̀ɛ̀ nə pɩn, á ma ba sìə́ dɩɩn tə zìlí? 18 Kʋ tà nətʋ nə, á nɩbara-ba tə tʋn, Yɩɩ ma pa lɛɛ tə tə mama tʋ nə mʋ̀, də tɩʋ kʋ tə yuu wa naaa? Yá á mʋ̀ tə wulə á cʋ̀gà sìə́ dɩɩn tə, á pɩn Yɩɩ lɩŋa kwɛn tə zaŋa Yɩzərayɛlə lɩ̀à yuu wa!»

19 Yá kʋ nə mɛ kʋ nə, à dàń pɩn nii, sə ba sun Zwerizalɛmə mimien tə, yɩɩ zʋrɩ máŋá wa, də sìə́ dɩɩn tə tə wà sinti. À swɩ̀n, sə ba dàn ká súrí tə, də sìə́ dɩɩn tə nə wà kɛ̀ń. À zɩgɩ à tʋtʋnbɩa tə duən mimien tə nə, sə ba cɩ̀, lɩ̀à dàn ká ja zɩla, ba zʋ tɩʋ tə wa, sìə́ dɩɩn tə nə. 20 Yá kʋ nətʋ tə dàń pɩn, baywələ tə nə yoli wiən yirə yirə, jʋ Zwerizalɛmə biritaŋʋ tə tàŋá nə, naa nədʋ, nə à yə̀ə́ nɛɛ bələ tətə. 21 À dùə̀ suu ba nii nə, à wʋ́: «Bɛ̀ɛ̀ nə pɩn, á ma jʋ tɩʋ tə biritaŋʋ tə tàŋá nə? Á nə pìí á tʋn kʋ, à wá pa ba ja aba.» Kʋ nə mɛ kʋ dɩɩn tə nə, ba kʋ́ʋ̀ wà pìí ba bà, sìə́ dɩɩn nə. 22 Kʋ tə nə súrí lá, à swɩ̀n Levi dwíí tə con, sə ba kwɛn ba tɩ̀àn, ba lɩ durən yìə̀n wa, ba ga bà, ba cɩ̀ mimien tə nə, sə kʋ pa sìə́ dɩɩn tə ya Yɩɩ nyiən. Yá à kʋ́ʋ̀ jʋn Yɩɩ, à wʋ́: «Ooo, à tíú Yɩɩ, lìí à yoo kʋ də yɩrɩ, sə n ga taa n wʋywaŋʋ* nəfarʋ tə yɩrɩ, n dəri à yinəgə!»

23 Kʋ máŋá təntə tətə wa, à nɩ Zwifə-ba duən, də ba swe Aswədɔdə tɩ̀án bwɩ̀ɩ́, də Amon dwíí tə bwɩ̀ɩ́, də Mʋabə tɩ̀án bwɩ̀ɩ́. 24 Ba bɩ̀á tə faan yà yɩ Aswədɔdə tɩ̀án sʋ̀ràn nə, ba swɩ̀n. Ba lìù mama yà ba Zwifə-ba sʋgʋ nə̀ń, də kʋ nə tà dwíə́ duən sʋ̀ràn. 25 À caga ba nii nə, à ga zɩrɩ à kə ba nə. À mà ba duən, à van ba yukʋran, à mùrí, à ga pa ba dù də Yɩɩ yɩrɩ, də ba kʋ́ʋ̀ bá swe ba bwɩ̀ɩ́, dwíə́ nəkaran* bɩ̀á yuu wa, yá ba də bá swe dwíə́ nəkaran bwɩ̀ɩ́, ba pa ba bɩ̀á nə, nə à yə̀ə́, sə ba tətə ma fwa ba kana. 26 À swɩ̀n ba con, à wʋ́: «Kʋ tà nətʋ nə kʋ twá, Salʋmʋn, ʋ yà nə yɩ Yɩzərayɛlə pɩ̀ʋ́, ma tʋn cʋna naaa? Lʋʋ níə́ tə duən tə mama wa, pɩ̀ʋ́ don yà tə̀lə́, ʋ nə mɛ də Salʋmʋn. Ʋ Yɩɩ tə yà swə wá zəni, kʋ pa ʋ tún wá, sə ʋ ya Yɩzərayɛlə mama pɩ̀ʋ́. Yá də kʋ nətʋ mama, dwíə́ nəkaran bwɩ̀ɩ́ yigu wá, ba pa ʋ tʋn cʋna. 27 Á dànà ká pa, nə pìí nə nì də, á də swe dwíə́ nəkaran bwɩ̀ɩ́. Kʋ nətʋ tə yɩ yolwan nəfarʋ, yá kʋ ga yɩ culu nəfarʋ nə, á cʋ̀gà, nə Yɩɩ tə yáá con.»

28 Yoyada bìú don, ʋ nə yɩ Yɩɩ joŋwanʋ Eliyaswibə nàʋ́, yà yɩ Sanbala, ʋ nə yɩ Horon tíú, bʋ̀á barɩ. Kʋ nətʋ tə yɩrɩ, à dɩŋɩ wá, à kə yiŋʋnɩ də nə.

29 À kʋ́ʋ̀ jʋn Yɩɩ, à wʋ́: «Ooo, à tíú Yɩɩ, dàn ká swɛ̀ɛ́ ba cʋna tə yoo də mama. Cɩ́gá, ba tʋn durən yìə̀n, ba ma cʋ̀gʋ̀ n joŋwanɩ tʋtʋŋɩ tə, də nimarʋ tə, n nə tún, n də n joŋwana tə, də Levi dwíí tə pwə́rə́ wa.»

30 À dàń kwɛn lalʋʋ tə, à lɩ vərə tə durən tə wa. Yá à pìí à pa nii, sə Yɩɩ joŋwana tə, də Levi dwíí tə lìù mama twá ʋ tʋtʋŋɩ coŋi nə, ʋ tʋn, ndə kʋ nə mɛ nətʋ. 31 À tə pɩn nii, sə ba pa Yɩɩ dìə̀ mən dɛɛ tə, máŋá tə wa, kʋ nə mɛ, kʋ súrí təntən wobɩa zìlə́ wiən tə nə.

Yá à kʋ́ʋ̀ jʋn Yɩɩ, à wʋ́: «Ooo, à tíú Yɩɩ, lìí à yoo, sə n tʋn zəni à yɩra!»