Yɩɩ joŋwana tə, də Levi dwíí tə galʋ
12
1 Nə̀ń Yɩɩ joŋwana tə, də Levi dwíí tə, ba nə twá Swalətiyɛlə bìú Zorobabɛlə, də Zozuwe nə, ba nan yongaʋ tə, ba bà. Kʋ yɩn Seraya, də Zweremi, də Ɛsədərasə, 2 də Amarɩya, də Malukə, də Hatuswə, 3 də Swekanɩya, də Rehumə, də Meremɔtə, 4 də Yido, də Ginetoyi, də Abɩya, 5 də Mɩyaminə, də Maadɩya, də Biləga, 6 də Swemaya, də Yoyaribə, də Yedaya, 7 də Salu, də Amɔkə, də Hiləkiya, də Yedaya. Mə ba mʋ̀ yà nə yɩ Yɩɩ joŋwana tə, də ba nubɩa tə yun tɩ̀án, Zozuwe máŋá wa. 8 Levi dwíí tə wa, kʋ yɩn Zozuwe, də Binuwi, də Kadəmɩyɛlə, də Swerebɩya, də Zwida, də Matanɩya. Matanɩya də ʋ nubɩa tə yà nə dɩ bʋra gwaran tə. 9 Ba nubɩa Bakəbukɩa, də Uni nə yàá zɩgɩ ba yáá nə, ba saŋa, ba joŋə gwaran tə.10 Zozuwe lɩrɩ Yoyakimə, Yoyakimə lɩrɩ Eliyaswibə, Eliyaswibə lɩrɩ Yoyada, 11 Yoyada lɩrɩ Zonatan, yá Zonatan lɩrɩ Yaduwa.
12 Nə̀ń Yɩɩ joŋwana tə, ba yà nə yɩ dìì tɩ̀án, Yoyakimə máŋá wa. Meraya yà nə yɩ Seraya dìə̀ tə yáá tíú. Hananɩa yà nə yɩ Zweremi dìə̀ tə yáá tíú. 13 Meswulamə yà nə yɩ Ɛsədərasə dìə̀ tə yáá tíú. Yohanan yà nə yɩ Amarɩya dìə̀ tə yáá tíú. 14 Zonatan yà nə yɩ Meluki dìə̀ tə yáá tíú. Zʋzɛfə yà nə yɩ Swebanɩya dìə̀ tə yáá tíú. 15 Adəna yà nə yɩ Harimə dìə̀ tə yáá tíú. Hɛləkayi yà nə yɩ Merayɔtə dìə̀ tə yáá tíú. 16 Zakari yà nə yɩ Yido dìə̀ tə yáá tíú. Meswulamə yà nə yɩ Gineton dìə̀ tə yáá tíú. 17 Zikəri yà nə yɩ Abɩya dìə̀ tə yáá tíú. Minyamin dìə̀ tə yáá tíú...a Pilətayi yà nə yɩ Mʋadɩya dìə̀ tə yáá tíú. 18 Swamuwa yà nə yɩ Biləga dìə̀ tə yáá tíú. Zonatan yà nə yɩ Swemaya dìə̀ tə yáá tíú. 19 Matənayi yà nə yɩ Yoyaribə dìə̀ tə yáá tíú. Uzi yà nə yɩ Yedaya dìə̀ tə yáá tíú. 20 Kalayi yà nə yɩ Salayi dìə̀ tə yáá tíú. Ebɛrə yà nə yɩ Amɔkə dìə̀ tə yáá tíú. 21 Haswabɩya yà nə yɩ Hiləkiya dìə̀ tə yáá tíú. Netaneyɛlə yà nə yɩ Yedaya dìə̀ tə yáá tíú.
22 Yɩɩ joŋwana yun tɩ̀án nəkwɩna Eliyaswibə, də Yoyada, də Yohanan, də Yaduwa máŋá tə wa, Levi dwíí dìì tɩ̀án tə yɩra yà pʋ́pʋ́nɩ́, tə kə sagɩ wa. Yá Yɩɩ joŋwana tə də yɩra yà pʋ́pʋ́nɩ́, tə kə sagɩ wa, kʋ va kʋ yí Pɛrəsə pɩ̀ʋ́ Dariyusə pàrɩ̀ tə máŋá.
23 Levi bɩ̀á tə nə yɩ dìì tɩ̀án tə yɩra yà pʋ́pʋ́nɩ́, tə tún cɩ́gá cɩ́gá yìə̀n sagɩ wa, kʋ va kʋ yí Eliyaswibə bìú Yohanan máŋá wa.
24 Levi dwíí tə yáá tɩ̀án yà nə yɩ Haswabɩya, də Swerebɩya, də Kadəmɩyɛlə bìú Zozuwe, də ba nubɩa tə duən tə, ba nə yàá zɩgɩ ba yáá nə, púlə́ púlə́, ba bwɩ Ba-Yígúrə́-Jə-Tiu nə, də ba pɩn wá dun, ndə Yɩɩ tʋtʋnʋ Davidə nə pɩn nii, sə kʋ tʋn nətʋ.
25 Matanɩya, də Bakəbukɩa, də Abədɩasə, də Meswulamə, də Taləmon, də Akubə yà nə yɩ mimii nəcɩra. Ba mʋ̀ yà nə cɩ̀ zɩla dìì tə nə, tə nə wulə Yɩɩ dìə̀ tə mimien nə. 26 Mimii nəcɩra təntə yɩn lá, Zozuwe bìú Yoyakimə, ʋ nə yɩ Yosadakə nàʋ́, də nagwanaa yáá tíú Nehemi, də Yɩɩ joŋwanʋ Ɛsədərasə, ʋ nə yɩ Yɩɩ nii yənu tíú*, máŋá wa.
Zwerizalɛmə biritaŋʋ tə cànà diŋə
27 Zwerizalɛmə biritaŋʋ tə cànà tə diŋə máŋá wa, ba vəli, ba twarɩ Levi dwíí tə, bwálá tə mama nə, ba nə wulə, ba ja bà Zwerizalɛmə, sə ba dɩ gwaran də zɩnzɩran, də kwanan, də banan, ba ma də́ cànà, də pupwən. 28 Gwabɩa tə dàń nan tɩbii tə wa, tə nə kɩkarɩ Zwerizalɛmə, ba bà duən yáá. Ba nan Netofa, 29 də Bɛtə-Giləgalə, də Geba tɩbii tə wa, də Azəmavɛtə. Cɩ́gá, gwàgá tə yà lwə̀ tɩbii, ba ja kɩkarɩ Zwerizalɛmə, ba wulə tə wa. 30 Yɩɩ joŋwana tə, də Levi dwíí tə kwɛn ba tɩ̀àn, ba lɩ durən yìə̀n wa. Ba kwɛn lalʋʋ tə də, də mimien tə, də biritaŋʋ tə, ba lɩ durən yìə̀n wa.
31 À pɩn Zwida dwíí yáá tɩ̀án tə dɩ̀ biritaŋʋ tə yuu wa, à ga pwɛ̀ gwàgá tə, à zɩgɩ púlə́ nəfaran bələ. Təntən gwàgá púlí tə nə zɩga biritaŋʋ tə yuu wa, jɩzən vàn con, zàn, ba vələ ywərən mimii tə con. 32 Oze, də Zwida dwíí yáá tɩ̀án tə faan yà púə́ ba kwa, ba vəli. 33 Kʋ yɩn Azarɩya, də Ɛsədərasə, də Meswulamə, 34 də Zwida, də Bɛnzwamɛn, də Swemaya, də Zweremi. 35 Yɩɩ joŋwanbɩa yà púə́ ba kwa, də nabwanan. Kʋ yɩn Zonatan bìú Zakari. Zonatan yà yɩ Swemaya bìú. Swemaya yɩ Matanɩya bìú. Matanɩya yɩ Miswe bìú. Miswe yɩ Zakurə bìú. Zakurə yɩ Azafə bìú. 36 Kʋ dàń súrí Zakari nubɩa Swemaya, də Azarəyɛlə, də Milalayi, də Gilalayi, də Maayi, də Netaneyɛlə, də Zwida, də Hanani nə. Ba yà jə Yɩɩ tʋtʋnʋ Davidə gwaran zɩla tə. Ɛsədərasə, ʋ nə yɩ Yɩɩ nii yənu tíú* yà nə wulə ba yáá. 37 Ba nə yí nabuliyi mimii tə, Davidə sadiyuu tə nacanɩ tə yà wulə ba yáá nə, mənəmənə. Yá ba dàń twá biritaŋʋ tə yɩra nacanɩ təntə, ba dɩ̀, ba wulə Davidə sàń tə yuu con. Ba vəli ba nan nɩ́á mimii tə nə, yɩɩ yipɩan con.
38 Bələ nii gwàgá púlí tə vəli jɩgwiə vàn con. À də lalʋʋ tə faan tə don yà wulə ba kwa, biritaŋʋ tə yuu wa. Nə twá dipɛn wərə sàń dəyuu dìə̀ nədarʋ tə con, nə va, nə nan bwálɩ́ tə, biritaŋʋ tə nə wala. 39 Nə twá Efərayimə mimii tə yuu con, də Yeswana mimii tə yuu con, də Filə mimii tə yuu con, də Hananəyɛlə dəyuu dìə̀ nədarʋ tə con, də Meya dəyuu dìə̀ nədarʋ tə con, nə va nə yí pee mimii tə. Yá nə dàń cən nə zɩgɩ, bandiə mimii tə yuu con. 40 Gwàgá púlə́ bələ tə cən ba zɩga Yɩɩ dìə̀ tə wa. Yá à də cən à zɩgɩ, à də tʋ̀tʋ̀nán yun tɩ̀án tə, ba yà nə wulə də nə. 41 Kʋ súrí Yɩɩ joŋwana Eliyakimə, də Maaseya, də Minyamin, də Miswe, də Eliyowenayi, də Zakari, də Hananɩa nə, ba yà nə wúrí nabwanan. 42 Maaseya, də Swemaya, də Eleyazarə, də Uzi, də Yohanan, də Maləkɩya, də Elamə, də Ezɛrə, də yà wulə lá. Yá gwàgá tə dàń dɩga gwaran, Yɩzəraya ga zɩga ba yáá, ʋ kəni gwaran tə cwəŋə nə.
43 Kʋ dɩɩn tə nə, lɩ̀à tə fwa jwəŋə kapʋpʋ, ba pa Yɩɩ nə, də pupwən nəfarʋ. Cɩ́gá, Yɩɩ yà fwa pupwən yoo nəfarʋ, ʋ pa ba. Kana də bìsɩ́ná də tətə fwa pupwən. Yá lɩ̀à zɩgɩ yiŋʋnɩ, ba nì pupwən zizigu tə, Zwerizalɛmə wa.
44 Kʋ dɩɩn tə nə, ba tún bara, sə ba ywàń dibɩa tə yuu nə, ba nə ma túŋə́ wiən tə, ba nə lá, də təntən wobɩa, də fugə nii nyiən. Ba pɩn ba nii, sə ba va lʋʋ nii tə tɩan tə wa, ba lá kárɩ́ wiən tə, Yɩɩ nii* tə nə bɩrɩ, də tə ya Yɩɩ joŋwana tə, də Levi dwíí tə tori, ba ja bà, ba tún dibɩa təntə wa. Cɩ́gá, Zwida dwíí tə pùə́ yà poli, Yɩɩ joŋwana tə, də Levi dwíí tə tʋtʋŋɩ tə yuu wa. 45 Ba yà tʋŋa ba Yɩɩ tʋtʋŋɩ tə zəni, ba ga ywàŋá ka kwɛn lɩ̀à, ka lɩ durən yìə̀n wa tʋtʋŋɩ tə də yuu zəni. Gwàgá tə, də mimii nəcɩra tə də twá kʋ tə nii nə zəni, Davidə də ʋ bìú Salʋmʋn nə pɩn nii, sə kʋ tʋn. 46 Cɩ́gá, Davidə də Azafə máŋá tə wa, gwàgá yáá tɩ̀án yà wulə, ba nə dɩ gwaran, ba ma bwɩ Yɩɩ nə, də ba pɩn wá dun. 47 Zorobabɛlə máŋá tə, də Nehemi máŋá tə wa, Yɩzərayɛlə lɩ̀à tə mama yà pɩn gwàgá tə, də mimii nəcɩra tə tori tə, dɩɩn mama. Ba yà pɩn Yɩɩ tori tə də, ba nə túŋə́ vàn nə, ba pɩn Levi dwíí tə nə. Yá Levi dwíí tə də dàń yàá lɩ Yɩɩ tori, ba tún vàn nə, ba pa Aron bɩ̀á tə nə.