Nehemi 11

Zwifə-ba tə, ba nə pìí ba bà, sə ba ya Zwerizalɛmə wa

1 Lalʋʋ tə yáá tɩ̀án tə twi, ba jə̀ə́ Zwerizalɛmə wa. Lalʋʋ tə gɩganɩ tə pwárɩ́, sə lɩ̀à fugə mama yuu wa, sə ladʋa bà, ʋ jə̀ń Zwerizalɛmə wa, kʋ nə yɩ Yɩɩ tɩʋ, sə lɩ̀à nʋgʋ tə ga ya tɩan tə duən tə wa. 2 Lalʋʋ tə lòrì, sə Yɩɩ fwa zəni lɩ̀à tə mama yɩra, ba nə sɛ̀ ba tɩ̀àn nə, sə ba jə̀ń Zwerizalɛmə wa.

3 Nə̀ń Zwida nagwanaa tə yáá tɩ̀án tə, ba nə twi, ba jə̀ə́ Zwerizalɛmə wa. Yá Yɩzərayɛlə lɩ̀à tə duən tə mʋ̀, ba nə yɩ Yɩɩ joŋwana, də Levi dwíí, də Yɩɩ dìə̀ tʋ̀tʋ̀nà, də Salʋmʋn tʋ̀tʋ̀nà tə dwíí tə, lìù mama vəli ʋ jə̀ə́ ʋ dəkuu bwálɩ́ nə, ʋ nyɩna tɩʋ wa, Zwida tɩan tə wa.

4 Zwida dwíí lɩ̀à duən, də Bɛnzwamɛn dwíí lɩ̀à duən, twi ba jə̀ə́ Zwerizalɛmə wa. Zwida dwíí tə wa, kʋ yɩn Ataya, ʋ nə yɩ Uzɩya bìú. Uzɩya yɩ Zakari bìú, Zakari yɩ Amarɩya bìú, Amarɩya yɩ Swefatɩya bìú, Swefatɩya yɩ Mahalaleyɛlə bìú, Mahalaleyɛlə yɩ Perɛsə bìú don. 5 Lìù tə nə súrí lá, kʋ yɩ Maaseya, ʋ nə yɩ Barukə bìú. Barukə yɩ Koləhoze bìú, Koləhoze yɩ Hazaya bìú, Hazaya yɩ Adaya bìú, Adaya yɩ Yoyaribə bìú, Yoyaribə yɩ Zakari bìú, Zakari yɩ Swiloni bìú. 6 Perɛsə dwíí lɩ̀à tə mama, ba nə twi, ba jə̀ə́ Zwerizalɛmə wa, yɩn babɩran 468.

7 Bɛnzwamɛn dwíí tə wa, kʋ yɩn Salu, ʋ nə yɩ Meswulamə bìú. Meswulamə yɩ Yowɛdə bìú, Yowɛdə yɩ Pedaya bìú, Pedaya yɩ Kolaya bìú, Kolaya yɩ Maaseya bìú, Maaseya yɩ Yɩtɩyɛlə bìú, Yɩtɩyɛlə yɩ Ezayi bìú. 8 Kʋ súrí Gabayi də Salayi nə. Bɛnzwamɛn dwíí lɩ̀à tə mama yɩn 928. 9 Zikəri bìú Zʋwɛlə yà nə ywàŋá ba púlí tə yuu nə. Yá Sənuwa bìú Zwida yà nə daa tɩʋ tə pɩ̀ʋ́ nə.

10 Yɩɩ joŋwana tə wa, kʋ yɩn Yoyaribə bìú Yedaya, də Yakin, 11 də Hiləkiya bìú Seraya. Hiləkiya yɩ Meswulamə bìú, Meswulamə yɩ Sadɔkə bìú, Sadɔkə yɩ Merayɔtə bìú, Merayɔtə yɩ Yɩɩ joŋwana yun tɩ̀án nəkwɩa Ahitubə bìú. 12 Kʋ súrí ba nubɩa 822 nə, ba nə tʋŋa Yɩɩ dìə̀ tə wa. Kʋ súrí Yerohamə bìú Adaya nə. Yerohamə yɩ Pelalɩya bìú, Pelalɩya yɩ Aməsi bìú, Aməsi yɩ Zakari bìú, Zakari yɩ Paswəhurə bìú, Paswəhurə yɩ Maləkɩya bìú. 13 Kʋ dàń súrí Adaya nubɩa 242 nə, ba nə yɩ dìì tɩ̀án, də Azarəyɛlə bìú Amaswəsayi. Azarəyɛlə yɩ Azayi bìú, Azayi yɩ Meswilemɔtə bìú, Meswilemɔtə yɩ Yɩmɛrə bìú. 14 Kʋ dàń súrí ba nubɩa 128 nə, ba nə yɩ kwatara babɩran. Gedolimə bìú Zabədiyɛlə yà nə ywàŋá ba púlí tə yuu nə.

15 Levi dwíí tə wa, kʋ yɩn Haswubə bìú Swemaya. Haswubə yɩ Azərikamə bìú, Azərikamə yɩ Haswabɩya bìú, Haswabɩya yɩ Buni bìú. 16 Levi dwíí tə yáá tɩ̀án tə wa, Swabətayi də Yozabadə yà nə ywàŋá Yɩɩ dìə̀ tə kàrá con tʋ̀tʋ̀nán tə yuu. 17 Kʋ súrí Miswe bìú Matanɩya nə, ʋ nə yɩ Azafə dwíí. Ʋ mʋ̀ yà nə yɩ gwaran yáá tíú, máŋá tə wa, ba nə bwɩ Yɩɩ nə. Ʋ nyɩna Miswe yɩ Zabədi bìú, Zabədi yɩ Azafə bìú. Matanɩya nubɩa tə wa, Bakəbukɩa yà nə daa ʋ nə. Kʋ dàń súrí Swamʋa bìú Abəda nə. Swamʋa yɩ Galalə bìú, Galalə yɩ Yedutunə bìú. 18 Levi dwíí tə mama, ba nə twi, ba jə̀ə́ Yɩɩ tɩʋ tə wa, yɩn lɩ̀à 284.

19 Mimii nəcɩra tə wa, kʋ yɩn Akubə, də Taləmon, də ba nubɩa tə. Mə ba mʋ̀ yà nə cɩ̀ mimien tə nə. Ba mama yɩn lɩ̀à 172.

20 Yɩzərayɛlə lɩ̀à tə gɩganɩ tə, də Yɩɩ joŋwana tə, də Levi dwíí tə dàń vəli, ba jə̀ə́ Zwida tɩan tə duən tə mama wa, ba lìù mama, ʋ dəkuu bwálɩ́ wa. 21 Yɩɩ dìə̀ tʋ̀tʋ̀nà tə yà yɩ ba jə̀ə́ Ofɛlə paan sanii tə wa. Siha də Giswəpa yà nə yɩ ba yáá tɩ̀án.

22 Uzi yà nə ywàŋá Levi dwíí tə yuu nə, ba nə wulə Zwerizalɛmə wa. Uzi yɩ Bani bìú, Bani yɩ Haswabɩya bìú, Haswabɩya yɩ Matanɩya bìú, Matanɩya yɩ Miswe bìú. Ʋ yà yɩ Azafə dwíí lìù. Azafə dwíí tə yɩ gwàgá, ba dɩ gwaran Yɩɩ dìə̀ tə wa. 23 Pɩ̀ʋ́ tə yà pɩn nii gwàgá tə nə, ba tʋtʋŋɩ tə yuu wa. Ʋ pɩn, ba yə̀ə́ kʋ tə, ba nə mɛ, sə ba tʋn dɩɩn mama.

24 Zwida bìú Zera dwíí tə wa, Meswezabɛlə bìú Petaya yà nə wulə pɩ̀ʋ́ tə səpuni nə, ʋ pɩn wá kwìə̀, Yɩzərayɛlə lɩ̀à tə yìə̀n yuu wa.

25 Zwida dwíí lɩ̀à duən vəli, ba jə̀ə́ tɩan duən, də tə nii tɩbii wa. Ba yà jə̀ə́ Kiriyatə-Arəba, də kʋ nii tɩbii tə wa, də Dibon, də kʋ nii tɩbii tə wa, də Yekabəseyɛlə də kʋ nii tɩbii tə wa, 26 də Yesuwa nə, də Molada nə, də Bɛtə-Pelɛtə nə, 27 də Hasarə-Swuwalə nə, də Bɛrəsweba, də kʋ nii tɩbii tə wa, 28 də Sikəlagə nə, də Mekona, də kʋ nii tɩbii tə wa, 29 də Eyin-Rimon nə, də Sora nə, də Yarəmutə nə, 30 Zanʋa də Adulamə, də tə nii tɩbii tə wa, də Lakiswə, də kʋ nii tɩbii tə wa, də Azeka, də kʋ nii tɩbii tə wa. Ba jə̀ń, kʋ nə zɩgɩ Bɛrəsweba nə, kʋ va kʋ yí Hinomə vara tə.

31 Bɛnzwamɛn dwíí tə jə̀ń Geba nə, də Mikəmasə nə, də Aya nə, də Betɛlə, də kʋ nii tɩbii tə wa, 32 də Anatɔtə nə, də Nɔbə nə, də Ananɩya nə, 33 də Hasɔrə nə, də Rama nə, də Gitayimə nə, 34 də Hadidə nə, də Seboyimə nə, də Nebalatə nə, 35 də Lodə nə, də Ono nə, də jɩɩn tʋ̀tʋ̀nà vara tə wa.

36 Yá Zwida nagwanaa tə wa, Levi dwíí lɩ̀à duən vəli, ba jə̀ə́ Bɛnzwamɛn nagwanaa tɩan tə wa.