Nehemi 10

Lalʋʋ tə kúrí ba tì, sə ba zìlí Yɩɩ nii tə

1 Tə mʋ̀ yìə̀n təntə mama yɩrɩ, tə nə yí nə mʋ̀ Yɩzərayɛlə lɩ̀à tə, nə dàń ken nii nədʋ, nə ga pʋ́pʋ́nɩ́ kʋ nətʋ tə, nə tún sagɩ wa. Nə yáá tɩ̀án tə, də Levi dwíí tə, də nə Yɩɩ joŋwana tə yɩra yà pʋ́pʋ́nɩ́ sagɩ təntə yuu wa, ba ga tún ba jɩɩn mɩmɩnʋ lá.

2 Nə̀ń lɩ̀à tə, ba yɩrɩ, də ba jɩɩn mɩmɩnʋ nə wulə sagɩ tə yuu wa. Kʋ yɩ Hakalɩya bìú Nehemi, ʋ nə yɩ nagwanaa yáá tíú, də Sedesɩyasə, 3 də Seraya, də Azarɩya, də Zweremi, 4 də Paswəhurə, də Amarɩya, də Maləkɩya, 5 də Hatuswə, də Swebanɩya, də Malukə, 6 də Harimə, də Meremɔtə, də Abədɩasə, 7 də Danɩyɛlə, də Gineton, də Barukə, 8 də Meswulamə, də Abɩya, də Mɩyamɛn, 9 də Maazɩya, də Biləgayi, də Swemaya. Ba mʋ̀ yà yɩ Yɩɩ joŋwana.

10 Levi dwíí lɩ̀à yɩn Azanɩya bìú Zozuwe, də Binuwi, ʋ nə yɩ Enadadə bɩ̀á tə wa lìù, də Kadəmɩyɛlə, 11 də ba nubɩa Swebanɩya, də Hodɩya, də Kelita, də Pelaya, də Hanan, 12 də Miswe, də Rehɔbə, də Haswabɩya, 13 də Zakurə, də Swerebɩya, də Swebanɩya, 14 də Hodɩya, də Bani, də Beninu.

15 Lalʋʋ tə yáá tɩ̀án tə yɩn Parewɔswə, də Pahatə-Mʋabə, də Elamə, də Zatu, də Bani, 16 də Buni, də Azəgadə, də Bebayi, 17 də Adoniya, də Bigəvayi, də Adinə, 18 də Atɛrə, də Ezekɩasə, də Azurə, 19 də Hodɩya, də Haswumə, də Besayi, 20 də Harifə, də Anatɔtə, də Nebayi, 21 də Magəpɩyaswə, də Meswulamə, də Ezirə, 22 də Meswezabɛlə, də Sadɔkə, də Yaduwa, 23 də Pelatɩya, də Hanan, də Anaya, 24 də Hoze, də Hananɩa, də Haswubə, 25 də Halohɛswə, də Piləha, də Swobɛkə, 26 də Rehumə, də Haswabəna, də Maaseya, 27 də Ahɩya, də Hanan, də Anan, 28 də Malukə, də Harimə, də Baana.

29 Lalʋʋ tə gɩganɩ tə mama, də Yɩɩ joŋwana tə, də Levi dwíí lɩ̀à tə, də mimii nəcɩra tə, də gwàgá tə, də Yɩɩ dìə̀ tʋ̀tʋ̀nà tə, də lɩ̀à tə mama, ba nə pwɛ̀ ba tɩ̀àn, ba lɩ dwíə́ nəkaran* tə wa, sə ba twá Yɩɩ nii tə nə, də ba kana, də ba bibara, də ba bikana, ba tə mama, ba nə yə̀ə́ yoo də̀ń, 30 dàń zʋa ba nubɩa təntə kwa, ba nii nə du. Yá ba dàń kàn nii, ba ga dù, də ba wá twá Yɩɩ nii tə nə, ʋ nə twá də ʋ tʋtʋnʋ Moyizə, ʋ ma pa ba. Ba dùə̀, də ba wá twá yìə̀n tə mama nə, Ba-Yígúrə́-Jə-Tiu, nə Yuu-Tiu nə pɩn nii tə yuu wa, də yìə̀n tə ʋ nə bɩrɩ sə tə tʋn, də yìə̀n tə ʋ nə pɩn tə pʋ́pʋ́nɩ́, sə ba twá tə nə. 31 Nə kàn nii, də nə bá pa nə bwɩ̀ɩ́ swe lʋʋ nii tə lɩ̀à nə, nə ga bá swe ba bwɩ̀ɩ́, nə pa nə bɩ̀á nə. 32 Lʋʋ nii tə lɩ̀à nə ja wodirən, nə à yə̀ə́ woyolu wiən yiri mama ba bà sìə́ dɩɩn tə, nə à yə̀ə́ cànà dɩɩn nə, nə bá yə̀ won mama, ba con. Yá barpɛ nii bɩnɩ mama, nə wá yá nə kárɩ́, nə pa tə sìí, nə ga yá jɩŋa, nə pa jɩjɩŋa nə.

33 Nə tə tún bwaan nə tɩ̀àn yuu wa, sə nə pa səbilugu nədʋ pwɩ̀ʋ̀ batwa nii nyiən, bɩnɩ mama, kʋ nə wá san lá, sə ba ma tʋn nə Yɩɩ tə dìə̀ tʋ̀tʋ̀nán tə. 34 Tə mʋ̀ nə yɩ dipɛn tə, ba nə túŋə́, ba pɩn Yɩɩ nə, də vàrʋ́ càlɩ̀ jwəŋə tə, ba nə pɩn Yɩɩ nə wuuu, də jwəŋə tə, ba nə sʋ̀rɩ́, ba pɩn Yɩɩ nə wuuu, də sìə́ dɩan tə, də càndʋra tə, də cànɩ̀ tə duən tə, də wiən tə, ba nə túŋə́ vàn nə, ba pɩn Yɩɩ nə, də Yɩzərayɛlə lɩ̀à tə cʋna kwɩan jwəŋə tə, də tʋ̀tʋ̀nán tə duən tə mama, tə nə wulə nə Yɩɩ tə dìə̀ tə wa. 35 Nə mʋ̀, də Yɩɩ joŋwana tə, də Levi dwíí tə, də lalʋʋ tə mama dàń pwárɩ́, sə nə lwarɩ máŋá tə, dìə̀ mama lɩ̀à nə mɛ, sə ba ja dɛɛ ba bà nə Yɩɩ tə dìə̀ tə wa, bɩnɩ mama, sə ba ma kə mən Ba-Yígúrə́-Jə-Tiu, ʋ nə yɩ nə Yɩɩ, joŋi bwálɩ́ tə yuu wa, ndə kʋ nə pʋ́pʋ́nɩ́ Yɩɩ nii sagɩ tə wa nətʋ. 36 Nə kàn nii də bɩnɩ mama, nə wá ja nə kárɩ́ təntən wobɩa, də tɩ̀án tə mama təntən lənə, nə bà nə pa Ba-Yígúrə́-Jə-Tiu dìə̀ tə wa. 37 Nə wá ja nə bɩ̀á tə wa təntən bibara, nə vanfaran də nə vanmɩnɩ tə wa təntən bɩ̀á tə nə yɩ bara, nə bà nə Yɩɩ dìə̀ tə wa, ndə kʋ nə pʋ́pʋ́nɩ́ Yɩɩ nii sagɩ tə wa nətʋ. Nə wá pa tə Yɩɩ joŋwana tə nə, ba nə tʋŋa Yɩɩ tʋtʋŋɩ tə, nə Yɩɩ dìə̀ tə wa. 38 Nə tə wá fwa nə təntən mun tə nə ziən zənzən vàn don, də zìlə́ wiən duən, nə nə wá lɩ wobɩa yuu wa, də tɩ̀án tə mama lənə yuu wa, də divɛn nədʋn yuu wa, də nʋga yuu wa, nə ja bà, nə pa Yɩɩ joŋwana tə nə, nə Yɩɩ dìə̀ tə wodirən dibɩa tə wa. Nə wá pa nə kárɩ́ wiən fugə nii nyiən, Levi dwíí tə nə. Ba tətə nə wá va, ba jon tə, tɩan tə mama wa, bwálɩ́ tə, nə nə vàrɩ̀. 39 Aron dwíí tə wa Yɩɩ joŋwanʋ mɛ, sə ʋ kwé Levi dwíí tə, máŋá tə wa, ba nə wá va, sə ba jon fugə nii nyiən tə. Yá Levi dwíí tə dàń wá lɩ fugə nii nyiən təntə fugə nii nyiən, ba ja bà, ba tún nə Yɩɩ dìə̀ tə wodirən dibɩa tə wa. 40 Cɩ́gá, mə dibɩa təntə wa nə, Yɩzərayɛlə lɩ̀à tə, də Levi dwíí tə wá ja zìlə́ wiən tə, ba nə lɩ mɩna yuu wa, də divɛn nədʋn yuu wa, də nʋga yuu wa, ba bà, ba tún. Mə lá nə, Yɩɩ wúlú bwálɩ́ tə tʋtʋnzɩla tə wulə. Yá mə lá nə, Yɩɩ joŋwana tə nə wulə tʋ̀tʋ̀nán wa, də mimii nəcɩra tə, də gwàgá tə də jəni.

Mə kʋ wá zɩgɩ nətʋ, nə ma bá vɩ̀ nə Yɩɩ dìə̀ tə, nə dʋgʋ.