Lalʋʋ tə vwə ba nii, ba jʋn Yɩɩ, ba cʋna tə yɩrɩ
9
1 Cànà təntə tətə dɩan sapʋa də banɩa dɩɩn nə, Yɩzərayɛlə lɩ̀à tə twi duən yáá, sə ba vwa ba nii. Ba yà ja ganlwaran ba pipini ba tɩ̀àn, ba ga lwá pùrú ba yuu wa.a 2 Ba tə nə yɩ Yɩzərayɛlə dwíí tə pwɛ̀ ba tɩ̀àn ba lɩ vərə tə mama wa. Yá ba dàń lòrì, sə Yɩɩ kwɛn ba cʋna tə, də ba nyɩna-ba cʋna tə, ʋ lɩ. 3 Kʋ kwa nə, ba zàn ba zɩgɩ yɩɩ nə, bwálɩ́ nədʋ, ba cʋgʋ Ba-Yígúrə́-Jə-Tiu, ʋ nə yɩ ba Yɩɩ, nii sagɩ tə karʋ, kʋ dán lugu batwa. Yá ba tʋa ba nadwana yuu, Ba-Yígúrə́-Jə-Tiu yáá con, ʋ nə yɩ ba Yɩɩ, ba lòrì wá, sə ʋ kwɛn ba cʋna tə, ʋ lɩ. Yá kʋ nətʋ tə də dán lugu batwa duən.4 Zozuwe, də Bani, də Kadəmɩyɛlə, də Swebanɩya, də Buni, də Swerebɩya, də Bani, də Kenani zàn, ba zɩgɩ Levi dwíí gárɩ́ tə yuu wa, ba bubwi ba kə Ba-Yígúrə́-Jə-Tiu nə, ʋ nə yɩ ba Yɩɩ. 5 Yá Zozuwe, də Kadəmɩyɛlə, də Bani, də Haswabənɩya, də Swerebɩya, də Hodɩya, də Swebanɩya, də Petahɩya, ba nə yɩ Levi dwíí tə, dàń swɩ̀n lalʋʋ tə con, ba wʋ́: «Á zaŋa, á bʋ Ba-Yígúrə́-Jə-Tiu nə, ʋ nə yɩ á Yɩɩ! Á bwɩa ʋ nə, máŋá mama wuuu!
Ba-Yígúrə́-Jə-Tiu, nə mɛ, sə nə bʋ n yɩrɩ tə nə!
N yɩrɩ tə jə dun, kʋ ga mɛ də bʋra!
N yɩrɩ tə dwə dun də bʋra yiri mama!
6 N mʋ̀ cɩcɩ nə yɩ Ba-Yígúrə́-Jə-Tiu!
N mʋ̀ nə fwa lanworu tə,
lanworu tə də kʋ dánɩ́ tə mama,
də kʋ waa wiən tə mama.
N mʋ̀ nə fwa tɩa, də ka yuu wiən mɛ.
N mʋ̀ nə fwa mʋran, də tə waa wiən mɛ.
N mʋ̀ nə pɩn mɩɩ won mama nə,
yá lanworu tə waa wiən tə twɩ n yáá con,
tə pɩn mʋ́ dun.
7 N mʋ̀ Yɩɩ tə, n nə yɩ Ba-Yígúrə́-Jə-Tiu, nə kúrí Abəramə.
N pɩn ʋ nan Urə, Kaləde lʋʋ nii tə wa,
yá n dàń lwàń ʋ yɩrɩ tə, n kə Abərahamə.
8 N nɩ də, ʋ yɩ təgətəgə n yáá con,
yá n dàń tún nimarʋ də wá,
n ga kàn nii, də n wá pa lʋʋ nii tə,
kʋ nə yɩ Kanaan tɩ̀án,
də Ɛtə dwíí tə, də Amon dwíí tə,
də Perizi dwíí tə, də Yebusə tɩ̀án,
də Girəgasə tɩ̀án lʋʋ nii, ʋ dwíí nə.
Yá n pɩn n nikanɩ tə nii sú,
n nə yɩ cɩ́gá tíú yɩrɩ.
9 N nɩ nə nɩbara-ba nə dí yinəgə nətʋ, Ezwipətə nə.
Yá n nì ba bubwiə tə,
ba nə bubwi ba kə n nə, Mɩncanɩ mʋʋ tə nii nə.
10 N tʋn dɩ̀àn mɩmɩnan, də yomɩlan,
n zɩgɩ Ezwipətə pɩ̀ʋ́ tə nə,
də ʋ tʋ̀tʋ̀nán yun tɩ̀án tə mama nə,
də ʋ lʋʋ lɩ̀à tə mama nə.
Cɩ́gá, n yà yə̀ə́ nətʋ tə, Ezwipətə tɩ̀án nə wà n mʋ̀ Yɩɩ fən dəri,
ba ma fɩfɩn nə nɩbara-ba tə.
Yá n dàń pɩn n yɩrɩ nan, də zə̀n mama.
11 N pwɛ̀ mʋʋ tə nɩ́á duən wa,
n yá cwəŋə nə nɩbara-ba yáá con,
n pa ba twá tɩkʋrʋ yuu, mʋʋ tə titəŋi wa, ba nan.
Yá n buburi ba dʋŋa tə mʋ̀,
ba yà nə dɩŋɩ ba kwa, mʋʋ tə wa.
Ba cúə́ nɩ́á də̀ń,
ndə kapan nə tʋa naluŋə wa.
12 Yɩcaʋ wa, n yàá twá bakwan kùlì nə,
n ma bɩrɩ ba cwəŋə.
Yá tɩtɩn nə, n yàá ja mənvwə, n ma pɩ̀rɩ̀ cwəŋə tə,
ba nə mɛ, sə ba tì.
13 N cúə́ Sinayi paan tə yuu wa,
yá n zɩgɩ Yɩɩ sàń nə, n swɩ̀n ba con.
N bɩrɩ ba yìə̀n sə ba tʋn, tə nə yɩ mənəmənə,
n ga pa ba n nii yìə̀n, tə nə yɩ cɩ́gá.
N pɩn ba kwìə̀ tə nə ziən, sə ba twá tə nə,
n ga pa ba nii yìə̀n yuu wa, tə nə jə fɩra.
14 N pɩn ba lwarɩ n sìə́ dɩɩn nəzəŋu tə.
Yá n twá də n tʋtʋnʋ Moyizə,
n pʋ́pʋ́nɩ́ n nii yìə̀n tə, n pa ba.
N pɩn ba nii yìə̀n yuu wa,
n ga pa ba kwìə̀, sə ba twá tə nə.
15 N zɩgɩ Yɩɩ sàń nə, n pa ba wodiu,
máŋá tə wa, niən nə jɩn ba.
Yá n pɩn nɩ́á pɛ́n tə nan pɩ̀ʋ̀ wa, ba nyʋn,
máŋá tə wa, nanyʋnɩ nə jɩn ba.
Yá n swɩ̀n ba con,
sə ba va ba tɩnɩ lʋʋ nii tə,
n nə kàn nii, də n wá pa ba.
16 Yá nə nɩbara-ba jɩn fwiə, də zɩbaniu.
Ba wà n yìə̀n tə nə twá, n nə pɩn nii tə yuu wa.
17 Ba vɩga, sə ba zìlí n nii,
yá ba swɛ̀ɛ́ yomɩlan tə,
n nə fwa, n pa ba.
Ba jìgə̀ zɩbanənyɩna,
yá ba zɩbaniu tə wa,
ba dàń lɩ yáá tíú ba tún,
sə ba pìí ba va, ba ya ba yongaʋ tə wa.
Yá n mʋ̀ yɩ Yɩɩ tə, n nə kwɛn cʋna, n lɩ.
N dəri lɩ̀à yinəgə,
n ga tʋŋa pubwanʋ lɩ̀à yɩra.
N yɩ wʋywanyiən,
n lɩŋa ba lala zaŋa.
Kʋ mʋ̀ nə pɩn, n mʋ̀ wà ba vɩ, n dʋgʋ.
18 Ba fwa sɩ́án nabiə,
ba ga swɩ̀n ba wʋ́:
“Nəŋə nə Yɩɩ tə,
ʋ nə pɩn nə nan Ezwipətə lʋʋ nii tə wa.”
Ba tʋtʋnɛɛ tə cʋ̀gʋ̀ n yɩrɩ nə zənzən,
19 yá də kʋ mɛ, n dəri ba yinəgə,
n wà ba vɩ, n dʋgʋ kasɔɔ lanworu tə wa.
Yɩcaʋ wa, bakwan kùlì tə wà kwɛ̀.
Kʋ yɩn ba yáá,
kʋ kəni ba cwəŋə nə.
Yá tɩtɩn nə, mənvwə tə də wà kwɛ̀.
Ka yɩn lá, ka pɩ̀rɩ̀ cwəŋə tə,
ba nə mɛ, sə ba tì.
20 N pɩn ba n Siŋu nəzəŋu tə,
sə kʋ pa ba wʋbʋŋa.
N wà ba n manə tə voŋi,
sə kʋ ya ba nii wodiu,
yá n pɩn ba nɩ́á, ba nyʋn,
ba ma gʋ ba nanyʋnɩ.
21 N ywàń ba yuu,
bɩna sapwɩlə, kasɔɔ lanworu tə wa,
yá won mama wà ba mùrì.
Ba gànàn wà kwɩn,
ba nɛɛ də ga wà ŋʋ̀nɩ̀.
22 N pɩn ba ta payun, də dwíə́ nəkaran* ba də́,
ba ga jon nagwanɛɛ tə,
ba də tə nə jə sɩswɩan, ba tɩnɩ.
Ba jon Ɛswəbon pɩ̀ʋ́ Sihon lʋʋ nii tə,
də Baswan pɩ̀ʋ́ Ogə lʋʋ nii tə, ba tɩnɩ.
23 N pɩn ba dwíí pùlì zənzən,
ndə lanworu kacɩlacɛɛ nə.
Yá n pɩn ba zʋ lʋʋ nii tə wa,
n yà nə swɩ̀n ba nyɩna-ba con,
sə ba va, ba jon ba tɩnɩ.
24 Ba dwíí tə zʋa lʋʋ nii tə wa,
ba jon kʋ, ba tɩnɩ.
N mun Kanaan tɩ̀án tə, Yɩzərayɛlə lɩ̀à tə yáá con.
Yá n dàń ken Kanaan lʋʋ lɩ̀à tə,
də ba pɛ̀gá tə Yɩzərayɛlə lɩ̀à tə jɩɩn wa,
sə ba ja ba, ba ma fwa kʋ tə, ba nə swə.
25 Ba ta tɩan ba də́,
ba nə lwə̀ ba kɩkarɩ də biritaŋʋ.
Ba jon kárɩ́, tə tɩa nə ywán,
də dìì, tə nə súə́ də jɩjə wiən yiri mama,
də nɩ́á gwàlán tə də̀ń nə lu, tə tɩ̀án yà nə kʋa,
də divɛn tɩ̀án kárɩ́, də olivə* tɩ̀án kárɩ́,
də tɩ̀án zənzən duən, tə nə ləni bɩ̀á.
Ba dí ba sú, ba nu.
Yá won mama dàń yà bʋ́rɩ́ ba,
kʋ twá də n pubwanʋ nəfarʋ tə.
26 Yá, də kʋ nətʋ mɛ, ba vɩga n nii,
ba ga zàn ba zɩgɩ n nə.
Ba viviri ba kwa, ba ma sà n nii yìə̀n tə.
Ba gʋa n nii sʋ̀sʋ̀nà tə,
ba yà nə kwè ba,
sə ba pìí ba bà n con.
Ba tʋtʋnɛɛ tə cʋ̀gʋ̀ n yɩrɩ nə zənzən.
27 Yá kʋ dàń pɩn n kə ba, ba dʋŋa jɩɩn wa,
n pa ba dʋŋa kə càn ba nə.
Ba càn tə máŋá wa, ba bubwi ba kə n nə,
yá n zɩgɩ Yɩɩ sàń nə, n nì ba bubwiə tə,
n ga dəri ba yinəgə.
Yá n dàń tʋn lɩ̀à,
n pa ba jon ba, ba dʋŋa tə jɩɩn wa.
28 Yá máŋá tə, ba nə nɩ sìə́,
ba yàá kʋ́ʋ̀ tʋn lwanɩ, n yáá con.
N dàń yàá yá ba, ba dʋŋa jɩɩn wa,
n pa ba dʋŋa kə càn ba nə.
Ba kʋ́ʋ̀ yàá bubwi, ba kə n nə,
yá n yàá zɩgɩ Yɩɩ sàń nə, n nì ba bubwiə tə.
Yá n nə dəri ba yinəgə tə pɩn,
n jon ba, nɛɛ kapʋpʋ.
29 N kwè ba,
sə ba twá n yìə̀n tə nə, n nə pɩn nii tə yuu wa,
yá ba yɩn zɩbanənyɩna,
ba vɩga, sə ba tʋn yìə̀n tə,
n nə pɩn ba nii tə yuu wa.
Ba tʋn cʋna, ba zɩgɩ yìə̀n tə nə,
n nə bɩrɩ, sə ba tʋn.
Yá tə mʋ̀ ga nə pɩn mɩɩ ləzwənə nə,
də ʋ nə sɛ̀, ʋ twá tə nii nə zəni.
Ba yɩn zɩbanənyɩna, də yidanyɩna.
Ba vɩga, sə ba sɛ̀ nii.
30 N pɩ́án, n ja ba, bɩna kapʋpʋ.
N nii sʋ̀sʋ̀nà tə twá də n Siŋu tə dɩ̀àn, ba kwè ba,
yá ba wà lá tan.
N dàń ken ba dwíə́ nəkaran tə jɩɩn wa.
31 Yá n nə dəri ba yinəgə tə pɩn,
n wà ba cʋ̀gʋ̀ mɩ́ámɩ́án,
n pa ba jɛ́n tɩa yuu wa, n ga wà ba vɩ n dʋgʋ də.
Cɩ́gá, n yɩ Yɩɩ tə, n nə fwa pubwanʋ,
n ga dəri lɩ̀à yinəgə.
32 Yá sɩ́ʋ́n nə, nə nyɩna Yɩɩ,
n yɩ Yɩɩ tə, n nə dáá,
n jə dɩ̀àn, n ga ba kamandon jə.
N mʋ̀ nə ywàŋá nimarʋ tə yuu,
n nə tún də nəba,
n ga tʋŋa wʋywaŋʋ* nə yɩra.
Nə dàń lòrì mʋ̀,
dàn ká gwìə̀n càn tə nə yí nə mʋ̀ n lɩ̀à tə,
də nə pɛ̀gá tə, də nə yáá tɩ̀án tə,
də nə Yɩɩ joŋwana tə, də nə Yɩɩ nii sʋ̀sʋ̀nà tə,
də nə nyɩna-ba tə, də n lɩ̀à tə mama,
kʋ nə zɩgɩ Asiiri pɛ̀gá tə máŋá wa,
kʋ bà kʋ yí zə̀n.
33 N yɩn cɩ́gá tíú,
kʋ tə mama wa, kʋ nə yí nəba.
N twá cɩ́gá nə, ndə kʋ nə mɛ nətʋ,
yá nə mʋ̀ ga ya wʋlʋnyɩna.
34 Nə pɛ̀gá tə, də nə yáá tɩ̀án tə,
də nə Yɩɩ joŋwana tə, də nə nyɩna-ba tə,
wà n nii yìə̀n tə nə twá.
Ba vɩga, sə ba tʋn n yìə̀n tə,
n nə pɩn nii tə yuu wa,
ba ga wà ba tɩ̀àn nə cɩ̀ də yìə̀n tə,
n yà nə swɩ̀n ba con,
sə ba cɩ̀ ba tɩ̀àn nə, də tə.
35 Máŋá tə wa, ba nə zʋa ba payuu tə wa,
yozəŋə tə mama titəŋi wa, n nə pɩn ba,
lʋʋ nii nəfarʋ tə wa, n nə pɩn ba,
kʋ tɩa nə ywán,
ba wà sɛ̀, ba viviri ba kwa,
ba ma sà ba tʋtʋnkʋkwɩnan tə,
sə ba ga tʋn, ba pa mʋ́.
36 Yá nə̀ń kʋ nə, zə̀n kʋ tə,
nə jìgə̀ ywə́ŋə́!
Nə jìgə̀ ywə́ŋə́ lʋʋ nii tə wa,
n nə pɩn nə nyɩna-ba nə,
sə ba də́ kʋ tɩ̀án lənə, də kʋ jɩjə wiən!
37 Nə cʋna tə yɩrɩ,
lʋʋ nii tə wiən kapʋpʋ tə jìgə̀ pɛ̀gá nəkaran tə,
n nə pɩn ba də́ dɩ̀àn nə yuu wa nyiən.
Ba də́ pàrɩ̀ nə yuu wa,
ba ga ja nə də nə vàná tə,
ba fwa kʋ tə, ba nə swə!
Yá nə dàń wulə pucʋnɩ nəfarʋ wa!»