Ɛsədərasə kàrɩ̀ Yɩɩ nii tə, lalʋʋ tə mama yáá con
8
1-2 Barpɛ nii cànà tə təntən dɩɩn nə, Yɩzərayɛlə lalʋʋ tə mama twi duən yáá, ndə ləzwəndʋa nə, Zwerizalɛmə nə, bwálɩ́ tə wa, kʋ nə wulə nɩ́á mimii tə yáá con. Ba swɩ̀n Ɛsədərasə con, ʋ nə yɩ Yɩɩ nii yənu tíú*, ʋ ga yɩ Yɩɩ joŋwanʋ, sə ʋ ja Yɩɩ nii sagɩ tə, Ba-Yígúrə́-Jə-Tiu nə twá də Moyizə, ʋ pʋ́pʋ́nɩ́, ʋ pa Yɩzərayɛlə lɩ̀à tə nə, ʋ bà. Yá Ɛsədərasə dàń ja Yɩɩ nii sagɩ tə, ʋ bà lalʋʋ tə yáá con. Kʋ yà yɩ bara, də kana, də lɩ̀à tə mama, ba nə wàá yoo ba cʋga, ba nì kʋ də̀ń. 3 Ɛsədərasə zɩgɩ bwálɩ́ tə wa, kʋ nə wulə nɩ́á mimii tə yáá con, ʋ kàrɩ̀ Yɩɩ nii sagɩ tə, bara tə, də kana tə, də lɩ̀à tə mama, ba nə wàá yoo ba cʋga, ba nì kʋ də̀ń, yáá con, kʋ nə zɩgɩ jɩjʋ, kʋ va kʋ yí yɩcaʋ gùlú. Lalʋʋ tə mama yà zuri ba yɩra, ba cʋga Yɩɩ nii sagɩ tə karʋ zəni.4 Ɛsədərasə, ʋ nə yɩ Yɩɩ nii yənu tíú, yà dɩ̀gà, ʋ zɩga dɛɛ gárɩ́ yuu wa, ba nə taa kʋ yoo tə yɩrɩ, ba fwa. Matɩtɩa, də Swema, də Anaya, də Uri, də Hiləkiya, də Maaseya yà zɩga Ɛsədərasə jɩzən nə. Yá ʋ jɩgwiə nə, kʋ yà yɩ Pedaya, də Mikayɛlə, də Maləkɩya, də Haswumə, də Haswəbadana, də Zakari, də Meswulamə nə zɩga lá. 5 Ɛsədərasə yà wulə baan, ʋ doni lalʋʋ tə mama. Kʋ nətʋ pɩn, máŋá tə wa, ʋ nə súrí sagɩ tə, kʋ yɩn lalʋʋ tə mama yɩ́á yuu. Yá ba mama dàń zàn, ba zɩga yɩɩ nə. 6 Ɛsədərasə ken Ba-Yígúrə́-Jə-Tiu, Yɩɩ tə, ʋ nə wulə tə mɛ yuu wa lɛ̀ɛ̀. Yá lalʋʋ tə mama dàń zɩ̀n ba jɩ̀àn yɩɩ nə, ba ga le, ba wʋ́: «Amɩɩna! Amɩɩna!» Ba tʋa ba nadwana yuu, Ba-Yígúrə́-Jə-Tiu yáá con, ba pa wá dun. 7 Kʋ kwa nə, lalʋʋ tə zàn, ba zɩgɩ yɩɩ nə, yá Zozuwe, də Bani, də Swerebɩya, də Yamɛn, də Akubə, də Swabətayi, də Hodɩya, də Maaseya, də Kelita, də Azarɩya, də Yozabadə, də Hanan, də Pelaya, ba nə yɩ Levi dwíí lɩ̀à, dàń gwìń Yɩɩ nii yìə̀n tə də̀ń, ba bɩrɩ lalʋʋ tə nə. 8 Ba yà kàrɩ̀ Yɩɩ nii sagɩ tə nəpon nəpon, ba ga gwìń kʋ yìə̀n tə də̀ń, ba bɩrɩ, sə kʋ pa lɩ̀à tə nì kʋ tə, ba nə kàrɩ̀ tə də̀ń zəni.
9 Lalʋʋ tə nə nì Yɩɩ nii sʋ̀ràn tə, ba mama yà wulə ba kwi. Yá Nehemi, ʋ nə yɩ nagwanaa tə yáá tíú, də Ɛsədərasə, ʋ nə yɩ Yɩɩ joŋwanʋ, ʋ ga yɩ Yɩɩ nii yənu tíú, də Levi dwíí tə, ba yà nə kàrɩ̀ lalʋʋ tə, dàń swɩ̀n lalʋʋ tə mama con, ba wʋ́: «Dɩɩn kʋ tə yɩ Ba-Yígúrə́-Jə-Tiu, ʋ nə yɩ á Yɩɩ dɩɩn. Á dànà ká ya pucʋnɩ, də yinɩa wa!» 10 Ɛsədərasə swɩ̀n ba con, ʋ súrí lá, ʋ wʋ́: «Á vələ sàń, á də́ wodiu nəzəŋu, á ga nyʋn divɛn tə nə sʋna. Á jana tə duən á bà, á pa lɩ̀à tə nə, ba nə ba won mama jə ba də́. Cɩ́gá, dɩɩn kʋ tə yɩ nə Yuu-Tiu tə dɩɩn. Á dànà ká ya pucʋnɩ wa. Cɩ́gá, Ba-Yígúrə́-Jə-Tiu pupwən tə nə yɩ á dɩ̀àn. 11 Levi dwíí tə kòrì lalʋʋ tə mama, ba wʋ́: «Á pwíə́ á nii! Cɩ́gá, dɩɩn kʋ tə yɩ Yɩɩ nyiən, á dànà ká ya pucʋnɩ wa.
12 Yá lalʋʋ tə mama dàń vəli, sə ba də́, ba nyʋn, sə ba ja wodirən tə duən, ba bà, ba pa lɩ̀à tə nə, ba nə ba won mama jə ba də́, sə ba ga fwa pupwən nəfarʋ. Cɩ́gá, ba yà nì sʋ̀ràn tə, ba nə gwìń tə də̀ń, ba bɩrɩ ba.
Vuunən cànà diŋə
13 Bələ nii dɩɩn tə nə, lalʋʋ tə dìì tɩ̀án tə mama, də Yɩɩ joŋwana tə, də Levi dwíí tə kun duən nə, Ɛsədərasə con, ʋ nə yɩ Yɩɩ nii yənu tíú*, sə ba cʋgʋ Yɩɩ nii sagɩ tə sʋ̀ràn. 14 Ba nɩ də kʋ pʋ́pʋ́nɩ́ Yɩɩ nii sagɩ tə wa, ʋ nə twá də Moyizə, ʋ pʋ́pʋ́nɩ́, də Yɩzərayɛlə lɩ̀à tə mɛ, sə ba ya vuunən wa, vuunən cànà tə diŋə máŋá wa, barpɛ nii cànà tə wa. 15 Yá ba yà mɛ, sə ba bòrì, ba swɩ̀n ba tɩan tə mama wa, də Zwerizalɛmə wa, sə lɩ̀à tə nan, ba va paan tə yuu, ba kɛ́n olivə* tɩ̀án tə, ba nə cwɛn vʋran, də gaʋ olivə tɩ̀án vʋran, də kawalʋ vʋran, də kʋra nɛɛ, də tɩ̀án bigən vʋran, sə ba ma kə vuunən, ndə kʋ nə pʋ́pʋ́nɩ́ nətʋ.
16 Lalʋʋ tə dàń nan, ba va, ba kɛ́n tɩ̀án vʋran, ba ja bà, ba ma kə vuunən. Ba duən ken ba vuun ba dəyuu wa, ba duən kə kʋ ba dəwoo wa, ba duən kə kʋ Yɩɩ dìə̀ dəwoo tə wa, ba duən də kə kʋ nɩ́á mimii tə bwálɩ́ nə, də Efərayimə mimii tə bwálɩ́ nə. 17 Lalʋʋ tə púlí tə mama, ba nə pìí ba nan yongaʋ tə ba bà, ken vuunən, ba ya tə wa. Kʋ nə zɩgɩ Nun bìú Zozuwe máŋá tə nə, kʋ bà kʋ yí dɩɩn təntə, Yɩzərayɛlə lɩ̀à tə yà wà yoo təntə yiri tʋn. Yá kʋ dàń yɩn pupwən nəfarʋ. 18 Ba dí cànà tə, dɩan barpɛ. Yá ba yàá kàrɩ̀ Yɩɩ nii sagɩ tə wa, dɩɩn mama, kʋ nə zɩgɩ təntən dɩɩn tə nə, kʋ va kʋ yí talɩkwa dɩɩn tə. Yá ka gúrí nana nii dɩɩn tə nə, də kunə nəfarʋ, ndə kʋ nə mɛ nətʋ.