Nehemi
Nehemi sagɩ tə yuu wa sʋgʋ
Nehemi sagɩ tə wa yìə̀n tə yɩ tə təni, Ɛsədərasə sagɩ ta wa yìə̀n tə nii nə. Fuən nə, saga bələ təntə yà yɩ sagɩ nədʋ. Kʋ wa yìə̀n tə duən yɩ Nehemi tətə yìə̀n, ʋ nə pʋ́pʋ́nɩ́ ʋ tún. Nehemi də Yɩɩ joŋwanʋ Ɛsədərasə yɩ máŋá nədʋ lɩ̀à. Ʋ yɩn Pɛrəsə pɩ̀ʋ́ Arətasɛrəsɛsə tʋtʋna yáá tíú. Swapitərə 1 vɛrəse 1, kʋ va kʋ yí swapitərə 2 vɛrəse 10 wa, kʋ bɩrɩ də Pɛrəsə pɩ̀ʋ́ Arətasɛrəsɛsə pɩn cwəŋə Nehemi nə, sə ʋ va ʋ tɩʋ Zwerizalɛmə, ʋ bɩrɩ ba, kʋ tə nə ziən, də kʋ tə nə jə nywaran, də nətʋ tə ba nə mɛ, sə ba ya duən nə. Swapitərə 2 vɛrəse 11, kʋ va kʋ yí swapitərə 7 vɛrəse 72 wa, kʋ bɩrɩ də Nehemi nə twi Zwerizalɛmə wa, dʋŋa yɩn lá ba nə zɩgɩ ʋ nə. Yá də kʋ nətʋ mɛ, ʋ dwíí tə lɩ̀à kapʋpʋ san wá, ʋ ga pìí ʋ lwà Zwerizalɛmə bəri tə. Swapitərə 8 vɛrəse 1, kʋ va kʋ yí swapitərə 10 vɛrəse 40 wa, kʋ bɩrɩ də Nehemi də Ɛsədərasə yɩn duən nə, máŋá tə wa Ɛsədərasə nə kàrɩ̀ Yɩɩ nii sagɩ tə. Levi dwíí tə gwin sʋgʋ tə də̀ń, ba bɩrɩ lɩ̀à tə nə, ba nə ba Ebərə nə̀ń. Yá lalʋʋ tə dàń pìí ba kan nii, də ba wá twá Yɩɩ nə. Swapitərə 11 vɛrəse 1, kʋ va kʋ yí 12 vɛrəse 26 wa, Nehemi bɩrɩ ba, kʋ tə nə ziən sə ba tʋn. Swapitərə 12 vɛrəse 27, kʋ va kʋ yí vɛrəse 43 wa, ʋ pɩn ba də́ cànà, bərə tə yɩrɩ ba nə lwà, sə ʋ ma pa ka Yɩɩ nə. Swapitərə 12 vɛrəse 44, kʋ va kʋ yí swapitərə 13 vɛrəse 31 wa, Nehemi pìí ʋ kwɛn lɩ̀à tə, ʋ kə Yɩɩ cwəŋə tə wa, ndə kʋ nə mɛ, sə kʋ ya nətʋ.
Nehemi sagɩ tə bɩrɩ nəba, ʋ tʋtʋŋɩ, də ʋ pubʋŋa, də ʋ wʋdɩʋ nə yɩn nətʋ. Ʋ yà jʋnɩ Yɩɩ máŋá mama, tʋ̀tʋ̀nán tə mama yɩrɩ.