<<    <     Ɛsədərasə     10     >    >> 
Zwifə-ba tə dʋgʋ ba kavərə tə
10
1 Máŋá tə, Ɛsədərasə nə tʋa ʋ nadwana yuu, Ba-Yígúrə́-Jə-Tiu dìə̀ tə yáá con, ʋ kwi, də ʋ lwɛ̀ Ba-Yígúrə́-Jə-Tiu nə nətʋ, Yɩzərayɛlə lɩ̀à kapʋpʋ, bara də kana, də bìsɩ́ná twi, ba kun ʋ con, ba mama dàń ga kwi zənzən. 2 Yehiyɛlə bìú Swekanɩya, ʋ nə yɩ Elamə nàʋ́ ma swɩ̀n Ɛsədərasə con, ʋ wʋ́: «Nə swe dwíə́ nəkaran* bwɩ̀ɩ́, ba nə yɩ lʋʋ nii kʋ tə wa lɩ̀à, nə ma tʋn cʋna, nə zɩgɩ nə Yɩɩ tə nə. Yá sɩ́ʋ́n nə, Yɩzərayɛlə lɩ̀à tə jə yala, də kʋ nətʋ mɛ. 3 Nə dàń wá kàn nii sɩ́ʋ́n nə, nə Yɩɩ tə yáá con, də nə wá dʋgʋ kana təntə, də ba bɩ̀á tə mɛ. Nə wá tʋn kʋ tə, n mʋ̀ nə yáá tíú tə, də ba tə nə zìlí nə Yɩɩ tə nii, nə swə, sə nə tʋn. Nə wá tʋn kʋ tə, Yɩɩ nii tə nə bɩrɩ, sə kʋ tʋn! 4 Zàn yɩɩ nə, yoo tə wulə n jɩɩn wa. Nə wulə də mʋ́! Pa n jɩɩn dàn, n ma tʋn kʋ.»
5 Ɛsədərasə dàń zàn, ʋ pa Levi dwíí yáá tɩ̀án, də Yɩɩ joŋwana yáá tɩ̀án tə, də Yɩzərayɛlə lɩ̀à tə yáá tɩ̀án tə dù, də ba wá tʋn kʋ tə, ba nə swɩ̀n. Yá ba dùə̀ kʋ nətʋ. 6 Kʋ kwa nə, Ɛsədərasə zàn Yɩɩ dìə̀ tə yáá, ʋ va Eliyaswibə bìú Yohanan dìə̀ wa. Ʋ nə vəli ʋ zʋ lá, ʋ wà wodiu dí, ʋ wà nɩ́á nywɩn. Ʋ yà wulə pucʋnɩ wa, lɩ̀à tə nə nan yongaʋ tə, tʋtʋnkʋkwɩʋn tə yɩrɩ.
7 Ba pɩn ba bòrì Zwerizalɛmə wa, də Zwida lʋʋ nii tə wa, ba pa nii, sə lɩ̀à tə mama, ba nə nan yongaʋ tə, bà duən yáá, Zwerizalɛmə wa. 8 Lìù tə mama, ʋ nə wà twi dɩan batwa nii nə, ndə yáá tɩ̀án tə, də nəkwɩna tə nə pɩn nii nətʋ, ba wá jon ʋ jɩjə mama, ba ga lɩ ʋ wá lɩ̀à tə wa, ba nə nan yongaʋ tə.
9 Zwida dwíí tə mama, də Bɛnzwamɛn dwíí tə mama twi duən yáá, Zwerizalɛmə wa, kʋ dɩan batwa tə wa. Kʋ yɩn nʋgʋ nii cànà tə dɩan sapʋa dɩɩn nə. Lalʋʋ tə mama dàń kun duən nə, Yɩɩ dìə̀ tə bwálɩ́ nə. Ba yà vɩvaga yoo tə yɩrɩ, dwà də ga wulə ka nɩ̀. 10 Yɩɩ joŋwanʋ Ɛsədərasə zàn, ʋ swɩ̀n ba con, ʋ wʋ́: «Á swe dwíə́ nəkaran tə bwɩ̀ɩ́, á ma tʋn cʋna, á zɩgɩ Yɩɩ nə. Á pɩn Yɩzərayɛlə lɩ̀à cʋna tə kwɛn tə súrí zənzən. 11 Sɩ́ʋ́n nə, á lwɩa Ba-Yígúrə́-Jə-Tiu nə, ʋ nə yɩ á nyɩna-ba Yɩɩ, sə á ga tʋn kʋ tə nə yɩ ʋ fɩra! Á pwɩa á tɩ̀àn, də lʋʋ nii kʋ tə dwíə́ tə, á ga pwɛ̀ á tɩ̀àn də dwíə́ nəkaran tə bwɩ̀ɩ́ tə, á nə swe.»
12 Lalʋʋ tə púlí tə mama zɩ̀n ba kori yɩɩ nə, ba le, ba wʋ́: «N jə cɩ́gá! Nə mɛ, sə nə tʋn, ndə n nə swɩ̀n nətʋ. 13 Yá lalʋʋ tə dáá zənzən, kʋ ga yɩ dwà máŋá, kʋ pa lìù wàrɩ̀ kàrá wa ʋ yanɩ. Kʋ tə nə súrí lá, yoo tə tà dɩɩn nədʋ, nə à yə̀ə́ dɩan bələ tʋtʋŋɩ. Cɩ́gá, lɩ̀à dáá nə wa, ba nə tʋn cʋna, kʋ yoo təntə wa. 14 Nə lòrì, sə nə yáá tɩ̀án tə ya yəbə, nə lalʋʋ tə púlí tə mama yuu yɩrɩ. Ba dàń wá tún máŋá, sə nə tɩan tə wa yáá tɩ̀án tə, də lɩ̀à tə nə bʋ̀rɩ̀ bʋra tə kwé lìù tə mama, ʋ nə swe dwíə́ nəkaran bʋ̀á, ba ja bà ba yáá con. Nə wá fwa nətʋ wuuu, kʋ va kʋ yí nə Yɩɩ tə lɩŋa nə wá tʋ mɩ́ámɩ́án, nə yuu wa.»
15 Meswulamə, də Swabətayi, ʋ nə yɩ Levi dwíí, san Asayɛlə bìú Zonatan, də Tikəva bìú Yahəzɩya nə, ba swɩ̀n ba zɩgɩ kʋ pubʋŋa təntə nə. 16 Yá lɩ̀à tə nə nan yongaʋ tə sɛ̀, ba tʋn kʋ tə, lalʋʋ tə nə swɩ̀n. Ba lɩ Yɩɩ joŋwanʋ Ɛsədərasə, ba súrí dwíə́ tə wa dìì tɩ̀án tə nə. Ba lìù mama yɩ ba bon ʋ yɩrɩ, ba ma kúrí wá. Fugə nii cànà tə təntən dɩɩn nə, ba lɩ̀à təntə jə̀ń duən nə, sə ba lɩ kʋ yoo tə yáá. 17 Təntən cànà tə təntən dɩɩn tə nə, ba zwɛ̀ də bara tə mama, ba nə swe dwíə́ nəkaran bwɩ̀ɩ́ tə.
Nə̀ń cʋna lɩ̀à tə yɩra
18 Lɩ̀à yɩn Yɩɩ joŋwana dwíí tə wa, ba nə swe dwíə́ nəkaran* bwɩ̀ɩ́. Ba mʋ̀ nə yɩ Yosadakə bìú Zozuwe bɩ̀á tə, də ʋ nubɩa tə bɩ̀á tə. Ʋ nubɩa təntə nə yɩ Maaseya, də Eliyezɛrə, də Yaribə, də Gedalɩa. 19 Ba kàn nii, sə ba dʋgʋ ba kana tə nə yɩ dwíə́ nəkaran bwɩ̀ɩ́ tə, ba ga pa pabɩʋ, ba ma fwa cʋna kwɩan joŋi.
20 Yɩmɛrə dwíí tə wa, kʋ yɩ Hanani, də Zebadɩa.
21 Harimə dwíí tə wa, kʋ yɩ Maaseya, də Eli, də Swemaya, də Yehiyɛlə, də Uzɩya.
22 Paswəhurə dwíí tə wa, kʋ yɩ Eliyowenayi, də Maaseya, də Yɩsəmayɛlə, də Netaneyɛlə, də Yozabadə, də Eleyasa.
23 Levi dwíí tə wa, kʋ yɩ Yozabadə, də Swimeyi, də Kelaya, ba nə boŋə ʋ yɩrɩ don Kelita, də Petahɩya, də Zwida, də Eliyezɛrə.
24 Gwàgá tə wa, kʋ yɩ Eliyaswibə. Mimii nəcɩra tə wa, kʋ yɩ Swalumə, də Telɛmə, də Uri.
25 Yɩzərayɛlə dwíí tə wa, kʋ yɩ Ramɩya, də Yizɩya, də Maləkɩya, də Mɩyamɛn, də Eleyazarə, də Maləkɩya, də Benaya, ba nə yɩ Parewɔswə dwíí.
26 Elamə dwíí tə wa, kʋ yɩ Matanɩya, də Zakari, də Yehiyɛlə, də Abədi, də Yeremɔtə, də Eli.
27 Zatu dwíí tə wa, kʋ yɩ Eliyowenayi, də Eliyaswibə, də Matanɩya, də Yeremɔtə, də Zabadə, də Azɩza.
28 Bebayi dwíí tə wa, kʋ yɩ Yohanan, də Hananɩa, də Zabayi, də Atəlayi.
29 Bani dwíí tə wa, kʋ yɩ Meswulamə, də Malukə, də Adaya, də Yaswubə, də Sweyalə, də Yeremɔtə.
30 Pahatə-Mʋabə dwíí tə wa, kʋ yɩ Adəna, də Kelalə, də Benaya, də Maaseya, də Matanɩya, də Bɛsalɛlə, də Binuwi, də Manase.
31 Harimə dwíí tə wa, kʋ yɩ Eliyezɛrə, də Yiswɩya, də Maləkɩya, də Swemaya, də Simeyon, 32 də Bɛnzwamɛn, də Malukə, də Swemarɩya.
33 Haswumə dwíí tə wa, kʋ yɩ Matenayi, də Matata, də Zabadə, də Elifelɛtə, də Yeremayi, də Manase, də Swimeyi.
34 Bani dwíí tə wa, kʋ yɩ Maadayi, də Aməramə, də Uwɛlə, 35 də Benaya, də Bedɩya, də Keluhu, 36 də Vanɩya, də Meremɔtə, də Eliyaswibə, 37 də Matanɩya, də Matənayi, də Yasayi, 38 də Bani, də Binuwi, də Swimeyi, 39 də Swelemɩya, də Natan, də Adaya, 40 də Makənadebayi, də Swaswayi, də Swarayi, 41 də Azarəyɛlə, də Swelemɩya, də Swemarɩya, 42 də Swalumə, də Amarɩya, də Zʋzɛfə.
43 Nebo dwíí tə wa, kʋ yɩ Yeyɛlə, də Matɩtɩa, də Zabadə, də Zebina, də Yadayi, də Zʋwɛlə, də Benaya.
44 Ba mʋ̀ bara təntə mama yà swe dwíə́ nəkaran bwɩ̀ɩ́, ba lɩ̀à kapʋpʋ ga lɩra bɩ̀á, də kana təntə.