Ɛsədərasə 9

Zwifə-ba kapʋpʋ swe dwíə́ nəkaran*

1 Tə yìə̀n təntə kwa nə, lalʋʋ tə yáá tɩ̀án twi, ba swɩ̀n à con, ba wʋ́: «Yɩzərayɛlə lɩ̀à tə, də Yɩɩ joŋwana tə, də Levi dwíí tə wà ba tɩ̀àn nə cɩ̀, də lʋʋ nii kʋ tə dwíə́ nəkaran tə, də ba cavɩyiən tə. Ba tʋn Kanaan tɩ̀án, də Ɛtə dwíí tə, də Perizi dwíí tə, də Yebusə tɩ̀án, də Amon dwíí tə, də Mʋabə tɩ̀án, də Ezwipətə tɩ̀án, də Amɔrə dwíí tə cavɩyiən tə. 2 Ba tətə swe dwíə́ nəkaran tə bwɩ̀ɩ́, ba ga swe ba pa ba bɩ̀á də nə. Ba pɩn Yɩɩ lɩ̀à tə, də lʋʋ nii tə dwíə́ nəkaran tə gùlí duən wa. Pɛ̀gá tə, də yáá tɩ̀án tə nə dí yáá, ba tʋn yokʋkwɩʋn təntə.»

Ɛsədərasə pùə́ cʋgʋ, ʋ ga lòrì Yɩɩ cʋna tə yɩrɩ

3 Máŋá tə, à nə nì sʋ̀ràn təntə, à kàrɩ́ à gànàn, də à gasɔɔ, à gwɩan à yukʋran, də à twaŋa, à ga jə̀ə́ də pucʋnɩ. 4 Lɩ̀à tə mama, ba nə vɩvaga Yɩzərayɛlə lɩ̀à Yɩɩ tə sʋ̀ràn tə yɩrɩ, twi ba kɩkarɩ nə, tʋtʋnkʋkwɩnan tə yɩrɩ, lɩ̀à tə nə nan yongaʋ tə nə tʋn. Mə à jə̀ń də pucʋnɩ nətʋ, kʋ va kʋ yí didəni nii joŋi tə fwaŋʋ máŋá.

5 Kʋ máŋá təntə wa, à zàn à pucʋnɩ tə wa, də à gànàn tə, də à gasɔɔ tə, tə nə kàrɩ́, à tʋ à nadwana yuu, à te à jɩɩn Ba-Yígúrə́-Jə-Tiu con, ʋ nə yɩ à tíú Yɩɩ, 6 à ga swɩ̀n, à wʋ́: «À Yɩɩ, à bɩcan gugurə, cavɩra ga jə nə, sə à zɩ̀n à yáá, à kə n con. Cɩ́gá, nə cʋna tə dáá, tə lɛ tɩa nə. Tə yuu dɩ̀gà kʋ ja lanworu nə. 7 Kʋ nə zɩgɩ nə nɩbara-ba máŋá nə, kʋ bà kʋ yí zə̀n, nə tʋn cʋna zənzən. Yá nə cʋna tə nə pɩn, dwíə́ nəkaran* tə pɛ̀gá də́ dɩ̀àn nə mʋ̀, də nə pɛ̀gá, də nə Yɩɩ joŋwana yuu wa. Ba ta kʋ̀ʋ̀ də nəba, ba ga ja nəba, ba va yongaʋ. Ba vɩrɩ nə wiən, ba ga fʋfʋlɩ nəba, ndə kʋ nə yɩ nətʋ zə̀n. 8 Yá sɩ́ʋ́n nə, n mʋ̀ Ba-Yígúrə́-Jə-Tiu, n nə yɩ nə Yɩɩ, fwa pubwanʋ nə yɩra. N pɩn nə gɩganɩ wulə, n ga pa nə pìí nə bà, nə jə̀ə́ n bwálɩ́ tə wa, kʋ nə yɩ parɩ. Mə kʋ zɩgɩ nətʋ, n mʋ̀, nə Yɩɩ tə ma pa nə pùə́ pìí ka poli, n ga pa nəba mɩɩ, máŋá tə wa, nə nə yɩ ywə́ŋə́. 9 Cɩ́gá, nə yɩn ywə́ŋə́, yá n mʋ̀, nə Yɩɩ tə wà nəba vɩ n dʋgʋ, nə yongaʋ tə wa. N tʋn wʋywaŋʋ* nə yɩra, n pa Pɛrəsə pɩ̀ʋ́ tə yá nəba, sə nə ya lʋʋ wa. Kʋ nətʋ pɩn, nə wànɩ́ nə lwà n dìə̀ tə dibwərən tə, nə zɩgɩ yɩɩ nə, nə ga jə yisəgə bwálɩ́, Zwerizalɛmə wa, Zwida nagwanaa tə wa.

10 Yá sɩ́ʋ́n nə, nə Yɩɩ, bɛ̀ɛ̀ nə, nə kʋ́ʋ̀ wá swɩ̀n yìə̀n təntə kwa nə? 11 Cɩ́gá, nə vɩga n yìə̀n tə, n nə pɩn nii tə yuu wa, n nə twá də n tʋ̀tʋ̀nà tə, ba nə yɩ n nii sʋ̀sʋ̀nà, n ma pʋ́pʋ́nɩ́, n pa nəba, n wʋ́: “Lʋʋ nii tə, á nə vələ, sə á jon á tɩnɩ, yɩ durən lʋʋ nii. Dwíə́ tə nə wulə kʋ lʋʋ nii tə wa, yɩ durən lɩ̀à, yá ba pɩn ba durən yìə̀n tə sú bwálɩ́ mama. 12 Á dànà ká pa á bwɩ̀ɩ́ swe ba bɩ̀á nə. Á dànà ká swe ba bwɩ̀ɩ́, á pa á bɩ̀á nə. Á dànà ká pa sìə́ ya á mʋ̀, də ba pwə́rə́ wa, də mama. Á dànà ká bʋ́n ba zəni yoo, də mama. Mə kʋ mʋ̀ nə wá pa, á ja dɩ̀àn. Á wá də́ lʋʋ nii tə wiən tə nə bɩga zəni, á ga á tún á bɩ̀á nə, máŋá mama wuuu.” 13 Ooo nə Yɩɩ, kʋ yɩ nə tʋtʋnkʋkwɩnan tə, də nə cʋna nəfaran tə yɩrɩ nə, càn tə mama yí nəba. Yá kʋ tà nə cʋna tə càn tə mama nə, n pɩn tə yí nəba. N pɩn nə gɩganɩ ga lʋʋ wa. 14 Nə kʋ́ʋ̀ wá pìí nə bwɛ́, nə vɩ n yìə̀n tə, n nə pɩn nii tə yuu wa, nə ga swe dwíə́ nəkaran tə, ba nə tʋŋa cavɩyiən tə naaa? N lɩŋa tə bá zàn nə yuu wa, n ga cʋ̀gʋ̀ nə mama mɩ́ámɩ́án naaa? 15 N mʋ̀ Ba-Yígúrə́-Jə-Tiu, n nə yɩ Yɩzərayɛlə lɩ̀à Yɩɩ, yɩ cɩ́gá tíú. Cɩ́gá, n pɩn nə gɩganɩ ga lʋʋ wa. N dàń nə̀ń nəba, nə wulə n yáá con, də nə cʋna tə. Yá nə lìù mama dàń nə wàrɩ̀ tə, ʋ ja yanɩ n yáá con.»