Ɛsədərasə twaduən tə
8
1 Nə̀ń dìì tɩ̀án tə, də ba nɩbara-ba dəkuu, ba nə twá à nə, ba nan Babɩlɔnə, pɩ̀ʋ́ Arətasɛrəsɛsə pàrɩ̀ tə máŋá wa.2 Fineyasə dwíí tə wa, kʋ yɩ Gɛrəswon. Yɩtamarə dwíí tə wa, kʋ yɩ Danɩyɛlə. Davidə dwíí tə wa, kʋ yɩ Hatuswə,
3 ʋ nə yɩ Swekanɩya sàń tə wa lìù. Parewɔswə dwíí tə wa, kʋ yɩ Zakari, də bara 150, ba nə wulə də wá.
4 Pahatə-Mʋabə dwíí tə wa, kʋ yɩ Eliyowenayi, ʋ nə yɩ Zeraya bìú, də bara 200, ba nə wulə də wá.
5 Zatua dwíí tə wa, kʋ yɩ Mahaziyɛlə bìú Swekanɩya, də bara 300, ba nə wulə də wá.
6 Adinə dwíí tə wa, kʋ yɩ Zonatan bìú Ebɛdə, də bara 50, ba nə wulə də wá.
7 Elamə dwíí tə wa, kʋ yɩ Atalɩya bìú Ezayi, də bara 70, ba nə wulə də wá.
8 Swefatɩya dwíí tə wa, kʋ yɩ Mikayɛlə bìú Zebadɩa, də bara 80, ba nə wulə də wá.
9 Zʋabə dwíí tə wa, kʋ yɩ Yehiyɛlə bìú Abədɩasə, də bara 218, ba nə wulə də wá.
10 Banib dwíí tə wa, kʋ yɩ Yosifɩya bìú Swelomitə, də bara 160, ba nə wulə də wá.
11 Bebayi dwíí tə wa, kʋ yɩ Bebayi bìú Zakari, də bara 28, ba nə wulə də wá.
12 Azəgadə dwíí tə wa, kʋ yɩ Hakatan bìú Yohanan, də bara 110, ba nə wulə də wá.
13 Adonikamə dwíí tə wa, kʋ yɩ Elifelɛtə, də Yeyɛlə, də Swemaya, ba nə yɩ ʋ talɩkwa bɩ̀á, də bara 60, ba nə wulə də ba.
14 Bigəvayi dwíí tə wa, kʋ yɩ Utayi, də Zakurəc, də bara 70, ba nə wulə də ba.
Zwifə-ba tə ken ba sírí, sə ba va Zwida lʋʋ nii
15 À pɩn ba kun vara tə nii nə, ka nɩ́á nə dəri tə vəli Ahava con, nə ga fwa dɩan batwa lá nə. À zuri à yɩra à ywàń lalʋʋ tə, də Yɩɩ joŋwana tə wa, yá à wà Levi dwíí tə lìù mama nɩ ba wa. 16 À ma pa ba bon pɛ̀gá Eliyezɛrə, də Ariyɛlə, də Swemaya, də Ɛlənatan, də Yaribə, də Ɛlənatan tə don tə, də Natan, də Zakari, də Meswulamə, kʋ súrí Yoyaribə də Ɛlənatan nə, ba nə yɩ karnyɩna-ba. 17 À pɩn ba nii, sə ba va pɩ̀ʋ́ Yido con, ʋ nə wulə Kasifɩya nə. À pɩn ba swɩ̀n Yido, də ʋ lɩ̀à tə con, ba nə yɩ Yɩɩ dìə̀ tʋtʋnbɩa, ba wulə Kasifɩya nə, sə ba pa Yɩɩ dìə̀ tʋtʋnbɩa bà, ba tʋn nə Yɩɩ dìə̀ tʋ̀tʋ̀nán tə. 18 Yá nə Yɩɩ tə nə ywàŋá nə yuu nə zəni tə pɩn Swerebɩya, ʋ nə yɩ wʋbʋnyiən bà, ʋ də ʋ bɩ̀á, də ʋ nubɩa. Ba yɩn lɩ̀à 18. Swerebɩya yɩ Mali bɩ̀á tə wa bìú. Mali yɩ Levi bìú. Levi yɩ Yɩzərayɛlə bìú. 19 Kʋ súrí Haswabɩya, də Ezayi nə, ʋ nə yɩ Merari bɩ̀á tə wa bìú, də ʋ nubɩa, də ba bɩ̀á. Ba yɩn lɩ̀à 20. 20 Ba kúrí lɩ̀à 220, Yɩɩ dìə̀ tʋtʋnbɩa tə wa, Davidə də pɛ̀gá tə duən yà nə pɩn Levi dwíí tə nə, ba ja bà.
Nivori də yɩlori, cwəŋə tə vəli yɩrɩ
21 À pɩn nii, sə nə fwa nivori kʋ bwálɩ́ təntə wa, Ahava mʋnaa tə nii nə, sə nə mun nə tɩ̀àn, nə Yɩɩ tə yáá con, nə ma lòrì wá, sə ʋ pú nə də nə bɩ̀á tə, də nə jɩjə tə yuu nə, nə cwəŋə tə vəlu wa. 22 Cavɩra yà wá ja nə, də à nə lòrì pɩ̀ʋ́ tə, sə ʋ pa kwatara də səsədɩra kwé nəba, ba cɩ̀ nə nə, dʋŋa tə yɩrɩ, cwəŋə wa. Cɩ́gá, nə yà swɩ̀n pɩ̀ʋ́ tə con də, nə Yɩɩ tə zɩ̀n ʋ jɩɩn, sə ʋ ma cɩ̀ ʋ lɩ̀à tə mama nə. Yá ʋ fwi ʋ lɩŋa də dɩ̀àn, lɩ̀à tə yuu wa, ba nə vɩ wá. 23 Mə kʋ mʋ̀ yɩrɩ nə, nə vwə nə nii, nə ga lòrì nə Yɩɩ tə, yá ʋ le nəba.
24 Kʋ kwa nə, à lɩ Yɩɩ joŋwana yáá tɩ̀án tə wa lɩ̀à fugə də bələ, à kə vàn nə. Ba mʋ̀ nə yɩ Swerebɩya, də Haswabɩya, də ba nubɩa fugə. 25 À kəri wárʋ́ tə, də sɩ́án tə, də zɩla tə, à pa ba. Tə yɩ pɩ̀ʋ́ tə, də ʋ lɩ̀à tə nə pɩn kwìə̀, də ʋ tʋ̀tʋ̀nán yun tɩ̀án, də Yɩzərayɛlə lɩ̀à tə mama, ba nə yɩn lá, nə pɩn nə Yɩɩ dìə̀ tə yɩrɩ. 26 À pɩn ba wárʋ́ səbikʋlan 650, də wárʋ́ zɩla, tə kwənə nə yí səbikʋlan 100, də sɩ́án səbikʋlan 100, 27 də sɩ́án wùrú zwɩɩn, tə kwənə nə yí sɩ́án səbilurən 1000, də cɩnɩan nagwalan nəzəŋə bələ, tə nə pɩpɩlɩ, tə ga jə funə, ndə sɩ́án nə. 28 À swɩ̀n ba con, à wʋ́: «Á yɩ Ba-Yígúrə́-Jə-Tiu nə tɩ. Zɩla tə tə də yɩ ʋ mʋ̀ nə tɩ. Wárʋ́ kʋ tə, də sɩ́án tə tə yɩ zìlə́ wiən, ba pɩn Ba-Yígúrə́-Jə-Tiu nə, ʋ nə yɩ á nyɩna-ba Yɩɩ. 29 Á ywàŋá tə yuu zəni, sə á ja tə á va, á yí Zwerizalɛmə. Mə lá nə, á wá kəri tə, Yɩɩ joŋwana yun tɩ̀án tə, də Levi dwíí tə, də Yɩzərayɛlə dìì tɩ̀án tə yáá con, Ba-Yígúrə́-Jə-Tiu dìə̀ tə napakwalan tə wa.»
30 Yɩɩ joŋwana tə, də Levi dwíí tə dàń jon wárʋ́ tə, də sɩ́án tə, də zɩla tə, ba nə kəri, sə ba ja va nə Yɩɩ dìə̀ tə wa, Zwerizalɛmə nə.
Zwifə-ba tə yí Zwerizalɛmə
31 Təntən cànà tə dɩan fugə də bələ dɩɩn nə, nə nan Ahava mʋnaa tə nii nə, nə ma vələ Zwerizalɛmə. Nə Yɩɩ tə ywàń nə yuu nə, ʋ ga cɩ̀ nə dʋŋa, də yolwan mama yáá nə, cwəŋə tə wa. 32 Nə nə yí Zwerizalɛmə, nə sìí dɩan batwa. 33 Banɩa nii dɩɩn tə nə, nə kəri wárʋ́ tə, də sɩ́án tə, də zɩla tə, nə Yɩɩ dìə̀ tə wa, nə pa Yɩɩ joŋwanʋ Uri bìú Meremɔtə nə. Fineyasə bìú Eleyazarə yà wulə də wá. Zozuwe bìú Yozabadə, də Binuwi bìú Nʋadɩya, ba nə yɩ Levi dwíí, yà wulə də ba. 34 Nə gàlɩ̀ wiən tə mama, nə ga kəri tə, nə pa ba pʋ́pʋ́nɩ́ tə dun mama, ba tún.
35 Lɩ̀à tə mama, ba nə pìí ba nan yongaʋ tə ba bà, fwa jwəŋə, ba sʋ̀rɩ́, ba pa Yɩzərayɛlə lɩ̀à Yɩɩ tə nə. Ba gʋa nabɩran 12, Yɩzərayɛlə dwíí tə mama yɩrɩ, də pabɩran 96, də pəbii 77, də bʋtʋlan 12, cʋna kwɩan yɩrɩ. Ba sʋ̀rɩ́ tə mama, ba pa Ba-Yígúrə́-Jə-Tiu nə. 36 Ba pɩn pɩ̀ʋ́ nii tə, ʋ lɩ̀à tə nə, ʋ nə tún, də nagwanaa yáá tɩ̀án tə nə, mʋnaa tə vàn təntə nə. Lɩ̀à təntə dàń san Yɩzərayɛlə lɩ̀à tə nə, Yɩɩ dìə̀ tə yoo wa.