Ɛsədərasə 7

Pɩ̀ʋ́ Arətasɛrəsɛsə pɩn dɩ̀àn Ɛsədərasə nə

1 Tə mʋ̀ yìə̀n təntə kwa nə, Pɛrəsə pɩ̀ʋ́ Arətasɛrəsɛsə pàrɩ̀ tə máŋá wa, Ɛsədərasə nan Babɩlɔnə ʋ bà. Ɛsədərasə yɩ Seraya bìú, Seraya yɩ Azarɩya bìú, Azarɩya yɩ Hiləkiya bìú, 2 Hiləkiya yɩ Swalumə bìú, Swalumə yɩ Sadɔkə bìú, Sadɔkə yɩ Ahitubə bìú, 3 Ahitubə yɩ Amarɩya bìú, Amarɩya yɩ Azarɩya bìú, Azarɩya yɩ Merayɔtə bìú, 4 Merayɔtə yɩ Zeraya bìú, Zeraya yɩ Uzi bìú, Uzi yɩ Buki bìú, 5 Buki yɩ Abiswua bìú, Abiswua yɩ Fineyasə bìú, Fineyasə yɩ Eleyazarə bìú, Eleyazarə yɩ Yɩɩ joŋwana yun tɩ̀án nəkwɩa Aron bìú.

6 Ʋ mʋ̀ Ɛsədərasə təntə dàń nan Babɩlɔnə ʋ bà. Ʋ yà yɩ Yɩɩ nii yənu tíú*. Ʋ yà jə Ba-Yígúrə́-Jə-Tiu, ʋ nə yɩ Yɩzərayɛlə lɩ̀à Yɩɩ nii tə, ʋ nə pɩn Moyizə nə yənu zənzən. Ɛsədərasə Yɩɩ tə, ʋ nə yɩ Ba-Yígúrə́-Jə-Tiu yà wulə də wá. Kʋ nətʋ pɩn Pɛrəsə pɩ̀ʋ́ tə pa wá, kʋ tə mama, ʋ nə lòrì. 7 Yɩzərayɛlə lɩ̀à tə wa lɩ̀à duən, də Yɩɩ joŋwana tə duən, də Levi dwíí tə lɩ̀à duən, də gwàgá duən, də mimii nəcɩra duən, də Yɩɩ dìə̀ tʋtʋnbɩa duən, pìí ba bà Zwerizalɛmə, pɩ̀ʋ́ Arətasɛrəsɛsə pàrɩ̀ tə bɩna barpɛ nii bɩnɩ tə nə. 8 Ɛsədərasə də ba mʋ̀ nə ken duən, ba bà Zwerizalɛmə, pɩ̀ʋ́ Arətasɛrəsɛsə pàrɩ̀ tə bɩna barpɛ nii bɩnɩ tə, cànɩ̀ bonu nii nə. 9 Ʋ pɩn ba nan Babɩlɔnə, təntən cànà tə, təntən dɩɩn nə. Yá ba yí Zwerizalɛmə, bonu nii cànà tə, təntən dɩɩn tə nə. Ʋ Yɩɩ tə yà ywàŋá ʋ yuu nə zəni. 10 Cɩ́gá, Ɛsədərasə yà kàrɩ̀ Ba-Yígúrə́-Jə-Tiu nii tə, də ʋ waa mama, ʋ ga zìlí kʋ nii. Ʋ yà kàrɩ̀ Yɩzərayɛlə lɩ̀à tə, də Yɩɩ nii yìə̀n tə, də tə tə nə mɛ, sə ba tʋn.

Pɩ̀ʋ́ Arətasɛrəsɛsə pɩn nii Ɛsədərasə nə, tʋ̀tʋ̀nán yuu wa

11 Nə̀ń sagɩ tə pɩ̀ʋ́ Arətasɛrəsɛsə nə pɩn Yɩɩ joŋwanʋ Ɛsədərasə nə, ʋ nə yɩ Yɩɩ nii yənu tíú*. Ɛsədərasə yà pìí ʋ pʋ́pʋ́nɩ́ Ba-Yígúrə́-Jə-Tiu yìə̀n tə, ʋ nə pɩn nii, sə tə tʋn, də tə tə, ʋ nə pʋ́pʋ́nɩ́, ʋ pa Yɩzərayɛlə lɩ̀à tə nə. Pɩ̀ʋ́ tə pʋ́pʋ́nɩ́, ʋ wʋ́:

12 «À mʋ̀ pɛ̀gá mɛ pɩ̀ʋ́ Arətasɛrəsɛsə nə pɩn sagɩ kʋ tə, n mʋ̀ Yɩɩ joŋwanʋ Ɛsədərasə nə, n nə yɩ Yɩɩ tə, ʋ nə wulə lanworu wa nii yənu tíú. À jʋnɩ mʋ́!

13 À pɩn nii, sə ba yá Yɩzərayɛlə lɩ̀à tə mama, ba nə wulə à payuu tə wa, də ba Yɩɩ joŋwana tə, də ba Levi dwíí tə, ba nə swə, sə ba pìí ba va Zwerizalɛmə, sə ba twá n nə, ba vìí. 14 À mʋ̀ pɩ̀ʋ́ tətə, də à lɩ̀à barpɛ tə, ba nə pɩn kwìə̀ nə tʋn mʋ́, Zwida nagwanaa tə wa, də Zwerizalɛmə nə. N dàń wá na nətʋ tə, ba nə zìlí n Yɩɩ nii tə, kʋ sagɩ nə wulə n con. 15 Yá n tə wá kələ n pa wárʋ́ tə, də sɩ́án tə, à mʋ̀ pɩ̀ʋ́ də à lɩ̀à tə, ba nə pɩn kwìə̀ tə nə pɩn, Yɩzərayɛlə lɩ̀à Yɩɩ tə nə, ʋ dìə̀ tə nə wulə Zwerizalɛmə wa. 16 Kʋ tə súrí wárʋ́ tə mama, də sɩ́án tə, n nə wá na Babɩlɔnə nagwanaa tə mama wa, də zìlə́ wiən tə, lalʋʋ tə, də Yɩɩ joŋwana tə nə pɩn, ba Yɩɩ dìə̀ tə yɩrɩ, ka nə wulə Zwerizalɛmə wa. 17 N wá ywàń kʋ səbiu təntə yuu, n ma yə̀ nɩan, də pabɩran, də pəbii tə nə mɛ, sə tə súrí vàrʋ́ càlɩ̀ joŋi wiən tə, də divɛn tə nə. Yá n wá ja tə, n ma fwa joŋi, á Yɩɩ dìə̀ tə Yɩɩ joŋi bwálɩ́ tə yuu wa, Zwerizalɛmə nə. 18 Kʋ tə, n də n nubɩa tə nə wá na, də kʋ mɛ, sə á ja wárʋ́ tə gɩganɩ tə, də sɩ́án tə gɩganɩ tə, á ma tʋn, á mɛ, sə á tʋn kʋ, ndə á Yɩɩ tə nə pɩ̀à nətʋ. 19 N wá tún Yɩɩ dìə̀ tʋtʋnzɩla tə, ba nə pɩn mʋ́, n Yɩɩ dìə̀ tə wa, Zwerizalɛmə nə. 20 Kʋ nə yɩ kálʋ́ kʋ pa mʋ́, sə n pɩ̀à wiən duən, n Yɩɩ dìə̀ tə yɩrɩ, sə n pa ba lɩ tə kwənə, pɩ̀ʋ́ səbiu daka tə wa.

21 À mʋ̀ pɩ̀ʋ́ Arətasɛrəsɛsə nə pɩn nii kʋ tə, lɩ̀à tə mama nə, ba nə ywàŋá səbiu tə yuu, mʋnaa tə kwa con. Á mɛ, sə á pa kʋ tə mama, Yɩɩ joŋwanʋ Ɛsədərasə, ʋ nə yɩ Yɩɩ tə, ʋ nə wulə lanworu wa nii yənu tíú, nə wá bwe kʋ bwie, á con, ndə ʋ nə swɩ̀n nətʋ. 22 Á wá pa wá wárʋ́, kʋ yí kilo mʋ̀rʋ̀ batwa, də mɩna kilo mʋ̀rʋ̀ fɩtwa, də divɛn litərə mʋ̀rʋ̀ banɩa, də nʋga litərə mʋ̀rʋ̀ banɩa, də nəkuən, ndə ʋ nə pɩ̀à nətʋ. 23 Kʋ tə mama, Yɩɩ tə, ʋ nə wulə lanworu wa nə pɩn nii, sə kʋ tʋn ʋ dìə̀ tə yɩrɩ, á mɛ, sə á tʋn kʋ, ndə ʋ nə pɩ̀à nətʋ, sə ʋ lɩŋa dàn ká zàn, à payuu tə yuu wa, nə à yə̀ə́ à tətə, də à bɩ̀á tə yuu wa. 24 Kʋ mʋ̀ nə pɩn, nə pɩ̀à sə á yəni də, á wà mɛ, sə á jon yuu lanpo, də zɩla yuu ŋwɩ́rán, də cwəŋə vəlu ŋwɩ́rán, Yɩɩ joŋwana tə, də Levi dwíí tə, də gwàgá tə, də mimii nəcɩra tə, də Yɩɩ dìə̀ tʋtʋnbɩa tə, də Yɩɩ dìə̀ tʋ̀tʋ̀nà tə lìù nədʋ tətə con.

25 N mʋ̀ Ɛsədərasə dàń mɛ, sə n twá də Yɩɩ nii yənu tə, n nə jə, n ma tún lɩ̀à, ba nə bʋ̀rɩ̀ bʋra, də ba yun tɩ̀án, sə ba bʋ̀rɩ̀ lalʋʋ tə mama bʋra, ba nə yə̀ə́ n Yɩɩ nii tə, mʋnaa tə kwa con. N tə mɛ, sə n pa ba tə nə yəri n Yɩɩ nii tə, yəni kʋ. 26 Lìù tə mama, ʋ nə ba n Yɩɩ nii tə nə twá zəni, ʋ nə ba pɩ̀ʋ́ nii nə twá zəni, ʋ mɛ, sə ba gʋ wá, nə à yə̀ə́ ba zɩrɩ ba kə ʋ nə, nə à yə̀ə́ ba kə wá bandiə.»

Ɛsədərasə bʋ̀à Yɩɩ nə

27 Ɛsədərasə bʋ̀à Yɩɩ nə, ʋ wʋ́: «À bwɩ Ba-Yígúrə́-Jə-Tiu nə, ʋ nə yɩ nə nɩbara-ba Yɩɩ. Ʋ mʋ̀ nə ken pɩ̀ʋ́ tə bɩcan wa, sə pɩ̀ʋ́ tə pa ʋ dìə̀ tə na dun tə tə yiri, Zwerizalɛmə wa. 28 Yɩɩ tʋn ʋ wʋywaŋʋ* tə à yɩra, pɩ̀ʋ́ tə yáá con, də ʋ lɩ̀à tə, ba nə pɩn kwìə̀ yáá con, də ʋ yɩra ləzwənfaran tə mama yáá con. Yá Ba-Yígúrə́-Jə-Tiu, ʋ nə yɩ à tíú Yɩɩ pɩn à jɩɩn dàn, à ga kə Yɩzərayɛlə lɩ̀à pɛ̀gá tə duən yáá, sə ba pìí ba twá à nə, ba bà.»