Pɩ̀ʋ́ Dariyusə pʋ́pʋ́nɩ́, ʋ pa nii
6
1 Pɩ̀ʋ́ Dariyusə dàń pɩn nii, sə ba pɩ̀à yoo tə nɛɛ, saga tə wa, tə nə wulə Babɩlɔnə nə, dìə̀ tə wa, ba nə túŋə́ jɩjə wiən tə. 2 Yá ba nɩ sagɩ, kʋ nə pipini, kʋ kə duən nə, Ɛkəbatanə dɩ̀àn dəkuu bwálɩ́ tə nə, Medi nagwanaa tə wa. Sagɩ tə wa yà pʋ́pʋ́nɩ́, kʋ wʋ́:3 «Pɩ̀ʋ́ Sirusə pàrɩ̀ tə təntən bɩnɩ tə nə, ʋ pɩn nii, ʋ wʋ́: “Kʋ mɛ, sə ba pìí ba lwà Yɩɩ dìə̀ tə, ka dəkuu tə bwálɩ́ nə, Zwerizalɛmə wa, sə ba fwa jwəŋə ka wa, ba pa Yɩɩ nə. Ka yuu tɩa zɩgʋ wá ya jɩvaŋa 60, ka wanɩ də wá ya jɩvaŋa 60. 4 Ba wá tɩɩn kapana, ba nə sə̀ nɛɛ batwa, ba ga tɩɩn ywəŋə nədʋra naa nədʋ. Padiə tə nə wá ŋwɩ́n tə kwənə. 5 Kʋ mɛ, sə ba pìí ba pa Yɩɩ dìə̀ tə sɩ́án tʋtʋnzɩla tə, də wárʋ́ tʋtʋnzɩla tə, pɩ̀ʋ́ Nebukadənezarə nə pɛ̀ Zwerizalɛmə Yɩɩ dìə̀ tə wa, ʋ ja bà Babɩlɔnə. Kʋ mɛ, sə ba ja kʋ nədʋ mama, ba pìí ba va, ba tún kʋ bwálɩ́ nə, Yɩɩ dìə̀ tə wa, Zwerizalɛmə nə.” »
6 Yá pɩ̀ʋ́ Dariyusə dàń pʋ́pʋ́nɩ́, ʋ wʋ́: «Sɩ́ʋ́n nə, n mʋ̀ Tatənayi, n nə yɩ mʋnaa tə kwa con nagwanaa tə yáá tíú, də Swetarə-Bozənayi, də á mʋ̀ ba tʋtʋnduən tə, á nə wulə mʋnaa tə kwa con, á lɩa á tɩ̀àn kʋ yoo tə wa. 7 Á yágá Zwifə-ba, sə ba pìí ba lwà Yɩɩ dìə̀ təntə. Zwifə-ba yáá tɩ̀án tə mɛ, sə ba pìí ba lwà ka, ba zɩgɩ ka dəkuu bwálɩ́ nə. 8 Nəŋə kʋ tə, à nə pɩn nii, sə á tʋn Zwifə-ba nəkwɩna tə yɩra, sə ba ma pìí ba lwà Yɩɩ dìə̀ təntə. Kʋ yɩ pɩ̀ʋ́ tə jɩjə wiən tə, tə nə naŋa nagwanaa lanpo tə wa, nə á wá lɩ, á ma ŋwɩ́n tʋ̀tʋ̀nà tə, máŋá mama, á dànà ká cən á zɩgɩ. 9 Dɩɩn mama, á mɛ sə á kə dɩ̀àn, á pa kʋ tə mama, Zwerizalɛmə Yɩɩ joŋwana tə nə wá swɩ̀n, də ba pɩ̀à, sə ba ma fwa jwəŋə, ba sʋ̀rɩ́ ba pa Yɩɩ tə nə, ʋ nə wulə lanworu wa. Tə mʋ̀ nə yɩ nababii, də pabɩran, də pəbii, də mɩna, də nəkuən, də divɛn, də nʋga. 10 Kʋ nətʋ wá pa, ba wànɩ́ ba fwa jwəŋə, tə lwán nə ywán, ba pa Yɩɩ tə nə, ʋ nə wulə lanworu wa, ba ga lòrì wá, sə ʋ ywàń pɩ̀ʋ́ tə, də ʋ bɩ̀á tə yuu. 11 Nəŋə kʋ tə, à nə pɩn nii, sə á tʋn, də lìù nə vɩga à sʋ̀ràn tə tə nii. Ba wá lɩ ʋ dìə̀ baŋa, ba vwa wá ka nə, ba mà, ba ga pa ʋ kùrí ŋwənə, ka yuu wa. Kʋ kwa nə, ba wá mà ʋ dìə̀, ba buburi duən yuu wa. 12 Yɩɩ tə, ʋ nə bɩrɩ də, ʋ wulə Zwerizalɛmə wa, nə wá cʋ̀gʋ̀ pɩ̀ʋ́ tə mama, nə à yə̀ə́ dwíí tə mama, ba nə wá vɩ à nii tə, ba ga cʋ̀gʋ̀ Yɩɩ dìə̀ təntə. À mʋ̀ Dariyusə nə pɩn kʋ nii təntə. Á mɛ sə á twá à nii tə nə, ndə kʋ nə mɛ nətʋ!»
13 Tatənayi, ʋ nə yɩ mʋnaa tə kwa con nagwanaa tə yáá tíú, də Swetarə-Bozənayi, də ba tʋtʋnduən tə, dàń tʋn yoo mama, kʋ twá nii tə nə, pɩ̀ʋ́ Dariyusə nə pʋ́pʋ́nɩ́, ʋ pa ba.
Yɩɩ dìə̀ tə ka lwà ka zwɛ̀ cànà
14 Zwifə-ba yáá tɩ̀án tə dàń lwà Yɩɩ dìə̀ tə wuuu, ndə Yɩɩ nii sʋ̀sʋ̀nà Agəzwe, də Zakari, ʋ nə yɩ Yido bìú, nə swɩ̀n nətʋ. Ba lwà Yɩɩ dìə̀ tə, ba zwɛ̀, ndə Yɩzərayɛlə lɩ̀à Yɩɩ tə nə pɩn nii nətʋ. Yá yoo mama tʋn, ndə Pɛrəsə pɛ̀gá Sirusə, də Dariyusə, də Arətasɛrəsɛsə, nə pɩn nii, sə kʋ tʋn nətʋ. 15 Ba lwà Yɩɩ dìə̀ tə, ba zwɛ̀, Adarə cànà tə dɩan batwa dɩɩn nə, pɩ̀ʋ́ Dariyusə pàrɩ̀ tə bɩna bardʋ nii nə. 16 Yɩzərayɛlə lɩ̀à tə, də Yɩɩ joŋwana tə, də Levi dwíí tə, də lɩ̀à tə gɩganɩ, ba nə nan yongaʋ tə ba bà, dí cànà də pupwən, ba ma súrí Yɩɩ dìə̀ təntə nii. 17 Ba gʋa nabɩran bíí, də pabɩran biələ, də pəbii biənɩa, ba ma pa dìə̀ təntə Yɩɩ nə. Ba tə gʋa bʋtʋlan fugə də bələ, Yɩzərayɛlə dwíə́ fugə də bələ tə mama cʋna yɩrɩ. 18 Ba pwɛ̀ Yɩɩ joŋwana tə púlə́ púlə́, ba kə ba tʋ̀tʋ̀nán wa, ba ga pwɛ̀ Levi dwíí tə də púlə́ púlə́, ba kə ba tʋ̀tʋ̀nán wa, sə ba tʋn Yɩɩ tʋtʋŋɩ tə Zwerizalɛmə wa, ndə kʋ nə pʋ́pʋ́nɩ́ Moyizə sagɩ tə wa nətʋ.
19 Təntən cànà tə dɩan fugə də banɩa dɩɩn nə, lɩ̀à tə ba nə nan yongaʋ tə ba bà, dí Pakə cànà tə. 20 Yɩɩ joŋwana tə, də Levi dwíí tə mʋ̀ yà kwɛn ba tɩ̀àn, ba lɩ durən yìə̀n wa. Ba mama yà yɩ parɩ. Ba dàń gʋa Pakə cànà pəbii tə, ba pa yongaʋ lɩ̀à tə mama nə, də ba nubɩa Yɩɩ joŋwana tə nə, də ba tətə nə. 21 Yɩzərayɛlə lɩ̀à tə, ba nə pìí ba nan yongaʋ tə ba bà, dí Pakə cànà tə wodiu, ba də ba tə mama, ba nə lɩ ba tɩ̀àn, dwíə́ nəkaran* tə durən yìə̀n tə wa, sə ba ga pɩ̀à Yuu-Tiu, ʋ nə yɩ Yɩzərayɛlə lɩ̀à Yɩɩ. 22 Ba dí cànà tə, ba nə də́ də dipɛn, kʋ nə wà sabwarɩ ken, dɩan barpɛ, də pupwən. Cɩ́gá, Ba-Yígúrə́-Jə-Tiu yà pɩn ba sú də pupwən, ʋ nə lwàń Asiiri pɩ̀ʋ́ tə pubʋŋa, ʋ pa ba na yuywaŋʋ, ʋ yáá con yɩrɩ. Kʋ nətʋ dàn ba jɩɩn, sə ba ma pìí ba lwà Ba-Yígúrə́-Jə-Tiu dìə̀ tə.