Yɩɩ dìə̀ tə lwiu tʋ̀tʋ̀nán kʋ́ʋ̀ pìí tə zàn
5
1 Yɩɩ nii sʋ̀sʋ̀nʋ̀ Agəzwe, də Yɩɩ nii sʋ̀sʋ̀nʋ̀ Zakari, ʋ nə yɩ Yido bìú, swɩ̀n Yɩɩ nii sʋ̀ràn Zwifə-ba con, ba nə wulə Zwida lʋʋ nii tə wa, də Zwerizalɛmə wa, kʋ twá də Yɩɩ tə, ʋ nə yɩ Yɩzərayɛlə lɩ̀à Yɩɩ. 2 Swalətɩyɛlə bìú Zorobabɛlə, də Yosadakə bìú Zozuwe dàń zàn, ba wulə ba lwè Yɩɩ dìə̀ tə, Zwerizalɛmə nə. Yá Yɩɩ nii sʋ̀sʋ̀nà tə yà wulə ba saŋa ba.3 Kʋ máŋá təntə tətə wa, Tatənayi, ʋ nə yɩ mʋnaa tə kwa con nagwanaa tə yáá tíú, də Swetarə-Bozənayi, də ba tʋtʋnduən tə twi, ba bwe ba, ba wʋ́: «Wà nə pɩn aba nii, sə á lwà Yɩɩ dìə̀ tə, á ga pìí à lwà ka bírí tə, á zɩgɩ yɩɩ nə? 4 Nə pɩ̀à, sə á swɩ̀n lɩ̀à tə, ba nə lwè dìə̀ tə yɩra, á bɩrɩ nəba.»
5 Yá Yɩɩ yà ywàŋá Zwifə-ba nəkwɩna tə yuu. Dʋŋa tə wà pa Zwifə-ba yá tʋ̀tʋ̀nán tə, kʋ va kʋ yí máŋá tə, ba nə kʋ́ʋ̀ tʋn sagɩ Dariyusə nə, ʋ də ga pìí ʋ le ba də sagɩ, kʋ yoo tə yuu wa.
Zwifə-ba dʋŋa tə kʋ́ʋ̀ pʋ́pʋ́nɩ́ sagɩ, ba pa pɩ̀ʋ́ Dariyusə də nə
6 Nə̀ń sagɩ tə, Tatənayi, ʋ nə yɩ mʋnaa tə kwa con nagwanaa tə yáá tíú, də Swetarə-Bozənayi, də ba tʋtʋnduən tə, ba nə wulə mʋnaa tə vàn təntə yuu, nə pʋ́pʋ́nɩ́ ba pa pɩ̀ʋ́ Dariyusə nə. 7 Ba pʋ́pʋ́nɩ́ sagɩ tə wa, ba wʋ́: «Sagɩ tə pɩn pɩ̀ʋ́ Dariyusə nə. Nə jʋnɩ mʋ́!
8 Nə swɩ̀n sə pɩ̀ʋ́ tə yəni də, nə vəli nə yí Yɩɩ nəfarʋ tə dìə̀ tə, Zwida nagwanaa tə wa. Ba wulə ba lwè Yɩɩ dìə̀ təntə, də kapana, ba nə sə̀, ba ga kəni dɛɛ bírí tə wa. Tʋ̀tʋ̀nán tə yɩ ba zuri ba yɩra, ba tʋŋa, tə ga vəli yáá wuuu. 9 Nə bwe ba yáá tɩ̀án tə, nə wʋ́, wàà nə pɩn ba nii, sə ba pìí ba lwà Yɩɩ dìə̀ tə, ba ga lwà ka bírí tə, ba zɩ̀n yɩɩ nə? 10 Nə tə bwe ba yɩra nə, sə nə pa, n yəni ba, nə ga pʋ́pʋ́nɩ́ ba yáá tɩ̀án tə yɩra. 11 Nə̀ń kʋ tə, ba nə le nəba. Ba le nəba, ba wʋ́: “Nə yɩ Yɩɩ tə, ʋ nə tɩ lanworu də tɩa tʋ̀tʋ̀nà. Yá nə yɩ nə wulə nə lwè Yɩɩ dìə̀ tə, Yɩzərayɛlə pɩ̀ʋ́ don yà nə lwə̀, ʋ zwɛ̀, fuən fuən. 12 Kʋ yɩ nə nyɩna-ba nə zɩ̀n Yɩɩ tə, ʋ nə wulə lanworu wa lɩŋa, ʋ ma kə ba Babɩlɔnə pɩ̀ʋ́ Nebukadənezarə jɩɩn wa, ʋ nə yɩ Kaləde tíú. Mə pɩ̀ʋ́ təntə nə cʋ̀gʋ̀ Yɩɩ dìə̀ tə, ʋ ga ja lalʋʋ tə, ʋ va Babɩlɔnə. 13 Yá də kʋ nətʋ mɛ, Babɩlɔnə pɩ̀ʋ́ Sirusə pàrɩ̀ tə təntən bɩnɩ tə nə, ʋ pɩn nii, sə ba pìí ba lwà Yɩɩ dìə̀ təntə. 14 Pɩ̀ʋ́ Nebukadenezarə yà pɛ̀ sɩ́án tʋtʋnzɩla tə, də wárʋ́ tʋtʋnzɩla tə, tə yà nə wulə Yɩɩ dìə̀ tə wa, Zwerizalɛmə nə, ʋ ja va ʋ kə woŋwanan dìə̀ wa, Babɩlɔnə nə. Yá Pɩ̀ʋ́ Sirusə pìí ʋ lɩ wiən təntə, woŋwanan dìə̀ tə wa, Babɩlɔnə nə, ʋ pa Swɛswəbasarə nə, ʋ nə tún, sə ʋ ya nagwanaa tə yáá tíú. 15 Yá Sirusə pɩn wá nii, sə ʋ ja tə ʋ va, ʋ kə Yɩɩ dìə̀ tə wa, ba nə wá lwà Zwerizalɛmə nə, ka dəkuu tə bwálɩ́ nə. 16 Ʋ mʋ̀ Swɛswəbasarə tə twi, ʋ tún Yɩɩ dìə̀ tə də̀ń Zwerizalɛmə wa. Kʋ nə zɩgɩ máŋá təntə wa, kʋ bà kʋ yí zə̀n, nə tə wulə nə lwè Yɩɩ dìə̀ tə, yá ka tə wà zwɛ̀.” 17 Sɩ́ʋ́n nə, də pɩ̀ʋ́ tə nə swə, sə ʋ pa ba pɩ̀à kʋ yoo tə nɛɛ, Babɩlɔnə pɛ̀gá saga tə wa, ba nə pʋ́pʋ́nɩ́ ba tún. Ba wá na də cɩ́gá mama, pɩ̀ʋ́ Sirusə nə pɩn nii, sə ba pìí ba lwà Yɩɩ dìə̀ təntə, Zwerizalɛmə nə. Kʋ kwa nə, sə pɩ̀ʋ́ tə bɩrɩ nəba ʋ pubʋŋa, kʋ yoo tə yuu wa.»