Dʋŋa pɩn ba yá Yɩɩ dìə̀ tə lwiu nə
4
1 Zwida dwíí tə, də Bɛnzwamɛn dwíí tə dʋŋa nì də, ba twi ba wulə ba lwè dìə̀, sə ba pa Ba-Yígúrə́-Jə-Tiu nə, ʋ nə yɩ Yɩzərayɛlə lɩ̀à Yɩɩ. 2 Ba vəli ba yí Zorobabɛlə, də dìì tɩ̀án tə, ba swɩ̀n ba con, ba wʋ́: «Nə pɩ̀à nə san aba, nə lwà Yɩɩ dìə̀ tə. Cɩ́gá, nə də jʋnɩ á Yɩɩ tə, ndə á də nə, nə ga fwa jwəŋə nə pɩn wá, kʋ nə zɩgɩ máŋá tə mama, Asiiri pɩ̀ʋ́ Esarə-Hadɔn nə ja nəba, ʋ bà yəbə.»3 Yá Zorobabɛlə, də Zozuwe, də Yɩzərayɛlə dìì tɩ̀án tə duən le ba, ba wʋ́: «Nə mʋ̀ də á mʋ̀ bá lwà dìə̀, nə pa nə Yɩɩ tə nə. Nə cɩcɩ nə wá lwà dìə̀, nə pa Ba-Yígúrə́-Jə-Tiu nə, ʋ nə yɩ Yɩzərayɛlə lɩ̀à Yɩɩ, ndə Pɛrəsə pɩ̀ʋ́ Sirusə nə pɩn nəba nii nətʋ.»
4 Lʋʋ nii tə wa lɩ̀à tə dàń gwàrɩ̀ Zwida dwíí tə jɩɩn, ba ga fugu ba, sə ba yá Yɩɩ dìə̀ tə lwiu nə. 5 Lʋʋ nii tə wa lɩ̀à tə pɩn səbiu lɩ̀à tə nə, ba nə pɩn kwìə̀, sə ba pa Yɩzərayɛlə lɩ̀à tʋ̀tʋ̀nán tə kwɛ̀. Ba tʋn kʋ nətʋ tə, Pɛrəsə pɩ̀ʋ́ Sirusə pàrɩ̀ tə máŋá mama wa, kʋ va kʋ yí Pɛrəsə pɩ̀ʋ́ Dariyusə pàrɩ̀ tə máŋá.
Zwifə-ba dʋŋa tə pʋ́pʋ́nɩ́ sagɩ, ba pa pɩ̀ʋ́ Arətasɛrəsɛsə nə
6 Asuerusə pàrɩ̀ tə sinti máŋá wa, ba pʋ́pʋ́nɩ́ sagɩ ba pa wá, ba ma zɩgɩ Zwida dwíí tə, də Zwerizalɛmə tɩ̀án nə.
7 Yá Pɛrəsə pɩ̀ʋ́ Arətasɛrəsɛsə pàrɩ̀ tə də máŋá wa, Biswəlamə, də Mitəredatə, də Tabɛlə, də ba tʋtʋnduən tə gɩganɩ tə pʋ́pʋ́nɩ́ sagɩ, ba pa Pɛrəsə pɩ̀ʋ́ Arətasɛrəsɛsə nə. Ba pʋ́pʋ́nɩ́ sagɩ tə, də Aramə tɩ̀án pʋpʋnbɩa, Aramə tɩ̀án sʋgʋ wa.
8 Nagwanaa yáá tíú Rehumə, də Swiməswayi, ʋ nə pʋ́pʋ́nɩ́ saga tə, pʋ́pʋ́nɩ́ sagɩ, ba pa pɩ̀ʋ́ Arətasɛrəsɛsə nə, Zwerizalɛmə tɩ̀án yɩrɩ. Ba pʋ́pʋ́nɩ́ sagɩ təntə wa, ba wʋ́:
9 «Lɩ̀à tə nə pʋ́pʋ́nɩ́ sagɩ tə nə yɩ, nagwanaa yáá tíú Rehumə, də Swiməswayi, ʋ nə pʋ́pʋ́nɩ́ saga tə, də ba tʋtʋnduən tə, ba nə yɩ Din tɩ̀án, də ba tə nə wulə mʋnaa tə vàn təntə yuu, də Tarəpɛlə tɩ̀án, də Afarasə tɩ̀án, də Erɛkə tɩ̀án, də Babɩlɔnə tɩ̀án, də Suzə tɩ̀án, də Deha tɩ̀án, də Elamə tɩ̀án, 10 də dwíə́ tə duən, pɩ̀ʋ́ nəfarʋ Osənaparə nə ja bà, ʋ kə Samari tɩʋ tə wa, də bwálá duən nə, mʋnaa tə vàn kʋ tə nə, kʋ súrí ba duən tə mama nə.»
11 Nə̀ń kʋ tə, ba nə ken sagɩ tə wa, ba nə pɩn pɩ̀ʋ́ Arətasɛrəsɛsə nə. Ba pʋ́pʋ́nɩ́, ba wʋ́: «Nə mʋ̀ n tʋ̀tʋ̀nà tə, nə nə wulə mʋnaa tə vàn kʋ tə nə, kʋ súrí ba duən tə mama nə, nə pʋ́pʋ́nɩ́, nə pɩn pɩ̀ʋ́ Arətasɛrəsɛsə nə.
12 Nə swɩ̀n n mʋ̀ pɩ̀ʋ́ con, sə n yəni də Zwifə-ba tə nə nan n con, ba bà nə con, Zwerizalɛmə wa, pìí ba wulə ba lwè tɩʋ tə, kʋ tɩ̀án nə vɩ nii, ba ga yɩ wʋlʋnyɩna. Ba dɩga bírí tə də̀ń, ba ga wulə ba lwè tə, ba zɩ̀n yɩɩ nə. 13 N mʋ̀ pɩ̀ʋ́ dàń mɛ, sə n yəni, də ba nə pìí ba lwà kʋ tɩʋ təntə, ba nə lwà kʋ biritaŋʋ tə, ba ma kɩkarɩ kʋ, ba kʋ́ʋ̀ bá ŋwɩ́n ba yuu lanpo, nə à yə̀ə́ ba zɩla yuu ŋwɩ́rán, nə à yə̀ə́ ba cwəŋə vəlu ŋwɩ́rán. Yá kʋ nətʋ wá pa, n mʋ̀ pɩ̀ʋ́ kwɩ̀n kʋ tə nə, n nə mɛ, sə n na. 14 Sɩ́ʋ́n nə, nə mʋ̀ lɩ̀à tə nə nɩ yuywaŋʋ, nə tʋŋa nə pɩn mʋ́ tə nɩ də, kʋ wà mɛ, sə nə na n mʋ̀ pɩ̀ʋ́, də ba muŋə mʋ́. Nə dàń swɩ̀n yìə̀n təntə n mʋ̀ pɩ̀ʋ́ con, 15 sə n pa ba pɩ̀à tə nɛɛ, n nyɩna-ba saga tə wa, ba nə pʋ́pʋ́nɩ́ ba tún. N nyɩna-ba saga tə wa, n wá na, n ga wá lwarɩ, də tɩʋ təntə tɩ̀án vɩ pɛ̀gá nii, də nagwanɛɛ yáá tɩ̀án nii. Yá ba tàà nə yɩ ba vɩ nii, fuən mama. Mə kʋ mʋ̀ nə pɩn, ba ma cʋ̀gʋ̀ kʋ tɩʋ təntə. 16 Nə swɩ̀n, sə n mʋ̀ pɩ̀ʋ́ yəni də, ba nə pìí ba lwà tɩʋ təntə, ba ga lwà kʋ biritaŋʋ tə, n kʋ́ʋ̀ bá ya mʋnaa tə vàn təntə pɩ̀ʋ́.»
Pɩ̀ʋ́ Arətasɛrəsɛsə le Zwifə-ba dʋŋa tə
17 Pɩ̀ʋ́ tə le ba, ʋ wʋ́: «Sagɩ tə pɩn yáá tíú Rehumə nə, də Swiməswayi nə, ʋ nə pʋ́pʋ́nɩ́ saga, də ba tʋtʋnduən tə nə, ba nə wulə Samari nə, də bwálá duən nə, mʋnaa tə kwa con. À jʋnɩ aba.
18 Ba kàrɩ̀ sagɩ tə, á nə tʋn nə nə, à yáá con, nəpon nəpon. 19 À pɩn nii, sə ba pɩ̀à yìə̀n tə nɛɛ, yá ba nɩ də fuən mama, tɩʋ təntə tɩ̀án zaŋa, ba zɩga pɛ̀gá nə. Yá ba gugurə duən, ba ma vɩ nii. 20 pɛ̀gá nəfaran yɩn Zwerizalɛmə wa, ba nə dí pàrɩ̀ mʋnaa tə kwa con, lʋʋ nii tə mama yuu wa. Ba yà joŋə yuu lanpo, də zɩla yuu ŋwɩ́rán, də cwəŋə vəlu ŋwɩ́rán. 21 Sɩ́ʋ́n nə, á dàń pɩan nii lɩ̀à nə, sə ba pa, Zwifə-ba yá ba tʋ̀tʋ̀nán tə nə, ba dàn ká pìí ba lwà tɩʋ təntə, də à nə wà nii pɩn. 22 Á dànà ká ja kʋ, á ma bwan bwana, sə kʋ pa, ba kwɛn ba vɩ pɛ̀gá tə nii.»
23 Ba nə zə́n ba kàrɩ̀ pɩ̀ʋ́ Arətasɛrəsɛsə sagɩ tə, ba zwɛ̀, Rehumə də Swiməswayi, ʋ nə pʋ́pʋ́nɩ́ saga tə, də ba tʋtʋnduən tə yáá con, ba bɩbarɩ ba va, ba yí Zwifə-ba, Zwerizalɛmə nə. Ba pɩn Zwifə-ba yá ba tʋ̀tʋ̀nán tə, də dɩ̀àn.
24 Mə kʋ zɩgɩ nətʋ, Yɩɩ dìə̀ tə tʋ̀tʋ̀nán tə ma cən tə zɩgɩ, Zwerizalɛmə wa. Yá tə cən tə zɩgɩ, kʋ va kʋ yí, Pɛrəsə pɩ̀ʋ́ Dariyusə pàrɩ̀ tə, bɩna bələ nii bɩnɩ tə nə.