Yɩɩ tʋtʋŋɩ tə ka pìí ka tʋn
3
1 Bɩnɩ tə cànɩ̀ barpɛ nii cànà tə yí, də Yɩzərayɛlə lɩ̀à tə wulə ba sànɩ́ wa. Ba mama dàń twi, ba kun duən nə, də pubʋŋa nədʋ, Zwerizalɛmə nə. 2 Yosadakə bìú Zozuwe, də ʋ nubɩa Yɩɩ joŋwana tə, də Swalətiyɛlə bìú Zorobabɛlə, də ʋ nubɩa tə, zàn ba lwà Yɩzərayɛlə lɩ̀à Yɩɩ joŋi bwálɩ́ tə, sə ba fwa jwəŋə, ba sʋ̀rɩ́ kʋ yuu wa, ndə kʋ nə pʋ́pʋ́nɩ́ Yɩɩ nii tə wa, ʋ nə pɩn Moyizə nə, ʋ nə yɩ Yɩɩ lìù. 3 Ba pìí ba lwà Yɩɩ joŋi bwálɩ́ tə, kʋ dəkuu bwálɩ́ nə. Cɩ́gá, ba yà dəri dwíə́ nəkaran* tə fən, ba nə twi ba jə̀ə́ lʋʋ nii tə wa. Yá ba dàń fwa jwəŋə, ba sʋ̀rɩ́ kʋ yuu wa, ba pa Ba-Yígúrə́-Jə-Tiu nə. Ba fwa jɩjʋ jwəŋə tə, ba nə sʋ̀rɩ́, də didəni jwəŋə tə, ba nə sʋ̀rɩ́. 4 Ba dí sə̀lə́ cànà tə, ndə kʋ nə pʋ́pʋ́nɩ́ nətʋ, ba ga fwa jwəŋə tə, ba nə mɛ, sə ba fwa, dɩɩn mama wa. 5 Kʋ kwa nə, ba fwa joŋi tə, ba nə sʋ̀rɩ́ máŋá mama. Tə mʋ̀ nə yɩ cànà təntən dɩɩn jwəŋə tə, də jwəŋə tə, ba nə mɛ sə ba fwa, dɩan tə nə, tə nə yɩ Ba-Yígúrə́-Jə-Tiu nə tɩ, kʋ súrí pupwən jwəŋə tə nə, lìù mama nə fwa ʋ pɩn Ba-Yígúrə́-Jə-Tiu nə. 6 Kʋ nə zɩgɩ barpɛ nii cànà tə təntən dɩɩn tə nə, ba sinti ba fwa jwəŋə, ba sʋ̀rɩ́ ba pɩn Ba-Yígúrə́-Jə-Tiu nə. Yá ba yà tə wà Ba-Yígúrə́-Jə-Tiu dìə̀ tə də̀ń tún.7 Ba pɩn səbiu lɩ̀à tə nə sə̀ kapana nə, də lɩ̀à tə nə sə̀ dɛɛ nə. Ba tə pɩn mɩna, də wiən tə, ba nə nywɩn, də nʋga, Sidon tɩ̀án, də Tirə tɩ̀án nə, sə ba pa Liban sɩsaban daran twá mʋʋ, tə bà Zwafa, ndə Pɛrəsə pɩ̀ʋ́ Sirusə nə pɩn nii, sə kʋ tʋn nətʋ. 8 Ba nə pìí ba bà bwálɩ́ tə wa, Yɩɩ dìə̀ tə nə yɩn lá, Zwerizalɛmə wa, bɩna bələ nii nə, Swalətiyɛlə bìú Zorobabɛlə, də Yosadakə bìú Zozuwe, də ʋ nubɩa Yɩɩ joŋwana tə gɩganɩ tə, də Levi dwíí tə, də lɩ̀à tə mama, ba nə pìí ba nan yongaʋ tə ba bà, zàn ba wulə ba tʋŋa. Ba kúrí Levi dwíí tə lɩ̀à, kʋ nə mɛ bɩna sapʋa, də ba tə nə dwə nətʋ, sə ba ywàń Ba-Yígúrə́-Jə-Tiu dìə̀ tə lwiu yuu. 9 Zozuwe, də ʋ bɩ̀á, də ʋ nubɩa, də Kadəmɩyɛlə, də ʋ bɩ̀á tə, ba nə yɩ Zwida lʋʋ lɩ̀à, də Enadadə bɩ̀á tə, də ʋ nɩ̀án tə, də ba nubɩa Levi dwíí tə, ken nii nədʋ, ba ywàŋá tʋ̀tʋ̀nà tə yuu, ba nə lwè Ba-Yígúrə́-Jə-Tiu dìə̀ tə.
10 Máŋá tə tʋ̀tʋ̀nà tə nə tún Ba-Yígúrə́-Jə-Tiu dìə̀ tə də̀ń, ba pɩn Yɩɩ joŋwana tə zʋ joŋwana gànàn, ba bà də nabwanan, yá Levi dwíí tə, ba nə yɩ Asafə bɩ̀á tə ga bà də zɩnzɩran, sə ba ma bʋ Ba-Yígúrə́-Jə-Tiu nə, ndə Yɩzərayɛlə pɩ̀ʋ́ Davidə nə bɩrɩ, sə kʋ tʋn nətʋ. 11 Ba pɩn dun Ba-Yígúrə́-Jə-Tiu nə, ba ga nuŋə, ba joŋə duən nə, ba wʋ́: «Ba-Yígúrə́-Jə-Tiu yɩ sonu tíú, ʋ wʋywaŋʋ* tə, ʋ nə tʋŋa Yɩzərayɛlə lɩ̀à yɩra, ba yígúrə́ jə.» Yá lalʋʋ tə mama dàń mà pupwən cə̀rí, ba ma bwɩ Ba-Yígúrə́-Jə-Tiu nə, ba nə wulə ba túŋə́ Ba-Yígúrə́-Jə-Tiu dìə̀ tə də̀ń yɩrɩ.
12 Yɩɩ joŋwana tə wa nəkwɩna kapʋpʋ, də Levi dwíí tə wa nəkwɩna kapʋpʋ, də dìì tɩ̀án tə wa nəkwɩna kapʋpʋ, ba nə nɩ Yɩɩ dìə̀ nədwan tə dàń kwi, ba kori dɩ̀ yɩɩ nə, máŋá tə wa, tʋ̀tʋ̀nà tə nə wulə ba túŋə́, Yɩɩ dìə̀ nədʋn tə də̀ń, ba yɩ́á wa. Yá ba wa lɩ̀à kapʋpʋ də mà pupwən cə̀rí. 13 Kʋ nətʋ dàń pɩn, lalʋʋ tə kʋ́ʋ̀ wàrɩ̀ pupwən cə̀rí tə, də kwirə tə swɩ́án, ba lwarɩ duən wa. Cɩ́gá, lalʋʋ tə mama yà mà cə̀rí, ba kə yɩɩ nə, lɩ̀à nə nə̀ń tə, yiŋʋnɩ.