Nehemi
Nehemi nì Zwerizalɛmə ŋwɛn
1
1 Hakalɩya bìú Nehemi sʋ̀ràn. Kisəlɛvə cànà tə wa, pɩ̀ʋ́ Arətasɛrəsɛsə pàrɩ̀ tə, bɩna sapʋa bɩnɩ tə wa, à mʋ̀ Nehemi yà wulə Suzə patɩʋ tə wa. 2 Hanani, ʋ nə yɩ à nubiu don, də bara duən nan Zwida nagwanaa tə wa, ba bà. À bwe ba Zwifə-ba tə yoo, ba nə pìí ba nan yongaʋ tə ba bàa, də Zwerizalɛmə yoo. 3 Ba le nə, ba wʋ́: «Zwifə-ba tə nə pìí ba nan yongaʋ tə, ba bà Zwida nagwanaa tə wa, yɩ ba wulə cavɩra, də pucʋnɩ nəfarʋ wa. Zwerizalɛmə biritaŋʋ tə jə lulwərən, yá mən dí kʋ mimien tə.»4 Máŋá tə wa, à nə nì yìə̀n təntə, à jə̀ń tɩa, à ga kwi. Yá à yɩn pucʋnɩ wa, dɩan də dɩan. À vwə à nii, à ga jʋn Yɩɩ tə, ʋ nə wulə lanworu wa. 5 À swɩ̀n, à wʋ́: «Aaa! Ba-Yígúrə́-Jə-Tiu, Yɩɩ tə, n nə wulə lanworu wa, n yɩ Yɩɩ tə, n nə dáá, n ga ba kamandon jə. N jə n nimarʋ tə, də n wʋywaŋʋ* tə zəni, n nə tún də ba tə, ba nə swə mʋ́, ba ga twá n yìə̀n tə nə, n nə pɩn nii tə yuu wa. 6 À lòrì mʋ́, sə n guni n zɩɩn, n cʋgʋ à con zəni, n ga súrí n yɩ́á à yuu wa, n le à mʋ̀ n tʋtʋnʋ tə yɩjʋnɩ. Sɩ́ʋ́n nə, à wulə n yáá con, à jʋnɩ mʋ́, yɩcaʋ də tɩtɩn, Yɩzərayɛlə lɩ̀à tə yɩrɩ, ba nə yɩ n tʋ̀tʋ̀nà. À lòrì mʋ́, sə n kwɛn nə mʋ̀ Yɩzərayɛlə lɩ̀à tə cʋna tə, nə nə tʋn, nə zɩgɩ n nə, n lɩ nə mʋ̀ də mʋ́ pwə́rə́ wa. Cɩ́gá, à mʋ̀ də à dwíí tə tʋn cʋna, nə zɩgɩ n nə. 7 Cɩ́gá mama, nə tʋn yolwan, nə zɩgɩ n nə. N yìə̀n tə, n nə twá də n tʋtʋnʋ Moyizə, n ma pa nii tə yuu wa, də yìə̀n tə, n nə pɩn tə pʋ́pʋ́nɩ́, sə nə twá tə nə, də yìə̀n tə, n nə bɩrɩ sə tə tʋn, nə wà tə nii zìlí. 8 Bʋ́n sʋgʋ tə yoo, n nə pɩn n tʋtʋnʋ Moyizə swɩ̀n nə con. Ʋ swɩ̀n də, nə nə vɩga n nii, n wá laga nəba duən yáá nə, n kə dwíə́ nəkaran* tə wa. 9 Yá nə dàń nə pìí, nə bà n con, nə ga sɛ̀, nə twá yìə̀n tə nə, n nə pɩn nii tə yuu wa, də n yà nə swə, n dɩŋa nəba n lɩ, n kə yiŋʋnɩ, lʋʋ nii yígúrə́ bwálɩ́ don nə də, n tə wá pìí, n ja nəba, n bà bwálɩ́ tə wa, n nə kúrí, sə ba bon n yɩrɩ lá. 10 Yuu-Tiu, nə yɩ n tʋ̀tʋ̀nà, nə ga yɩ n mʋ̀ lɩ̀à. Kʋ twá də n wanʋ, də n jɩɩn dɩ̀àn nəfarʋ tə, n ma jon nəba. 11 Aaa! Yuu-Tiu, à dàń lòrì mʋ́, sə n cʋgʋ à mʋ̀ n tʋtʋnʋ tə, də n tʋ̀tʋ̀nà tə duən tə, ba nə zìlí n yɩrɩ tə, yɩjʋnɩ. Pa sə à wànɩ́, à na yuywaŋʋ, pɩ̀ʋ́ tə yáá con.»
Kʋ máŋá tə wa, də à mʋ̀ yà nə twɛ́n pɩ̀ʋ́ tə sana, à pɩn wá, ʋ nywɩn.