Nehemi 2

Nehemi nɩ cwəŋə, sə ʋ pìí ʋ va Zwerizalɛmə

1 Pɩ̀ʋ́ Arətasɛrəsɛsə pàrɩ̀ tə bɩna sapʋa bɩnɩ tə wa, Nisan cànà tə wa, dɩɩn don nə, divɛn yà tígə́ pɩ̀ʋ́ tə yáá con. À ma tì divɛn tə, à twɛ́n, à pa pɩ̀ʋ́ tə nə. Kʋ máŋá tə wa, də à yáá yà ŋwɩ̀ń zənzən. À yáá yà ga tə wà dí yáá ka ŋwɩ̀ń pɩ̀ʋ́ tə yáá con də mama. 2 Pɩ̀ʋ́ tə dàń bwe nə, ʋ wʋ́: «Bɛ̀ɛ̀ nə pɩn, n yáá ma ŋwɩ̀ń nətən, yá n ga ba yɩ̀ də? Bɛ̀ɛ̀ yoo nə wʋwalɩ mʋ́, n bɩcan wa?»

Fən yà zʋa nə zənzən. 3 Yá à le pɩ̀ʋ́ tə, à wʋ́: «À nyɩna pɩ̀ʋ́, Yɩɩ wá pa mʋ́ mɩdarɩ! À yáá wàrɩ̀ ka ba ŋwɩ̀ń. Ba cʋ̀gʋ̀ tɩʋ tə, ba nə gùrì à nyɩna-ba kʋ wa, mən ga də́ kʋ mimien tə.» 4 Pɩ̀ʋ́ tə ma bwe nə, ʋ wʋ́: «Bɛ̀ɛ̀ nə n dàń pɩ̀à, sə à fwa, à pa mʋ́?» À jʋn Yɩɩ tə, ʋ nə wulə lanworu wa, à waa con, 5 à ga le pɩ̀ʋ́ tə, à wʋ́: «À nyɩna pɩ̀ʋ́, də kʋ nə ywán də mʋ́, də à mʋ̀ n tʋtʋnʋ tə nə nɩ yuywaŋʋ n yáá con, pa nə cwəŋə, sə à va Zwida nagwanaa tə wa, à lwà tɩʋ tə, ba nə gùrì à nyɩna-ba kʋ wa.» 6 Pakan tə yà jə̀ə́ pɩ̀ʋ́ tə səpuni nə. Yá pɩ̀ʋ́ tə kʋ́ʋ̀ bwe nə, ʋ wʋ́: «N cwəŋə tə vəlu wá dánɩ́ kʋ mɛ nətə? Máŋá kwà wa nə, n wá pìí n bà?» À nɩ də pɩ̀ʋ́ tə wá sɛ̀, ʋ pa nə cwəŋə, sə à vìí. Yá à dàń bɩrɩ wá máŋá tə, à nə wá pìí à bà.

7 À tə swɩ̀n pɩ̀ʋ́ tə con, à súrí lá, à wʋ́: «Də kʋ nə ywán də mʋ́, à nyɩna pɩ̀ʋ́, à lòrì, sə n pa nə saga, à nə wá pa nagwanɛɛ yáá tɩ̀án tə nə, ba nə wulə Əfəratə mʋnaa tə kwa con, sə ba yá nə, sə à kɛ̀ń à va Zwida nagwanaa tə wa. 8 À tə pɩ̀à, sə n pa nə sagɩ don, à nə wá ja va, à pa Azafə nə, ʋ nə ywàŋá pɩ̀ʋ́ pún tə yuu nə, sə ʋ pa nə baŋɩ, sə à ma fwa dɩ̀àn dəkuu bwálɩ́ tə mimien tə, tə nə bwə́lə́ Yɩɩ dìə̀ tə yɩra, də tɩʋ tə biritaŋʋ tə, də dìə̀ tə, à nə wá ya ka wa.» Yá pɩ̀ʋ́ tə dàń pɩn nə won tə mama, à nə lòrì, à tíú Yɩɩ yà nə wulə də nə yɩrɩ.

Nehemi yí Zwerizalɛmə

9 À vəli nagwanɛɛ yáá tɩ̀án tə con, ba nə wulə Əfəratə mʋnaa tə kwa con, à pa ba pɩ̀ʋ́ tə saga tə. Pɩ̀ʋ́ tə yà pɩn kwatara yun tɩ̀án, də səsədɩra kwé nə. 10 Yá Sanbala, ʋ nə yɩ Bɛtə-Horon tíú, də Tobɩya, ʋ nə daa Sanbala nə, ʋ ga yɩ Amon dwíí lìù nə nì də, lìù twi, sə ʋ kwɛn Yɩzərayɛlə lɩ̀à tə, kʋ yɩ̀gà ba zənzən.

11 À nə yí Zwerizalɛmə, à fwa dɩan batwa. 12 Kʋ kwa nə, à dàń zàn tɩtɩn nə, à də bara duən nan, nə jírí. À yà wà lìù mama con swɩ̀n, yoo tə, à tíú Yɩɩ nə ken à bɩcan wa, sə à tʋn Zwerizalɛmə wa. À yà wà vànɩ́ don jɩn, də kʋ nə tà kʋ tə, à nə dɩ̀gà kʋ yuu. 13 À twá vara con mimii tə, à nan tɩtɩn tə nə, à va tɩdən nabuliyii tə con, kʋ nə daa ywərən mimii tə con. À ywàń Zwerizalɛmə biritaŋʋ tə, à na də kʋ jə lulwərən, yá mən dí kʋ mimien tə. 14 À twá mimii tə, kʋ nə daa nabuliyii tə con, də pɩ̀ʋ́ sɩngwala tə bɩan nə. Yá bwálɩ́ yà tə̀lə́ lá, sə vànɩ́ tə à nə dɩ̀gà, twá lá, kʋ lɛ. 15 Kʋ tɩtɩn tə nə, à twá Sedəron vara tə con, à ma ywàń biritaŋʋ tə nə yɩ nətʋ. Kʋ kwa nə, à dàń pìí à va, à twá vara con mimii tə, à zʋ.

16 Tɩʋ tə yáá tɩ̀án yà yəri bwálɩ́ tə, à nə vəli, ba ga yəri kʋ tə, à nə fwa. Kʋ máŋá təntə wa, də à yà tə wà yoo mama swɩ̀n, à bɩrɩ Zwifə-ba tə nə, də Yɩɩ joŋwana tə nə, də tɩʋ tə nəkwɩna tə nə, də tɩʋ tə yáá tɩ̀án tə nə, də tʋ̀tʋ̀nán yun tɩ̀án duən nə. 17 Yá à dàń swɩ̀n ba con, à wʋ́: «Á na yobalwarʋ tə, nə nə wulə kʋ wa! Ba cʋ̀gʋ̀ Zwerizalɛmə, mən ga dí kʋ mimien tə! Á bɩ̀àn, sə nə lwà Zwerizalɛmə biritaŋʋ tə, yá nə cavɩra tə dàń wá zwɛ̀.» 18 À dàń man nətʋ tə, à tíú Yɩɩ nə yɩn də nə, à bɩrɩ ba. À man pɩ̀ʋ́ tə sʋ̀ràn tə də, ʋ nə swɩ̀n à con, à bɩrɩ ba. Ba ma swɩ̀n, ba wʋ́: «Nə zaŋa nə lwà tɩʋ tə!» Yá ba dàn duən jɩ̀àn, sə ba ma tʋn tʋtʋnzəŋu təntə.

19 Yá Sanbala, ʋ nə yɩ Bɛtə-Horon tíú, də Tobɩya, ʋ nə daa Sanbala nə, ʋ ga yɩ Amon dwíí lìù, də Geswɛmə, ʋ nə yɩ Arabə dwíí lìù, ba mʋ̀ lɩ̀à təntə nə nì kʋ, ba pwɛ́ nəba, də ba fʋfʋlɩ nəba. Ba swɩ̀n, ba wʋ́: «Bɛ̀ɛ̀ nə á fwa lá nə? Kʋ yɩ á pɩ̀à, sə á vɩ pɩ̀ʋ́ tə nii naaa?» 20 À ma le ba, à wʋ́: «Yɩɩ tə, ʋ nə wulə lanworu wa, nə wá pa nə tʋn tʋtʋŋɩ tə, sə kʋ nii sú. Nə mʋ̀ ʋ tʋ̀tʋ̀nà tə wá zàn, nə lwà tɩʋ tə. Yá á mʋ̀ ba tori jə, á ma ba nii də jə won mama yuu wa, yá lìù mama də bá lìí á yoo, Zwerizalɛmə wa.»