Zwifə-ba wulə ba lwè Zwerizalɛmə biritaŋʋ tə
3
1 Yɩɩ joŋwana yun tɩ̀án nəkwɩa Eliyaswibə nyɩ́n ʋ zàn, ʋ də ʋ nubɩa Yɩɩ joŋwana tə lwà vanmɩnɩ mimii tə. Ba ken kʋ bòrə̀n tə, ba ga tún kʋ vàn nə, ba pa Yɩɩ nə. Kʋ nə zɩgɩ Meya dəyuu dìə̀ nədarʋ tə nə, kʋ va kʋ yí Hananəyɛlə dəyuu dìə̀ nədarʋ tə, ba tún kʋ vàn nə, ba pa Yɩɩ nə.2 Ba səpuni nə, Zweriko tɩ̀án bara, də Yiməri bìú Zakurə nə lwə̀.
3 Senaa dwíí tə nə lwə̀ Filə mimii tə. Ba ken kʋ ywəŋə tə, ba kə kʋ bòrə̀n, də kʋ borusɔɔ, ba ga gɩra kʋ də baŋɩ.
4 Ba səpuni nə, Uriya bìú Meremɔtə, ʋ nə yɩ Hakɔsə nàʋ́, nə lwə̀. Ba səpuni nə, Berekɩya bìú Meswulamə, ʋ nə yɩ Meswezabɛlə nàʋ́, nə lwə̀. Ba səpuni nə, Baana bìú Sadɔkə nə lwə̀.
5 Ba səpuni nə, Tekʋa tɩ̀án nə lwə̀. Yá ba yáá tɩ̀án tə wà sɛ̀, ba twá tʋ̀tʋ̀nán yun tɩ̀án tə nii nə.
6 Paseya bìú Yoyada, də Besodɩya bìú Meswulamə, nə kwɛn mimii nədwan tə. Ba ken kʋ bòrə̀n tə, də kʋ borusɔɔ, ba ga gɩra kʋ də baŋɩ.
7 Ba səpuni nə, Melatɩya, ʋ nə yɩ Gabawon tíú, də Yadon, ʋ nə yɩ Meronɔtə tíú, də Gabawon tɩ̀án duən, də Misəpa tɩ̀án, ba nə tʋŋa ba pɩn mʋʋ kwa nagwanaa yáá tíú tə nə, nə lwə̀.
8 Ba səpuni nə, Harəhaya bìú Uziyɛlə, ʋ nə wulə lɩ̀à tə wa, ba nə tʋŋa də sɩ́án, də Hananɩa, ʋ nə wulə lɩ̀à tə wa, ba nə fwa tɩralɩ, nə lwə̀. Ba lwə̀ Zwerizalɛmə biritaŋʋ tə, ba ja va, ba mɛ kʋ bwálɩ́ tə nə, kʋ nə wala.
9 Ba səpuni nə, Urə bìú Refaya, ʋ nə yɩ Zwerizalɛmə sanii don faan pɩ̀ʋ́, nə lwə̀.
10 Ba səpuni nə, Harumafə bìú Yedaya nə lwə̀ biritaŋʋ tə vàn tə nə wulə ʋ dìə̀ yáá con. Ʋ səpuni nə, Haswabənɩya bìú Hatuswə nə lwə̀.
11 Biritaŋʋ tə vàn don, də dipɛn wərə sàń dəyuu dìə̀ nədarʋ tə yɩ Harimə bìú Maləkɩya, də Pahatə-Mʋabə bìú Haswubə nə lwə̀.
12 Ba səpuni nə, Halohɛswə bìú Swalumə, ʋ nə yɩ Zwerizalɛmə sanii don faan pɩ̀ʋ́, də ʋ bwɩ̀ɩ́ nə lwə̀.
13 Hanun, də Zanʋa tɩ̀án nə kwɛn vara con mimii tə. Ba lwə̀ kʋ, ba kə kʋ bòrə̀n, də kʋ borusɔɔ, ba ga gɩra kʋ də baŋɩ. Ba tə lwə̀ biritaŋʋ tə jɩvaŋa mʋ̀rʋ̀, ba súrí lá, ba ja va, ba yí ywərən mimii tə.
14 Rekabə bìú Maləkɩya, ʋ nə yɩ Bɛtə-Kerɛmə tɩʋ tə pɩ̀ʋ́, nə kwɛn ywərən mimii tə. Ʋ ken kʋ bòrə̀n, də kʋ borusɔɔ, ʋ ga gɩra kʋ də baŋɩ.
15 Kolə-Hoze bìú Swalumə, ʋ nə yɩ Misəpa tɩʋ tə pɩ̀ʋ́, nə lwə̀ mimii tə, kʋ nə daa nabuliyii tə con. Ʋ lwə̀ kʋ, ʋ fwa kʋ dəyuu, ʋ kə kʋ bòrə̀n, də kʋ borusɔɔ, ʋ ga gɩra kʋ də baŋɩ. Ʋ tə lwə̀ biritaŋʋ tə vàn tə nə wulə Silowe càrʋ́ tə nii nə, pɩ̀ʋ́ tɩ̀án kárá tə con, ʋ ja va, ʋ yí nacana tə nə cwí pɩ̀ʋ́ Davidə sadiyuu tə wa.
16 Ʋ kwa con tə yɩ Azəbukə bìú Nehemi, ʋ nə yɩ Bɛtə-Surə tɩʋ tə faan pɩ̀ʋ́, nə lwə̀,ʋ ja va, ʋ yí Davidə libərə tə, də sɩngwala tə, də kwatara babɩran sàń tə.
17 Ʋ kwa con tə yɩ Levi dwíí tə nə lwə̀. Bani bìú Rehumə səpuni nə, Haswabɩya, ʋ nə yɩ Keyila tɩʋ tə faan pɩ̀ʋ́, nə lwə̀.
18 Ʋ kwa con tə yɩ ba nubɩa tə nə lwə̀. Enadadə bìú Bavayi, ʋ nə yɩ Keyila tɩʋ tə faan pɩ̀ʋ́, lwə̀ lá nə.
19 Yá ʋ səpuni nə, Zozuwe bìú Ezɛrə, ʋ nə yɩ Misəpa pɩ̀ʋ́, nə lwə̀ vàn tə, kʋ nə daa kwatarɩ zɩla dìə̀ nacanɩ tə con, bírə́ tə nigwancɩn tə wa.
20 Ʋ kwa con, Zabayi bìú Barukə lwə̀ vàn don, də yawala. Ʋ zɩgɩ nigwancɩn tə nə, ʋ lwà kʋ, ʋ va ʋ yí, Yɩɩ joŋwana yun tɩ̀án nəkwɩa Eliyaswibə dìə̀ tə mimii nə.
21 Ʋ kwa con, Uri bìú Meremɔtə, ʋ nə yɩ Hakɔsə nàʋ́, lwə̀ biritaŋʋ tə vàn don, kʋ nə zɩgɩ Eliyaswibə dìə̀ tə mimii nə, kʋ va kʋ kɛ̀ń dìə̀ tə.
22 Ʋ kwa con tə yɩ Yɩɩ joŋwana tə, ba nə wulə Zwerizalɛmə nii nə, nə lwə̀.
23 Ba kwa con, Bɛnzwamɛn, də Haswubə lwə̀ biritaŋʋ tə vàn tə nə wulə ba dìə̀ yáá con. Ba kwa con, Maaseya bìú Azarɩya, ʋ nə yɩ Ananɩya nàʋ́, də lwə̀ kʋ vàn tə nə wulə ʋ dìə̀ səpuni nə.
24 Ʋ kwa con, Enadadə bìú Binuwi lwə̀ kʋ vàn don, kʋ nə zɩgɩ Azarɩya dìə̀ tə nə, kʋ va kʋ yí bírə́ tə nigwancɩn tə.
25 Uzayi bìú Palalə lwə̀ biritaŋʋ tə vàn tə, kʋ nə wulə kʋ nigwancɩn tə, də dəyuu dìə̀ nədarʋ tə pwə́rə́ wa, kʋ nə wulə pɩ̀ʋ́ sàń tə con, kʋ kɛ̀ń kʋ va, kʋ nan bandiə dəwoo tə nə. Ʋ kwa con tə yɩ Parewɔswə bìú Pedaya nə lwə̀.
26 Yɩɩ dìə̀ tʋ̀tʋ̀nà tə, ba nə wulə Ofɛlə paan sanii tə wa, lwə̀, ba va ba mɛ nɩ́á mimii tə yáá nə, yɩɩ yipɩan con, də bírə́ tə nigwancɩn dəyuu dìə̀ nədarʋ tə nə.
27 Ba kwa con, Tekʋa tɩ̀án nə lwə̀ biritaŋʋ tə vàn don, kʋ nə zɩgɩ kʋ nigwancɩn dəyuu dìə̀ nədarʋ nəfarʋ tə yáá nə, kʋ va kʋ yí sanii tə nə wulə Ofɛlə paan tə yuu wa, bírə́ tə.
28 Kʋ nə zɩgɩ səsen mimii tə máŋá nə, Yɩɩ joŋwana tə lìù mama də lwə̀ biritaŋʋ tə vàn tə nə wulə ʋ dìə̀ yáá con.
29 Ba kwa con, Yɩmɛrə bìú Sadɔkə nə lwə̀ vàn tə nə wulə ʋ dìə̀ yáá con. Ʋ kwa con tə yɩ Swekanɩya bìú Swemaya, ʋ nə yɩ yɩɩ yipɩan con mimii cɩ̀rʋ́, nə lwə̀.
30 Ba kwa con, Swelemɩya bìú Ananɩya, də Hanun, ʋ nə yɩ Salafə bardʋ nii bìú, lwə̀ biritaŋʋ tə vàn don. Ba kwa con tə yɩ Berekɩya bìú Meswulamə nə lwə̀ vàn tə nə wulə ʋ dipənə mimii yáá nə.
31 Ʋ kwa con, Maləkɩya, ʋ nə wulə lɩ̀à tə wa, ba nə tʋŋa də sɩ́án, nə lwə̀, ʋ va ʋ yí Yɩɩ dìə̀ tʋ̀tʋ̀nà tə dìì tə, də baywələ tə dìì tə, tə nə wulə Mifəkadə mimii tə yáá con, ʋ kɛ̀ń ʋ va ʋ yí biritaŋʋ tə nigwancɩn dəyuu dìə̀ tə.
32 Lɩ̀à tə nə tʋŋa də sɩ́án, də baywələ tə nə lwə̀ vàn tə nə wulə biritaŋʋ tə nigwancɩn dəyuu dìə̀ tə, də pəbii mimii tə pwə́rə́ wa.
Zwifə-ba dʋŋa tə pɩ̀à, sə ba cʋ̀gʋ̀ tʋ̀tʋ̀nán tə
33 Máŋá tə Sanbala nə nì də, nə wulə nə lwè biritaŋʋ tə, ʋ lɩŋa zàn, ʋ pùə́ ga cʋ̀gʋ̀ zənzən. 34 Ʋ pwɛ́ Zwifə-ba tə, ʋ nubɩa tə, də Samari kwatara tə yáá con, ʋ wʋ́: «Bɛ̀ɛ̀ nə Zwida lʋʋ lɩ̀à bakʋkwanyɩna ba tə wulə ba fwa? Ba bʋŋa də, nə wá yá ba sənbwen, nə pa ba tʋn ba gúrí, sə ba fwa jwəŋə, ba pa ba Yɩɩ tə nə naaa? Ba wá wànɩ́ ba pa kapana tə tə, mən nə dí tə tún duən yuu wa, pìí tə bwin naaa?» 35 Tobɩya, ʋ nə yɩ Amon dwíí, yà zɩga Sanbala səpuni nə. Yá ʋ swɩ̀n, ʋ wʋ́: «Ba mʋ̀ dàń ya də ba lwè! Cirəkurə nə bwɩn ka, ka wá tún lulwərən, ba kapana bírə́ tə yɩra.»
36 À dàń jʋn Yɩɩ, à wʋ́: «Yuu-Tiu, nə Yɩɩ, cʋgʋ ba nə pwɛ́ nəba nətʋ! Pa sə ba tətə nə pìí ba də́ cavɩra. Pa sə ba vɩrɩ ba wiən mama, ba ga ja ba, ba va yongaʋ. 37 Dàn ká yá ba yolwan tə, n pa kʋ kɛ̀ń. Dàn ká kwɛn ba cʋna tə, n lɩ, n mʋ̀ də ba pwə́rə́ wa. Cɩ́gá, ba twɩn nə mʋ̀ lɩ̀à tə, nə nə wulə nə lwè biritaŋʋ tə.»
38 Yá nə dàń lwə̀ biritaŋʋ tə mama, nə dɩ̀ nə yí kʋ titəŋi. Cɩ́gá, nə lìù mama yà yɩ ʋ tʋŋa, də ʋ bɩcan mama.