Nehemi 4

Nehemi pɩn kwatarɩ zɩla tʋ̀tʋ̀nà tə nə

1 Máŋá tə Sanbala, də Tobɩya, də Arabə-ba tə, də Amon dwíí tə, də Aswədɔdə tɩ̀án tə nə nì də, Zwerizalɛmə biritaŋʋ tə tʋ̀tʋ̀nán tə vəli yáá, yá kʋ lulwərən tə wulə tə suŋə, ba lɩŋa zàn zənzən. 2 Yá ba dàń ken nimarʋ, sə ba va ba ta Zwerizalɛmə, ba ga cʋ̀gʋ̀ cʋcʋran kʋ wa. 3 Nə də dàń jʋn nə Yɩɩ tə, nə ga taa ba yɩrɩ, nə lɩ lɩ̀à nə tún, sə nə ma cɩ̀ nə tɩ̀àn nə, yɩcaʋ də tɩtɩn. 4 Yá Zwida dwíí tə yà swɩ̀n, ba wʋ́:

«Tʋ̀tʋ̀nà tə dɩ̀àn zwɛ̀,

yá dibwərən dədwələn tə ga tə dáá zənzən.

Nə bá wànɩ́ biritaŋʋ tə nə lwà!»

5 Yá nə dʋŋa tə də yà swɩ̀n də, nə bá lwarɩ, nə ga bá na yoo mama, kʋ va kʋ yí máŋá tə, ba nə wá tʋ nə titəŋi wa, ba gʋ nəba, ba ga pa tʋtʋŋɩ tə cən kʋ zɩgɩ.

6 Zwifə-ba tə, ba yà nə wulə nə dʋŋa tə titəŋi wa, nan bwálá kapʋpʋ, ba bà ba swɩ̀n nə con, nɛɛ kapʋpʋ, sə nə pìí nə bà ba con, nə dʋŋa tə dàn ká ta nəba. 7 Kʋ mʋ̀ nə pɩn, à dàń ken lalʋʋ tə dwíí dwíí, də ba kwatara sɩ̀án, də ba cwiən, də ba twɛn, biritaŋʋ tə kwa con, tɩkʋrʋ yuu, bwálá tə nə, biritaŋʋ tə nə wà lwè kʋ sun. 8 À nə ywàń ba zɩgʋ tə kwa nə, à zàn, à swɩ̀n nəkwɩna tə, də tʋ̀tʋ̀nán yun tɩ̀án tə, də lalʋʋ tə mama con, à wʋ́: «Á dànà ká pa, á dʋŋa tə fən ja aba! Á lìə́ á tɩ̀àn də, Yuu-Tiu dáá, yá ʋ mʋ̀ ga nə jə fən! Á tɛga, á jon á nubɩa tə, də á bɩ̀á tə, də á bwɩ̀ɩ́ tə, də á kana tə, də á dìì tə, á dʋŋa tə jɩɩn wa!»

9 Yɩɩ cʋ̀gʋ̀ nə dʋŋa tə pubʋŋa tə. Ba nì də, nə lwarɩ kʋ tə, ba yà nə pɩ̀à, sə ba tʋn. Yá nə mama dàń pìí nə va biritaŋʋ tə lwiu nə. Lìù mama yà wulə ʋ tʋtʋŋɩ wa. 10 Kʋ nə zɩgɩ kʋ dɩɩn tə nə, à tʋ̀tʋ̀nà tə faan yàá lwè biritaŋʋ tə, yá ba faan tə don ga jə cwiən, də natanan, də twɛn, ba jɩ̀àn wa, ba ga zʋ kwatara lugu gànàn. Yáá tɩ̀án tə yà wulə Zwida dwíí tə mama kwa, ba ywàŋá ba yuu nə. 11 Lɩ̀à tə nə lwè biritaŋʋ tə, də ba tə nə zɩŋa kapana tə, yà yɩ ba tʋŋa də jɩɩn nədʋ, jɩɩn tə don ga jə kwatarɩ zɩlɩ. 12 Lɩ̀à tə nə lwè biritaŋʋ tə, lìù mama yà vwə ʋ kwatara sɩ̀ʋ́, ʋ tàŋá nə, ʋ ga tʋŋa. Lìù tə nə wúrí nabwanʋ yà zɩga à səpuni nə. 13 À swɩ̀n nəkwɩna tə, də tʋ̀tʋ̀nán yun tɩ̀án tə, də lalʋʋ tə gɩganɩ tə con, à wʋ́: «Tʋtʋŋɩ tə dáá, kʋ nii də ga dara. Yá nə làgà duən yáá nə, biritaŋʋ tə yuu wa, nə ga ŋʋ́ná də duən də. 14 Kʋ mʋ̀ yɩrɩ, bwálɩ́ tə mama, á nə wá zɩgɩ, á nì nabwanʋ tə kori, sə á kə dɩ̀àn, á bà duən yáá, nə con. Nə Yɩɩ tə wá ta, ʋ pa nəba!»

15 Mə nətʋ nə, nə dàń yà tʋŋa tʋtʋŋɩ tə. Nə faan yàá ja cwiən ba jɩɩn wa, kʋ nə zɩgɩ tɩbɩlakʋnʋ wa, kʋ va kʋ yí kacɩlacɛɛ naŋʋ. 16 Yá kʋ máŋá təntə wa, à yàá kʋ́ʋ̀ swɩ̀n lalʋʋ tə con, à wʋ́: «Lìù mama də ʋ tʋtʋnʋ vələ, ba jʋ Zwerizalɛmə wa. Nə cɩa tɩʋ tə nə, tɩtɩn nə, sə nə ga tʋn tɩpʋrɩ wa.» 17 À mʋ̀ də à nubɩa tə, də à tʋ̀tʋ̀nà tə, də lɩ̀à tə nə wulə à kwa, ba cɩ̀ nə nə, lìù mama yà ba ʋ gànàn lɩ. Nə lìù mama yà jə ʋ kwatarɩ zɩlɩ, ʋ jɩɩn wa.